Read Khoekhoegowab Esters 2 Bible Online

Esters 2 - Khoekhoegowab bible

Esters 2

¹Nē ǃnaeǃkhaidi khaoǃgâ, ǁgôasib gao-aob Ahasverob dib ge ǃnō ǃnubaib ge Vastis tsî ǁîs ge dī ǃkhais tsî ǁîs ǂamab ge ǂâibasen ǃkhais xa ge ǂâi.

²ǃNubai gu ge gao-aob di ǂkhamkhoegu, ǁîba ra ǃoabaga ge mî: Îts gao-aotsa ǂkhamkhoede ôabahe, ǀgôadi îsa aidi â-ide.

³Îts gao-aotsa ǃkhē-aoga mâi sa gaosis di ǃhūǃâdi hoadi ǃnâ, î gu ǂkhamkhoede ǀhaoǀhao, ǀgôadi, îsa aidi â-ide, ǁaposa ǃkhais Susas tawa taradi-ommi ǃnâ Hegaib, gao-aots di omǃoabasabeb, taradi di sâu-aob ǃomǁae; î di anixūn âde māhe.

⁴Tsî ǁnā ǀgôas, gao-aots mûǁae ga îsasa, as gao-ao kai Vastis di amǃnâs ai. Tsî nē ǃkhais ge gao-aob mûǁae ge ǃgâi i, tsîb ge ǁnāti ge dī.

⁵Tsîb ge Jodeǁî aoba ǁaposa ǃkhais Susas ǃnâ ge hâ i, Mordekaib ti ǀon hâb, Jairi ôab, Simib ôab, Kisi ôab, Benjaminǁîba,

⁶Jerusalemsa xu ǂgaeǂguibēhesan ǀkha ge ǂgaeǂguibēheb, Jexonjab, Judab gao-aob, Nebukadnesari, Babilons di gao-aob xa ge ǃgû-ūheb ǀkha ge ǂgaeǂguibēhen diba.

⁷Tsî ǁîb ge ǁnāb, Hadasas, ǁnās ge Esters, ǁîb ǁnaob di ôasa ge kaikaiba ǁgûb tsî ǁgûs tsîras ge ūhâ tama hâ i amaga, tsîs ge îsa īsib â-i tsî îsa ais â-i ǀgôa ge i, tsî ǁgûra ge ǁō-o, ob ge Mordekaiba ǁîsa ǀgôase ge ūbasen.

⁸Tsî i ge ge ī, mîs gao-aob dis tsî ǂhanub âb ge ǂansa tsî ǂgui ǀgôadi ge ǁaposa ǃkhais Susas ǃnâ Hegaib ǃomǁae ǀhaoǀhaohe ǃnubais ge Esters ona gao-aob ommi ǃnâ ge ūǂgāhe, Hegaib, taradi sâu-aob ǃûis ǃnâ.

⁹Tsî nē ǀgôas ge ǁîb mûǁae îsa ge i, tsîs ge ais âb aiǃâ ǀkhomma ge hō, ǁnās xab ge anixūn âs tsî amǃnâdi âsa mās ǀkha ge ǃhae, tsî ǁnā hû ǀgôadi, hîa ǃkhōǂuihe hâde, mās ǀkha gao-aob omma xu, tsîb ge ǁîs tsî ǁîs di ǂkhamkhoedi tsîna taradi-ommi di hoan xa ǃgâi ǃkhais ǃnâ ge ǂgâ kai.

¹⁰Tsî Esters ge ǁaes âs tsî ǀaokhoen âsa ǂanǂan tama ge hâ i, Mordekaib ge ǁîsa ǃkhâi xui-ao, îs ǁîsa tā ǂanǂan, ti.

¹¹Tsî Mordekaib ge mâ tsēs hoasa taradi-ommi di ai-ommi aiǃâ gere mâma, Esters di ǃgâihâsib tsî ǁîs ǀkha nî ǃnae xūnab nî ǂanse.

¹²Tsî mâ ǀgôas hoas di ǃnās ge ǀgūo, gao-aob Ahasverob tawas nî sīse, disiǀgamǀa ǁkhâga xus ge taradi di ǂhanub ǃoa dī-ūhes khaoǃgâ, nēti di ge anixūn âs di tsēde ǀoa xui-ao, ǃnani ǁkhâgu kōse mire-olib ǀkha tsî ǃnani ǁkhâgu kōse ǃgâihamxūn ǀkha tsî taradi di anixūn ǀnîn ǀkha.

¹³ǁNāǃnubais ge ǀgôasa ǁnāti gao-aob tawa ge sī, ǁîs ra mîn hoanas ge ge māhe, ǁîn ǀkhas nî taradi-omma xu gao-aob di ommi ǃoa ǃgûse.

¹⁴ǃUias ge ge ǂgâ tsî ǁgoagas ge ǁkhawa ǀgamǁî taradi-ommi ǃoa ge ǃgû Saasgab, gao-aob di omǃoabasabeb ǀgamitaradi di sâu-aob ǃûis ǁga, os ge ǁkhawa gao-aob ǃoa hā tama hâ, gao-aob ga ǁîsa tura tama io tsî ǀons ǀkhas ga ǂgaihe tama io.

¹⁵Tsî Esters ǃnās, Abigaili, Mordekaib ǁnaosab, ǁîsa ge ǀgôase ūb di ôas dis ge ǀgūo, gao-aob tawas nî sīse, os ge ǀnî xū-e tura tama, Hegaib, gao-aob di omǃoabasabeb taradi di sâu-aob ge mî-i ǀgui-e, os ge Estersa ǁîsa ge mûn hoan mûǁae ǀkhomma ge hō.

¹⁶Nētis ge Estersa gao-aob Ahasverob ǃoa gao-aosi ommi âb ǃnâ ge ūsīhe, disiǁî ǁkhâb ǃnâ, ǁnāb ge ǁkhâb Tebet, hûǁî kurib gaosis âb dib ǃnâ ge ība.

¹⁷Tsî gao-aob ge Estersa taradi hoadi ǃgâ-ai ge ǀnam, tsîs ge ǁîsa ǀkhommi tsî ǀkhomxaǂgaosib tsîkha ais âb aiǃâ ge hō, ǀgôadi hoadi ǂamai, tsîb ge gao-aosi kronsa danas âs ai ge ǂnûi, tsîb ge ǁîsa ge gao-aodī Vastis di ǃās ǃnâ.

¹⁸ǃNubaib ge gao-aoba gaosagu âb hoagu tsî ǃgāgu âb hoaga Esters ǂama ǂûǁae-e ge dība, tsîb ge ǃhūǃâde sâba ge mā, tsîb ge ǀkhaexūna ge mā, gao-aob a ǁkhās kōse.

¹⁹Tsî ǀgamǁî ǃnās ai di ge ǀgôade ǀhaoǀhaoheo, ob ge Mordekaiba gao-aob di ǁāb ǃnâ ge ǂnôa i.

²⁰Tsî Esters ge ǁîs di ǀaokhoen tsî ǁîs di ǁaes tsîna ǂanǂan tama ge i, Mordekaib ge ǁîsa mîmāse. Esters ge mîmās Mordekaib disa ge dī, ǁîb xas ge kaikaihe os gere dī khami.

²¹ǁNā tsēdi ǃnâ, Mordekaib gao-aob di ǁāb ǃnâ ǂnôa hîa kha ge Bigtanni tsî Tereb tsîkha, ǀgam omǃoabasabekha gao-aob dikha, ǁāb ǃûi-aogu dikha kaise ǁaixa tsî gao-aob Ahasverob ai kha nî ǃomkha ǁgui ǃkhaisa ge ôa-am.

²²Tsî nē ǃkhaisab ge Mordekaiba ge ǂanǃnâ, ob ge ǁîsa gao-aos Estersa ge ǂanǂan, os ge Estersa ǁîsa Mordekaib di ǀons ǃnâ gao-aoba ge sī mîba.

²³Tsî ǃkhais ge ôaǃnâheo, os ge ǁnāti ge hōhe, o kha ge ǁî ǀgamkha hoakha ǂgāhaib ai ge ǂgāmâihe, tsîs ge ǁî ǃkhaisa ǁaeb di ǃnaeǃkhaidi ǃnâ gao-aob di ais aiǃâ ge xoahe.