Read Khoekhoegowab Esters 3 Bible Online

Esters 3 - Khoekhoegowab bible

Esters 3

¹Nē ǃnaeǃkhaidi khaoǃgâb ge gao-aob Ahasveroba Hamanni, Hamedatab ôab, Agagiǁîba, ge kaikai, tsîb ge ǀgapiǀgapi bi tsî ǂnû-aiǃnaos âba gaosagu, ǁîb ǀkha hâgu hoagu dis ǂamai ge mâi.

²Tsî gao-aob ǃgāgu, ǁîb ǁāb ǃnâ hâgu hoagu ge ǃgamǃgâ tsî ge ǁnāǁgoe Hamanni aiǃâ, gao-aob ge ǁnāti ǁîb ǂama mîmā xui-ao, xawe Mordekaib ge ǃgamǃgâ tsî ǁnāǁgoe tama ge i.

³ǃNubai gu ge gao-aob ǃgāgu, gao-aob di ǁāb ǃnâ hâga Mordekaib ǃoa ge mî: Tare xū-i ǃaromats ra satsa gao-aob di mîmāsa ǃûǂam?

⁴Tsî i ge ge ī, ǁî ǃkhaisa gu ge tsēsa xu tsēs ǃoa ǁîb ǃoa mîo, tsî ǁîgab ge ǁnâu tama io, o gu ge ǁîsa Hamanna ge ǂanǂan, mû gu nîga, ise di Mordekaib di mîde nî mâ ǃkhaisa, Jodeǁîb a ǃkhaisab ge ǁîga ǂanǂan xui-ao.

⁵Tsî Hamanni ge mûo, Mordekaib ǃgamǃgâ tsî ǁîb aiǃâ ǁnāǁgoe tama ǃkhaisa, ob ge Hamanna kaise ge ǁaixa.

⁶Xaweb ge ǁî ǃkhais, Mordekaib ǀguib aib nî ǃomma ǁguisa ge ǃharaxū, Mordekaib di ǁaes xan ge ǁîba ge ǁgau xui-ao, ob ge Hamanna ge ôa-am, Jodeǁîn Ahasverob di gaosis hoas ǃnâ hân hoan, ǁnān ge Mordekaib khoena, ǁînab nî hîkākā ǃkhaisa.

⁷ǂGuro ǁkhâb, ǁnāb ge ǁkhâb Nisanni ǃnâ, disiǀgamǀaǁî kurib gao-aob Ahasverob dib ǃnân ge Pursa ge ao, ǁnās ge ǀkhūsa, Hamanni di ais aiǃâ tsēsa xu tsēs ǁga, ǁkhâba xu ǁkhâb ǁga, disiǀgamǀaǁî ǁkhâb, ǁnāb ge ǁkhâb Adari dib kōse.

⁸Hamanni ge gao-aob Ahasverob ǃoa mî xui-ao: ǀGui ǁae-i ǀgui-i ge hâ sa gaosis di ǃhūǃâdi hoadi di ǁaedi ǃnâ ǀgaru tsî ǁaeǁaesen hâ-e, tsî ǂhanugu ân ge ǁaedi hoadi di ǂhanuga xu a ǃkharaga, tsîn ge ǁkhāti gao-aots di ǂhanuga dī tama hâ; ǁnā-amaga i ge gao-aotsa anuba tama hâ ǁînats nî ǁnāti hâ kaisa.

⁹Îts ǁnâi gao-aots ga ǁnāti ǃgâibaheo, xoa kai în hîkākāhe, o ta ge tita disiǀoadisi talende ǀhaiǀurib xa nî ǀnōǁnâba, ǁnāgu sîsenna ra dīgu ǃomǁae, î di gao-aots di ǁuigu ǃnâ ūsīhe.

¹⁰ǃNubaib ge gao-aoba ǁîb di ǀkhunuǂnûidasa ǃommi âba xu ǂgaeǁnâ tsî Hamanni, Hamedatab ôab, Agagiǁîb, Jodeǁîn di mâǃoasabeba ge mā.

¹¹Ob ge gao-aoba Hamanni ǃoa ge mî: ǁNā ǀhaiǀuribats ǀkhaehe tsî ǁnā ǁaes on, îts ǁîn ǀkha dī, sa mûǁae i a ǃgâi khami.

¹²ǃNubai gu ge gao-aob di xoa-aoga ge ǂgaihe ǂguro ǁkhâb ǃnâ, ǁnā ǁkhâb di disiǃnonaǀaǁî tsēs ai, tsî i ge ge xoahe, Hamanni ge mîmān hoan ǁga ǃāǃkhōmâi-aogu gao-aob digu ǃoa tsî ǃhūǃkhōmâi-aogu mâ ǃhūǃâs hoas ǂama hâgu ǃoa tsî gaosagu mâ ǁaes hoas digu ǃoa, mâ ǃhūǃâs hoas ǁîs di xoa-ai-i ǃnâ tsî mâ ǁaes hoas ǁîs di gowab ǃnâ. Tsî i ge gao-aob Ahasverob di ǀons ǃnâ ge xoahe, tsî i ge gao-aob di ǀkhunuǂnûidas ǀkha ge ǂganamǀgaiǀgaihe.

¹³Tsî ǂkhanidi ge sîsabegu ǀkha ge sîhe gao-aob di ǃhūǃâdi hoadi ǃoa, în Jodeǁîn hoana hîǀhuruhe tsî ǃgamhe tsî hîkākāhe ǂkhamna xu kairan kōse, ǂkhari ǀgôaron tsî taradi tsîna, ǀgui tsēs ǀguis ai disiǃnonaǀaǁî tsēs disiǀgamǀaǁî ǁkhâb, ǁnāb ge ǁkhâb Adari dis ai, în ǁkhâuǁnâxūn âna ūǀhanahe.

¹⁴ǃKhōǂgās xoas dis ge ǂhanub ase nî māhe ǃhūǃâdi hoadi ǃnâ tsî ǂhaisase ǁaedi hoade nî ǂanǂanhe, în ǁnā tsēs ǁkhās ai ǂhomisen hâse hâ.

¹⁵O gu ge sîsabega gao-aob di mîs xa ǃhaeǃhaehe hâse ge ǂoa, tsî ǂhanub ge ǁaposa ǃkhais Susas ǃnâ ge māhe. Tsî gao-aob tsî Hamanni tsîkha ge ǂnôa gere ā, xawe ǃās Susas ge ge ǃhurigâ.