Read Khoekhoegowab Esters 4 Bible Online

Esters 4 - Khoekhoegowab bible

Esters 4

¹Mordekaib ge ī gon hoana ǂano, ob ge Mordekaiba saran âba ge ǀkhauǃā, tsîb ge ǁhō-e ge ana tsaob ǀkha, tsîb ge ǃās di ǁaegub ǃnâ ǂoa tsî au ǃau-i ǀkha ge ǂgai.

²Tsîb ge gao-aob di ǁāb aiǃâs kōse ge sī, khoe-i ǁhō-e anasen hâ-i xare-i ge gao-aob di ǁāb ǃnâ ǂgâ ǁoa i xui-ao.

³Tsî mâ ǃhūǃâs hoas tsî mâ ǃkhais hoas, gao-aob di mîs tsî ǁîb di ǂhanub ge sīs tawa i ge kai ǃoa-e Jodeǁîn ǃnâ ge hâ, ǂûtamahâs tsî ās tsî ǃhausens ǀkha. ǂGuin ge ǁhōgu tsî tsaob tsîn ǃnâ ge ǂnôa i.

⁴ǃNubai di ge Esters di ǂkhamkhoedi tsî ǁîs di omǃoabasabegu tsîna hā tsî ǁî ǃkhaisa ge ǂanǂan si, os ge gao-aosa kaise ge tsûaǂgao, tsîs ge sarana ge sî, Mordekaib nî ǁîna anaga, tsî ǁhōb âb nî ǁîba xu ūǁnâhega, xaweb ge ǁîna ǃkhōǃoa tama ge i.

⁵ǁGoasis ge Estersa Hataxi, gao-aob omǃoabasabegu di ǀguib, ǁîsab ge mâibaba ǂgai tsî ǁîba mîmā-e ge mā Mordekaib ǁga, ǂans nîga, tare-i a tsî tare xū-i ǃaromas a ǃkhaisa.

⁶Ob ge Hataxa Mordekaib ǃoa ge ǂoa ǃās di daob, gao-aob di ǁāb aiǃâ hâb ai.

⁷Ob ge Mordekaiba ǁîb ǂama go hā xūn hoana ge ǂanǂan tsî ǁnā ǀhaiǀurib, Hamanni ge gao-aob di ǁhōdi ǃnâb nî ǀnōǀnō ǃkhaisa mîb xa Jodeǁîn ǂama, ǁîn nî hîkākāhese.

⁸Tsîb ge ǁîba xoaǁnâs, ǁnā xoahe hâ ǂhanub, Susas tawa ge māheb disa ge mā, ǁîn nî hîkākāhe, ti ra mîsa, ǁîsab nî Estersa ǁgau tsî ǂanǂan tsî mîmā si ǃkhaisa, gao-aob ǃoa ǃgû tsîs nî ǁîba ǀkhomaba ǃkhaisa tsî ǁaes âsas nî ǂgaoǀkhāba ǃkhaisa.

⁹Ob ge Hataxa hā tsî Estersa Mordekaib di mîde ge ǂanǂan.

¹⁰ǃNubais ge Estersa Hataxi ǃoa ǃhoa tsî mîmā-e ge mā bi Mordekaib ǃoa:

¹¹ǃGāgu gao-aob digu hoagu tsî gao-aob ǃhūǃâdi di ǁaes tsîn ge a ǂan, mâ-i hoa-i, gao-aob tawa ga ǃnāb ǃnâ hâ ai-ommi ǃnâ ǂgâ-i, ǂgaihe tama hâ-i, aob kas, taras kas hoasa, ǁî-e i ge ǀgui ǀgoraǃgâ-i ǀgui-e hâba, ǃgamhe i nîsa, gao-aob ga ǃhuniǀurigaohaisa ǀhōǀî i tama io, ûi i nîga; xawe tita ge nēsi ǃnonadisi tsēdi kōse ǂgaihe tama hâ, gao-aob tawa ta nî sīse.

¹²On ge Esters di mîde Mordekaiba ge ǂanǂan.

¹³Ob ge Mordekaiba ge mî în Estersa ǁkhawa mîba: Tā ǂâi, sa ǀoms ǃnâ, sas nî gao-aob ommi ǃnâ nau Jodeǁîn hoan ǃgâ-ai ûi ǃkhaisa.

¹⁴Nē ǁaeb ǁkhāb ais ga sasa ǃnōǃario, on kom Jodeǁîna ǀkhara ǃkhai-e xu khoakhoas tsî ores tsîra xa nîra hābaheo, xawe sas tsî sa îb di ommi din tsîdu kom nî ǁōo, tsî tari-e a ǂan, ises sasa, nē ǁaeb i khami nē gaosis ǃnâ sī tama ǃkhaisa?

¹⁵ǃNubais ge Estersa ge mî, Mordekaiban nî ǁkhawa mîba ǃkhaisa:

¹⁶ǃGû îts Jodeǁîn, Susas tawa ra hōhena ǀhaoǀhao, î du tita ǂûtama hâba, î du tā ǂû tsî ā ǃnona tsēdi ǃnâ, tsuxubas kas tsēas kas hoasa. Tita tsî ǀgôadi âtadi tsîse ge ǁkhāti ǁnās ǁkhās xase ǂû tama nî hâ xuige. Nēti ta ge tita gao-aob tawa nî ǂgâ, ǂhanub ǃoa tamas a xawe; ǁō ta kao, o ta nî ǁō.

¹⁷ǃNubaib ge Mordekaiba ǃgû tsî Esters ge ǁîba mîmān hoana ge dī.