Read Khoekhoegowab Esters 5 Bible Online

Esters 5 - Khoekhoegowab bible

Esters 5

¹Tsî i ge ǃnonaǁî tsēs ai ge ī, Esters ge gao-aosi sara-e ǂgaeǂgā tsî gao-aob ai-ommi di ǃnāb ǃnâ gao-aob ommi ǃoa-ai sī mâ ǃkhaisa; tsî gao-aob ge gao-aosi trons âb ai ge ǂnôa i, gao-aob ommi ǃnā-oms di ǁāb aiǃâ.

²Tsî i ge ge ī, gao-aob ge gao-aosa ai-ommi ǃnâs mâ ǃkhaisa mûo, os ge ǀkhomma ge hō ǁîb mûǁae, gao-aob ge ǃhuniǀurigaohais, ǁîb ǃomǁae hâsa Estersa ge ǀhōǀîs kōse, os ge Estersa ǀgū tsî gaohaisa ge tsâǀkhā.

³Ob ge gao-aoba ǁîs ǃoa ge mî: Tare-es ra ǂgao, gao-aos Esterse? Taresa sa ǂgansa? Māhes ge nî gaosis di ǃkhareb kōse i ga ī xawe.

⁴Os ge Estersa ge mî: Gao-aots ga ǃgâibaheo, ats ǁnâi Hamanni ǀkha nētsē ǁnā ǂûǁaes ǁîba ta go ǁāǁābas tawa hā.

⁵Ob ge gao-aoba ge mî: Hamanna ǃhaeǃhae, îb Esters di mîmāsa dī. Tsî Hamanni tsî gao-aob tsîkha ge ǁnā ǂûǁaes, Hamannas ge ǁāǁābas tawa hāo,

⁶ob ge gao-aoba ǂûǁaes ǂauxûib dis ai Esters ǃoa ge mî: Taresa sa ǂgansa, māhes ge nî, tsî taresa ǀkhomabasens âsa? Dībahes ge nî, gaosis di ǃkhareb kōse i ga ī xawe.

⁷Os ge Estersa ǃeream tsî ge mî: Ti ǂgans tsî ǀkhomabasens ge nēsa:

⁸ǀKhomma ta ga gao-aots mûǁae hō hâo, tsî gao-aots ga ǃgâibaheo, ti ǂgansa mā tesa tsî ti ǀkhomabasensa dīsa, îts ǁnâi gao-aotsa Hamanni ǀkha hā ǁnā ǂûǁaes, ǁîba ta nî ǁāǁābas tawa, o ta ge ǁari gao-aots di mîmāsa nîra dī.

⁹ǃNubaib ge Hamanna ǁnātsē ǃgâiaǂgao tsî ǃgâiǂâi hâse ge ǂoa; xawe Hamanni ge Mordekaib gao-aob di ǁāb ǃnâ ǂnôa, tsî ǁîb aiǃâ khâi tama i ǁîb aiǃâ gon tama i ti ī ǃkhaisa mûo, ob ge Hamanna Mordekaib ǂama ǁaib xa ge ǀoa.

¹⁰Xawe Hamanni ge ge ǁkhaesen, tsî oms âb tawab ge sīo, ob ge sî tsî ǀhōsan âba ge hā kai tsî Seres, ǁîb di taras tsîna.

¹¹Tsî Hamanni ge ǁîna ǂkhaisib ǃkhūsib âb dib tsî ǂguisib ǀgôagu âb dib xa tsî gao-aob ge ǁîn ǃnâ kaikai bi xūn xa tsî mâ xū-i ǀkhab gaosagu tsî gao-aob di ǃgāgu ǂamai ǀgapiǀgapi bi hâ ǃkhais xa ge ǃhoaba.

¹²ǃAruǀîb ge Hamanna ge mî: ǁKhātis ge gao-aos Estersa ǀnî khoe-i xare-e ǁnā ǂûǁaes hîas go ǁāǁās tawa sī kai tama hâ, tita ǀguita, tsî ta ge ǁkhāti ǁari ǁîs xa gao-aob ǀkha ǁkhauhe hâ.

¹³Xawe nēn hoan ge hui te tama hâ, ǁnā Jodeǁîb Mordekaiba ta gao-aob di ǁāb ǃnâ ǂnôase ra mû ǁaeb kōse.

¹⁴ǃNubais ge taras âb Seresa ǁîb tsî ǁîb di ǀhōsan hoan ǃoa ge mî: A-i ǂgāhai-e dīhe, korodisi ǂhâgu kōse ǀgapi-e, îts ǁari gao-aoba mîba, Mordekaib nî ǁî-i ai ǂgāmâihe ǃkhaisa, ǁnās khaoǃgâ gao-aob ǀkha ǃgâiaǂgao hâse ǂgâ ǁnā ǂûǁaes ǃnâ. Nē ǀapes ge Hamanna ge ǃgâiba i, tsîb ge ǂgāhaiba ge dī kai.