Read Khoekhoegowab Esters 8 Bible Online

Esters 8 - Khoekhoegowab bible

Esters 8

¹ǁNā tsēs ǁkhās aib ge gao-aob Ahasveroba gao-aos Estersa Hamanni, Jodeǁîn khākhoeb di omsa ge mā, tsî Mordekaib ge gao-aob di ais aiǃâ ge hā, Esters ge matib a ǁîs di ǃkhaisa ǂanǂan xui-ao.

²Ob ge gao-aoba ǁîb di ǀkhunuǂnûidas, Hamanna xub go ūsa ūǁnâ tsî Mordekaiba ǁîsa ge mā. Tsî Esters ge Mordekaiba Hamanni di ommi ǂama ge mâi.

³Tsî Esters ge ǃaruǀî gao-aob di ais aiǃâ ge ǃhoa, tsîs ge ǁîb ǂai-am ge ǁnāǁgoe, tsî ge ā, tsîs ge ǁîba ge ǀkhoma, îb Hamanni, Agagiǁîb di ǂkhabasib tsî ǁîb di ǂâibasens, Jodeǁîn ǃoagub ge ǂâibasensa ūbē.

⁴Ob ge gao-aoba ǃhuniǀurigaohaisa Estersa ge ǀhōǀî. ǃNubais ge Estersa khâi tsî ge sī mâ gao-aob di ais aiǃâ.

⁵Tsîs ge ge mî: Gao-aots ga ǃgâibaheo, tsî ǀkhomma ta ga sa aiǃâ hō hâo, tsî nē ǃkhais ga gao-aots aiǃâ ǂhanuse īo, tsî tita ga ǃgâiba tsio, ǁnâi xoa kai re, î di Hamanni, Hamedatab ôab, Agagiǁîb di ǂkhanidi tsî ǂâis tsîna ǂgaidawahe ǁîn hîab ge xoana Jodeǁîn, gao-aots di ǃhūǃâdi hoadi ǃnâ hân nî ǃgamhese.

⁶Mati ta kha ǁnâi ǁnā ǂkhabab, ti ǁaes ǂama nîra hāba nî mûǃhara ǁkhā? Tsî mati ta kha ǁnâi kāǁōs ti ǃhaos disa nî mûǃhara ǁkhā?

⁷ǃNubaib ge gao-aob Ahasveroba gao-aos Esters tsî Mordekaib, Jodeǁîb, tsîra ǃoa ge mî: Mû oms Hamanni disa ta ge Estersa ge mā, tsî ǁîban ge ǂgāhaib ai ge ǂgāmâi, ǃommi âbab ge Jodeǁîn tawa ǁgui amaga.

⁸Î ro saro ǁnâi Jodeǁîn ǃoa saro a ǃgâiba khami xoa gao-aob di ǀons ǃnâ, î ro ǁîsa gao-aob di ǀkhunuǂnûidas ǀkha ǂganamǀgaiǀgai; gao-aob di ǀkhunuǂnûidas ǀkha ǂganamǀgaiǀgaihe hâs, ǁîs a ūdawahe ǁoa xui-ao.

⁹ǃNubai gu ge gao-aob di xoa-aoga ǁkhā ǁaeb ai ge ǂgaihe ǃnonaǁî ǁkhâb ǃnâ, ǁîb ge ǁkhâb Sivanna, ǀgamdisiǃnonaǀaǁî tsēs ǁîb dis ai, tsîn ge Mordekaib ge mîmān hoana ge xoahe Jodeǁîn ǃoa tsî ǃāǃkhōmâi-aogu ǃoa tsî ǁnā ǃhūǃâdi Indiaba xu Etiopiab kōse ra sīdi, ǀguikaidisiǀgamdisihûǀa ǃhūǃâdi di ǂamsagu ǃoa, mâ ǃhūǃâs hoasa ǁîs di xoas ǃoa tsî mâ ǁaes hoas di gowab ǃnâ, tsî Jodeǁîn on ǃoa ǁîn di xoas ǃnâ tsî ǁîn gowab ǃnâ.

¹⁰Tsîn ge gao-aob Ahasverob di ǀons ǃnâ ge xoa, tsî gao-aob di ǀkhunuǂnûidas ǀkha ge ǂganamǀgaiǀgai, tsî ǂkhanide sîsabegu, hāǃgapi-aogu ǀkha ge sî, ǃhae ǃnaidi ai ra ǃgapiǃâ, hā-eseln hādi xa ôahe hân ai:

¹¹Gao-aob ra Jodeǁîn, mâ ǃās hoas ǃnâ hâna ǀhûsa mā-am ǃkhaisa, tsîn ûib âna mâba ǁkhā ǃkhaisa, în hîkākā, în ǃgam, în kā, kai ǀgaib ǁaes dib hoab tsî ǁnā ǃhūǃâs, ǁîna ra ǂōǂōs dib, ǂkhari ǀgôaron tsî ǀgôadi tsîna, în ǁîn di ǁkhâuǁnâsa ū, ti.

¹²ǀGui tsēs ǀguis ais ge nēsa nî ī ǃhūǃâdi gao-aob Ahasverob didi hoadi ǃnâ, disiǀgamǀaǁî ǁkhâb (ǁnāb ge Adar ǁkhâba) di disiǃnonaǀaǁî tsēs ai.

¹³ǃKhōǂgās nē xoas dis ge nēsa: ǂHanu-e a-i māhe ǃhūǃâdi hoadi ǃnâ, ǁaedi hoadi nî ǂanǂanhe-e, în Jodeǁîna ǁnātsē ǂhomisen, în khākhoen âna ǀkhao, ti.

¹⁴O gu ge sîsabegu ǃhae ǃnaidi tsî hā-eseln ai ra ǃgapiga ǃhaese ge ǂoa, gao-aob di mîs xa ǃhaeǃhaehe hâse. Tsî nē ǂhanub ge ǁaposa ǃkhais Susas dis ai ge māhe.

¹⁵Tsî Mordekaib ge gao-aob di ais aiǃâba xu ge ǂoa ǀhomǂhoa tsî ǃuri gao-aosi sarab ǃnâ tsî kai ǃhuniǀurikrons ǀkha tsî ǀui line tsî purpurǂamsarab ǃnâ, tsî ǃās Susas ge dâ tsî ge ǃgâiaǂgao.

¹⁶Jodeǁîn tawab ge ǃnâb tsî ǃgâiaǂgaob tsî ǃgôasib tsîna ge hâ i.

¹⁷ǁKhāti mâ ǃhūǃâs hoas ǃnâ tsî mâ ǃās, gao-aob di mîs tsî ǁîb di ǂhanub tsîra ge ǁîs tawa sī ǃkhais hoas ǃnâ, ǁnāpan ge ǃgâiaǂgaob tsî dâb tsî ǂûǁaedi tsî ǃgâiǃgâisen tsēdi tsîna Jodeǁîn tawa ge hâ, tsî ǂguin ǁnā ǃhūb ǁaedi din ge ge Jodeǁî kai, Jodeǁîn di ǃaob ge ǁîn ai ǁnā xui-ao.