Read Khoekhoegowab Esters 9 Bible Online

Esters 9 - Khoekhoegowab bible

Esters 9

¹Tsî disiǀgamǀaǁî ǁkhâb, ǁnāb ge ǁkhâb Adari ǃnâ, disiǃnonaǀaǁî tsēs âb ai, gao-aob di mîs tsî ǁîb di ǂhanub, ǁîs ai nî dīǂuihes ai Jodeǁîn di khākhoen ǁîna nî dā, ti ge ǂâi tsēs ai i ge ge dawaǃkhunisen, tsîn ge Jodeǁîna ǁkhansaben âna ge dā.

²Jodeǁîn ge ǁîn di ǃādi ǃnâ ǀhû xui-ao, gao-aob Ahasverob di ǃhūǃâdi hoadi ǃnâ, ǁnān, kāǁōs âna ra ôa-amn tawan nî ǃomma ǁguiga, tsî khoe-i xare-i ge ǁîn aiǃâ mâ ǁoa ge i, ǁnā ǁaedi hoadi ge ǃhurib ân xa hāǂamhe xui-ao.

³O gu ge ǃhūǃâdi di ǂamsagu hoagu tsî ǃāǃkhōmâi-aogu tsî ǃhūǃkhōmâi-aogu tsî ǁnāgu, gao-aob di sîsenna ra dīga Jodeǁîna ge ǀgapiǀgapi Mordekaib di ǃaob xa gu ge hāǂamhe xui-ao.

⁴Mordekaib ge gao-aob di ommi ǃnâ ge kai i, gommi âb ǃhūǃâdi hoadi ǃoa ge ǂoa amaga, ǁnā aob Mordekaib ge ǃaruǀîǀgui kai xui-ao.

⁵On ge Jodeǁîna ǁîn di khākhoen hoana kai ǂnaus gôab dis tsî ǃgams dis tsî hîkākās dis ǀkha ge ǂnau, tsîn ge ǁkhansaben âna ǁîn di ǃgâi ǂâis ǃoa ge dī-ū.

⁶Tsî ǁaposa ǃkhais Susas dis ǃnân ge Jodeǁîna korokaidisi khoega ǃgam tsî ge hîkākā.

⁷Parsandatab, Dalfonni, Aspatab,

⁸Poratab, Adaliab, Aridatab,

⁹Parmastab, Arisaib, Aridaib tsî Vaisatab tsîga,

¹⁰ǁnā disi ǀgôagu Hamanni, Hamedatab ôab, Jodeǁîn khākhoeb digan ge ge ǃgam, xawen ge ǃommi âna ǁkhâuǁnâs tawa ǁgui tama ge i.

¹¹ǁNā tsēs ǁkhās ais ge ǃgôab ǁaposa ǃkhais Susas ai ge ǃgamhen diba gao-aob aiǃâ ge sī.

¹²Ob ge gao-aoba gao-aos Esters ǃoa ge mî: Susas ǁaposa ǃkhais tawan ge Jodeǁîna korokaidisi aogu tsî disi ǀgôagu Hamanni digu ona go ǃgam, tare-en nau ǃhūǃâdi gao-aob didi ǃnâ dī hâ? Xawe tare-e nēsi sas ra ǂgan-e? Māhes ge nî. Taresa sa ǀkhomabasensa ǃaruǀî? Dīǀoaǀoabahes ge nî.

¹³ǃNubais ge Estersa ge mî: Gao-aots ga ǃgâibaheo, an ǁnā Jodeǁîn, Susas tawa hâna nētsēs di mîmās ǃoa dīsa mā-amhe, î gu ǁnā disi ǀgôagu Hamanni diga ǂgāhaib ai ǂgāmâihe.

¹⁴ǃNubaib ge gao-aoba ǁnāti nî dīhe ǃkhaisa ge mîmā, tsî Susas tawas ge mîmāsa ge māhe, on ge Hamanni di ôaga ge ǂgāmâi.

¹⁵Tsî Jodeǁîn, Susas tawa hân ge ǁkhāti disihakaǀaǁî tsēs ǁkhâb Adari dis ai ǀhû tsî Susas tawa ǃnonakaidisi aoga ge ǃgam, xawen ge ǃommi âna ǁkhâuǁnâs ai ǁgui tama ge i.

¹⁶Tsî nau Jodeǁîn, gao-aob di ǃhūǃâdi ǃnâ hân ge ge ǀhû, ǁîn di ûiban nî mâbase, tsî sâban nî ūhâse khākhoen âna xu, tsîn ge ǁkhansaben ân ǃnâ hûdisikoroǀaǀoadisina ge ǃgam, xawen ge ǃommi âna ǁkhâuǁnâs ai ǁgui tama ge i.

¹⁷Disiǃnonaǀaǁî tsēs ǁkhâb Adari dis ais ge nēsa ge ī, tsî disihakaǀaǁî tsēs ǁîb dis ain ge ge sâ, tsîn ge ǁîsa ǂûǁaes tsî dâb di tsēse ge dī.

¹⁸Tsî Jodeǁîn, Susas tawa hân, ge disiǃnonaǀaǁî tsēs ǁkhâb dis ai ge ǀhû tsî disihakaǀaǁî tsēs ai, tsîn ge disikoroǀaǁî tsēs ai ge sâ, tsîn ge ǁnā tsēsa ǂûǁaes tsî dâb di tsēse ge dī.

¹⁹ǁNā-amagan ge Jodeǁîn, ǃhaidi din, ǃhūb di ǃâdi ǃnâ ǁan hâna disihakaǀaǁî tsēs ǁkhâb Adari disa dâb tsî ǂûǁaes tsî ǃgâiaǂgaoxa tsēse ge dī tsî ǀkhaexūna sîbagus dise.

²⁰Tsî Mordekaib ge nē ǃnaeǃkhaide ge xoamâi, tsîb ge ǁnā Jodeǁîn, gao-aob Ahasverob di ǃhūǃâdi hoadi ǃnâ hân hoana ǂkhanide ge sîba, ǁnān ǀgūse hân tsî ǃnūse hân tsîna,

²¹ǁînab nî ǂnûiǁapoǁapose în disihakaǀaǁî tsēs ǁkhâb Adari disa tsēdī, tsî disikoroǀaǁî tsēs ǁîb dis tsîra kurikorobe.

²²Jodeǁîn ge ǁîra ǃnâ khākhoen âna xu sâ tsēra ase, tsî ǁkhâb Adari, ǃoaba xu ǃgâiaǂgaob ǃnâ tsî ǃhausensa xu ǃgâiǂgaoxasib ǃnâ ge ǀkharaǀkharahe ǁkhâb ase, în ga ǁnā tsēra ǂûǁaedi tsî dâb tsî ǀkhaexūna sîbagus tsî ǀgâsana ǀkhaexūna mās di tsēse tsēdīse.

²³Tsî Jodeǁîn ge dītsoatsoan ge xūn, Mordekaib ge ǁîna xoabana ge ǃkhōǃoa, dīn nîse.

²⁴Hamanni, Hamedatab ôab, Agagiǁîb, Jodeǁîn hoan di khākhoeb ge Jodeǁîn ǃoagu ǂâibasen hâ i xui-ao, ǁînab nî ǃgamse; tsî Purs, ǁnās ge ǀkhūsab ge ao xui-ao, ǁînab nî hîkākā tsî ǁînab nî ǃgamse.

²⁵Xawe gao-aob aiǃâs ge ǁî ǃkhaisa sīo, ob ge ǂkhanidi ǀkha ge mîmā, as ǁîb di ǂkhaba ǂâis, Jodeǁîn xab ge ǂâisa ǁîb di danas ǂûs ai oahā ti, o gu ge ǁîb tsî ǁîb ôagu ona ǂgāhaib ai ge ǂgāmâihe.

²⁶ǁNā-amaga ra ge ǁnā tsēra Purim ti ra ǂgaihe Purs di ǀons ǃoa. ǁNā ǂkhanis di mîdi ǃaroma tsî ǁî-aitsaman ge ǁîs xa mûn tsî ǁîn tawa ge hān ǃaroma,

²⁷ǃkhais ǃaroman ge Jodeǁîna ǁapoǁapo tsî ǁîn ai ge ū, ǁîn tsî ǁîn surib tsî ǁîna ga ǁaeǁaesen khoen hoan ai ǁî ǃkhais ǃûǂamhe tidesa, nē ǀgam tsēra nî tsēdīhesa aixoas âra ǃoa tsî mîmâihesa ǁaeb âra ai kurikorobe.

²⁸Nē tsēra xa nî ǂâihe tsî ra nî tsēdīhese mâ ǃhaos hoas ǃnâ tsî mâ ommi din hoan ǃnâ tsî mâ ǃhūǃâs hoas ǃnâ tsî mâ ǃās hoas ǃnâ. Tsî nē tsēra Purims dira Jodeǁîn ǃnâ ǃûǂamhe tidese, tsî ǂâiǂâisens âra tātsē ǀuni tide surib ân tawase.

²⁹ǁNās khaoǃgâ ra ge gao-aos Esters, Abigaili ôas, tsî Mordekaib, Jodeǁîb tsîra ǀgaib hoab ǀkha ge xoa nē ǂkhanis, Purims disa ra nî ǀgamǁî ǃnās ai ǁapoǁapose.

³⁰Ob ge ǁnā ǂkhanide Jodeǁîn, ǀguikaidisiǀgamdisihûǀa ǃhūǃâdi Ahasverob di gaosis didi ǃnâ hân ǃoa ge sî, ǂkhîb tsî îǂhôasib tsîkha di mîdi ǀkha.

³¹ǁNā tsēra Purims diran ǁîra di mîmâihesa ǁaeb ai nî ǁapoǁapo ǃkhaisa, Mordekaib, Jodeǁîb ge ǁîna ǀgaiǀgais ase tsî Esters, gao-aos on, tsî ǁîn ge aitsama ǁîn tsî ǁîn di surib ai a ū khami, ǂûtamahâs tsî ǁîn di ǂgais di ǃkhaidi xa.

³²Tsî mîmās Esters dis ge nē Purims di ǃnaeǃkhaide ge ǀgaiǀgai, tsî di ge ǂkhani-i ǃnâ ge xoahe.