Read Khoekhoegowab Eksodus 1 Bible Online

Eksodus 1 - Khoekhoegowab bible

Eksodus 1

¹Nēdi ge ǀondi Israeli ôagu, Jakob ǀkha Egipteb ǃoa ge ǁgôaxagu dide; ǁîgu ge ge hā ǂgâxa, mâb hoaba ǁîb di ommi ǀkha:

²Rubenni, Simeonni, Levib tsî Judab;

³Isaskari, Sebulonni tsî Benjaminni;

⁴Danni, Naftalib, Gadi tsî Aseri tsîga.

⁵ǀOmdi, Jakob di ǂhoweba xu ge ǀkhīdi hoadi ge hûdisi ǀomde; tsî Joseb ge Egipteb ǃnâ ge hâ i.

⁶Tsî Joseb ge ǁō hâ io, tsî ǃgâsagu âb hoagu tsî ǁnā ǃhaos hoasa,

⁷on ge Israeli ôana ǂûǂûxaǃnâ tsî ǃnāǂamsase ge ǂguiǂguisen tsî îbe ge ǀgaisa, ǃhūb ge ǁîn xa ǀoas kōse.

⁸ǁNās khaoǃgâb ge ǀasa gao-aoba ge khâi Egipteb ǃnâ, Joseba ge ǀū iba.

⁹ǁÎb ge ǁaes âb ǃoa ge mî: Mû, ǁnā ǁaes Israeli ôan dis ge a ǂgui, ā ǁîn ge sada ǃgâ-ai a ǀgaisa.

¹⁰Hā, î da gā-aise ǁîna sîsenū în tā ǂguiǂguisen, î-i tā ī, toro-i ga hāo, în sada khākhoena tā ǁaeǁaesen în tā sada ǃoagu ǃkham, în tā ǃhūba xu doebē.

¹¹On ge sîsenǂamkhoega ǁîn ǂamai ge mâi, ǁîgu nî ǁîna ǁgâiǀāse ǀgaisa sîsenni âgu ǀkha, Faraob ra sâuǃāra ǂnubibahe amaga: Pitoms tsî Ramses tsîra.

¹²Tsî ǁaesa gu kaise ra ǁgâiǀā xawes ge ǃaruǀîǀgui ǂgui tsî ge ǀom tsî ge ǂguiǂguisen, Israeli ôan xan ge Egipteǁîna ǃaos kōse.

¹³On ge Egipteǁîna Israeli ôana karosase ge sîsen kai,

¹⁴ûiban ge ǁîna au-aubas kōse karosa ǃoabas ǀkha ǂgoab ǀkha tsî ǂgoaǀuidi ǀkha, tsî ǃhanab ai sîsenni hoab ǀkha, tsî ǁnā ǃoabas, hîan ge karosase ǁîna gere ǃoaba kais hoas ǀkha.

¹⁵ǁNās ǂamaib ge Egipteǁîn di gao-aoba ǂnûritarara Hebreǁîn dira ǀkha ge ǃhoa, ǀguis ge Sifras tsî naus ge Puas ti ge ǀon hâ i,

¹⁶tsî ge mî: Hebreǁîde ro ga ǁoras ǃnâ hui, tsî ǁoraǂnû-aixūs ai mûo, aore ǀgôab a ǃkhaisa, o ǃgam bi; tsî ǀgôas a ǃkhaisa, o as ûi!

¹⁷Xawe ǂnûritarara ge Eloba ge ǃao amaga ra ge dī tama, Egipteb di gao-aob ge ǁîra ǃoa mî khami, tsî ra ge aorega ge ûi kai.

¹⁸ǃNubaib ge Egipteb di gao-aoba ǂnûritarara ǂgai tsî ǁîra ǃoa ge mî: Tarexa ro nē ǃkhaisa go dī, aorega ro go ûi kaisa?

¹⁹O ra ge ǂnûritarara Faraob ǃoa ge mî: Hebreǁîdi Egipteǁî taradi khami ī tama amagas ge; ǁîdi kom a ǀgaisao, ǂnûritaras ǁîdi tawa sī tama hîa di kom ra ǁoratoao.

²⁰ǁNā-amagab ge Eloba ǂnûritarara ge ǃgâidī; tsî ǁaes ge ǂguiǂguisen tsî kaise ge ǀgaisa.

²¹O i ge ge ī, ǂnûritarara Eloba ra ǃao amagab ge ǁîba ǁîra suriba ge dība.

²²ǃNubaib ge Faraoba ǁîb di ǁaes hoasa mîmā tsî ge mî: ǀGôagu hîa ra ǃnaegu hoaga du ge Nylǃāb ǃnâ nî aoǂgā, xawe ǀgôadi hoade du ge nî ûi kai.