Read Khoekhoegowab Eksodus 10 Bible Online

Eksodus 10 - Khoekhoegowab bible

Eksodus 10

¹ǁNās khaoǃgâb ge ǃKhūba Moseb ǃoa ge mî: ǂGâ Faraob tawa, tita ge ǂgaob âba go karokaro, tsî ǃgāgu âb di ǂgaogu ona, nē saode ta nî ǁîn ǁaegu ǂnûiga,

²tsî sadu nî sadu ôan tsî sadu ôan di ôan di ǂgaedi aiǃâ ǃhoabase, Egipteb ǃnâ ta ge dī xū-e, tsî ti saodi, ǁîn ǁaegu ta ge ǂnûide, ǂan du nîse tita a ǃKhū ǃkhaisa.

³Nēti kha ge Moseb tsî Aronni tsîkha Faraob tawa ǂgâ tsî ǁîb ǃoa ge mî: Nētib ra ǃKhūb, Hebreǁîn di Eloba mî: Matikōsets kha ra ǂkhā ti ais aiǃâ ǃgamǃgamsensa? Ti ǁaesa doe kai, îs tita ǃoaba!

⁴Ti ǁaesa doe kaisats ga ǂkhāo, mû, o ta ge tita ǁari ǂhomna nîra ūhā sa ǃhūb ǀkharib ǃnâ.

⁵On ge ǁîna ǃhūb di aisa nîra ǃgū-ai, ǃhūb nî mûhe ǁoas kōse; on ge ǃgau go xūna nî hapu, ǃnareb xa du ǃgaubahe tsî ǁnākhaobahe hâna; on ge ǁkhāti hain hoana nîra hapu, ǃaub ai du ra ūǀkhībahena.

⁶On ge sadu omga nîra ǀoaǀoa, tsî sa ǃgāgu di omgu hoaga, tsî Egipteǁîn hoan di omga: ǁÎn ge sadu îgu tsî sadu îgu di îgu tātsē mû tama hâ ge ina, ǁnā tsēs, ǁîs ai gu ge ǃhūbaib ai hâsa xu nētsēs kōse. Tsîb ge unusen tsî Faraoba xu ge ǂoa.

⁷O gu ge ǃgāgu Faraob diga ǁîb ǃoa ge mî: Mâ ǁaeb kōseb kha nēba ǁnoase nî ība da? A ge khoega doe kai î gu ǃKhūb, ǁîgu di Eloba ǃoaba! Ganupets xare ǂan tama hâ, Egipteb hîǀhuruhe hâsa?

⁸ǃNubai kha ge Moseb tsî Aronni tsîkha ǁkhawa Faraob ǃoa ge ūhāhe, tsîb ge ǁîkha ǃoa ge mî: ǃGû î du ǃKhūb, sadu Eloba ǃoaba! Tarina ǁnān ǃgû nîna?

⁹Ob ge Moseba ge mî: Sida ge nî ǃgû sida ǂkhamn tsî sida kaikhoen tsîn ǀkha, sida ôagu tsî sida ôadi ǀkha; sida gūn tsî sida goman tsîn ǀkha da nî ǃgû, kai tsē-i ǃKhūb di-e da nî ūhâ xui-ao.

¹⁰ǃNubaib ge ǁîkha ǃoa ge mî: ǃKhūb ab sadu ǀkha ǁnāti hâ, sadu tsî sadu ǂkham ǀgôarona ta nî doe kais ǁkhās axase; mûbasen, sadu ais aiǃâb ǂkhababa hâ xuige!

¹¹Ī tide ǃkhais, sa aogo ǁnâi ǃgû î go ǃKhūba sī ǃoaba; nēs ge ǂgan go hâsa! Tsî kha ge Faraob di aisa xu ge doeǁgaǂuihe.

¹²ǃNubaib ge ǃKhūba Moseb ǃoa ge mî: ǃOmmi âtsa ǀhōǂui Egipteǃhūb ǂama ǂhoms ǃaroma, în Egipteǃhūb ǂama hā, în ǃhūb di ǁhaona ǃû, ǃnareb xa ge ǃgauhe hâ in hoana.

¹³Ob ge Moseba ǀkharus âba Egipteǃhūb ǂama ge ǀhōǂui, ob ge ǃKhūba aiǂoas di ǂoaba ǁnā ǃhūb ǃnâ ge hā kai, ǁnā tsēs hoasa tsî ǁnā tsuxub hoaba; o i ge ǃnauǁgoaga ge i, aiǂoas di ǂoab ra ǂhomna ūhā ǃkhaisa.

¹⁴On ge ǂhomna Egipteǃhūb hoab ǂama hā tsî ge ǁgoe, Egipteǁîn di ǀkharigu hoagu ai, kaise ǂguise; nēti ī ǂhomn, ǁîn khami īn ge tātsē hâ tama ge hâ i, tsîn ge nēs khaoǃgâ ǁnāti īse hā tide.

¹⁵ǃHūb hoab di aisan ge ge ǃgū-ai, ǃhūb ge ǃkhaes kōse; on ge ǃhūb di ǁhaon hoana ge ǂûtoa, tsî haidi di ǂûn, ǃnareb xa ge ǃgauhe hâ ina; o i ge ǃam xū-i xare-e ǃgau tama ge i haidi ai tsî ǃaub di ǁhaon on ai Egipteǃhūb hoaragab ǃnâ.

¹⁶ǃNubaib ge Faraoba ǃhaeǃhaesen tsî Moseb tsî Aronni tsîkha ǂgai tsî ge mî: Tita ge go ǁore ǃKhūb, sakho di Elob ǃoagu tsî sakho ǃoagu.

¹⁷Î kho ǁnâi nē ǃnās ǀguis ai ti ǁoreba ǀûba te re, î kho ǀaexase ǀgoreba te re ǃKhūb sakho di Elob ǃoa, îb ǁnâi nē ǁōba tita xu ūbē.

¹⁸Ob ge Faraoba xu ǂoa tsî ǀaexase ǃKhūb ǃoa ge ǀgore.

¹⁹Ob ge ǃKhūba kaise ǀgaisa huriǂoas di ǂoaba ǁkhaehā tsî ǂhomna ūkhâi tsî ǂĀxahurib ǃnâ ge aoǂgā; ǀgui ǂhom-i xare-i ge ǃgau tama ge i Egipteb di ǃhūǀkharigu hoagu ǃnâ.

²⁰Xawe ǃKhūb ge Faraob di ǂgaoba ge karokaro, Israeli ôanab doe kai tidega.

²¹ǃNubaib ge ǃKhūba Moseb ǃoa ge mî: Sa ǃomma ǀhōǂui ǀhommiǀî, ob ge ǃkhaenaba nîra hā Egipteǃhūb ǂama, ǃkhaenab nî ǃkhōhe ǁkhās kōse.

²²Tsî Moseb ge ǃommi âba ǀhommiǀî ǀhōǂuio, os ge durutsuxusa ge hā Egipteǃhūb hoaragab ǃnâ, ǃnona tsēdi kōse.

²³O i ge nē-e nau-e mû tama ge i, tsî khoe-i xare-i ge ǁkhāti ǁî-i ǃkhaisa xu khâi tama ge i ǃnona tsēdi ǃnâ; xawe Israeli ôan hoan tawa i ge ǃnâsa ge i, ǁîn di ǁanǃkhaidi ǃnâ.

²⁴ǃNubaib ge Faraoba Moseba ǂgai tsî ge mî: ǃGû î du ǃKhūba ǃoaba, sadu di gūn tsî sadu di goman ǀguin ge nî ǃgorohe; ǁkhātin ge sadu di ôarona nî ǃgû sadu ǀkha.

²⁵Ob ge Moseba ge mî: Ots ge satsa ǁkhāti ǂāǁguibadi tsî khauǁguibadi tsîde sida ǃomǁae nî mā, ǃKhūb sida Eloba da nî ǁguibade.

²⁶ǁKhātin ge sida ǀgoana sida ǀkha nî ǃgû tsî ǀgui ǃū-i xare-i ge ǃgorohe tide, ǁîn xa da nî ū xui-ao ǃKhūb sida Eloba da nî ǃoabaga; sida a ǀū xui-ao, mâ xū-i ǀkha da ǃKhūb sida Eloba nîra ǃoaba ǃkhaisa, ǁnāpa da nî sīs kōse.

²⁷Xawe ǃKhūb ge Faraob di ǂgaoba ge karokaro; ob ge ǁîna doe kai ǂgao tama ge i.

²⁸Tsîb ge Faraoba ǁîb ǃoa ge mî: ǃGû tita xu! ǂAnbasen îts ǃaruǀî ti aisa tā ǁkhawa mû; ti aisats ga ǁkhawa mû tsēs hoas aits nîra ǁō xuige!

²⁹Ob ge Moseba ge mî: ǂHanusets go ǃhoa. Sa aisa ta kom ǁkhawa mû tideo.