Read Khoekhoegowab Eksodus 11 Bible Online

Eksodus 11 - Khoekhoegowab bible

Eksodus 11

¹ǃKhūb go Moseb ǃoa mî xui-ao: ǀGui ǁnora-aib ǀguiba ta ge tita Faraob ǂama tsî Egipteb ǂama nî hā kai, ǁnās khaoǃgâb ge sado nēpa xu nîra doe kai; hoaragaseb ga ǃgû kai duo, ob ge ǃhaese nēpa xu nîra doeǁgabē du.

²ǃHoa ǁnâi ǁaes ǂgaeǃnâ, îb mâ khoeb hoaba ǁîb di ǀgūkhoeb tawa, îs mâ khoes hoasa ǁîs di ǀgūkhoes tawa ǀhaiǀurisoadi tsî ǃhuniǀurisoade ǂganbasen.

³Ob ge ǃKhūba ǁaesa ǀkhomma ge mā Egipteǁîn mûǁae. ǁKhātib ge ǁnā aob Moseba kaise kai ge i Egipteǃhūb ǃnâ Faraob ǃgāgu di mûǁae tsî ǁaes mûǁae.

⁴ǃAruǀîb ge Moseba ge mî: Nētib ge ǃKhūba ge mî: Tsuxuǃgâb di ǁaeb ai ta ge tita Egipteba nîra ǃgûǃnâǃganu;

⁵o gu ge ǂguroǃnaesabegu Egipteb ǃnâ hâgu hoaga nîra ǁō, Faraob di ǂguroǃnaesabeb, trons âb ai ga ǂnû hâba xu ǃgās, ǁkhamis tawa ra hâs di ǂguroǃnaesabeb kōse, tsî mâ ǂguroǃnaesabegu ǀgoan digu hoagu tsîna.

⁶Os ge kai ǃausa nîra hâ Egipteǃhūb hoab ǃnâ, ǁîs khami īs tātsē hâ tama ge hâ i tsî ǁkhāti ǃaruǀî ǁnāti īse hâ tidesa.

⁷Xawe Israeli tawa i ge ari-i xare-e ǁî-i namsa gongon tide, khoena xu goman kōse; ǂan du nîga, ǃKhūb Egipteǁîn tsî Israelǁîn tsîn ǁaegu ǀgora-e ra dī ǃkhaisa.

⁸ǁNāǃnubai gu ge nē sa ǃgāgu hoaga ti tawa ǁgôaxa tsî nîra ǃhonǁgoa ti aiǃâ, mî raǃâ: Doeǂoa du re sats tsî ǁnā ǁaes satsa ra saos tsîdu hoado; tsî ǁnās khaoǃgâ ta nî ǂoa. Tsîb ge Faraoba xu ǀgaisa ǁaib ǃnâ ge ǂoa.

⁹Xawe ǃKhūb ge Moseb ǃoa ge ǃhoa: Faraob ge sakho ǁnâu tide, ti buruxa dīn nî ǂguise Egipteǃhūb ǃnâ, ti.

¹⁰Tsî Moseb tsî Aronni tsîkha ge nē buruxa dīn hoana Faraob di ais aiǃâ ge dī, xawe ǃKhūb ge Faraob di ǂgaoba ge karokaro, ob ge Israeli ôana ǁîb di ǃhūba xu doe kai tama ge i.