Read Khoekhoegowab Eksodus 12 Bible Online

Eksodus 12 - Khoekhoegowab bible

Eksodus 12

¹Tsîb ge ǃKhūba Moseb tsî Aronni tsîkha ǃoa Egipteǃhūb ǃnâ ǃhoa tsî ge mî:

²Nē ǁkhâb ǁkhāb ge sakho ǁkhâgu di danase nî ība; ǁîb ge ǁkhâgu kurib digu di ǂgurose nî ība du.

³ǃHoa ǀhaohâb Israeli dib hoab ǃoa î kho mî: Disiǁî tsēs nē ǁkhâb dis ai, ab mâb hoaba ǁkhaoba ūba ǁgûgu di omga, ǀgui ǁkhaoba ǀgui omma.

⁴Tsî ǀgui ommi ga ǁnā ǀgui ǁkhaoba ǂkharibao, a kha ǁîb tsî ǁîb di ǀgūkhoeb ommi âb ǀgūse hâb tsîkha ǁîba ūbasen, ǀomdi di ǀgaus ī khami, mâ-i hoa-i nî ǂû ǁkhās kōse, ǁkhaob ī khami du ge nî ǃgôa.

⁵Tsî du ge ūo ǁkhaoba nî ū, aoreb, ǀgui kurib â-ib, gūn xas kas, pirin xas kas hoasats ge ǁîba nî ū.

⁶Tsî du ge ǁîba nî sâu, disihakaǀaǁî tsēs nē ǁkhâb dis kōse, tsî mâ ǀhûs Israeli ǀhaohâb dis hoas ge ǁîba nî ǂā, ǁnā ǀgam ǃoera ǁaegu.

⁷On ge ǀaob xa ū tsî ǁîba dao-ams di ǃnamamhaikha tawa tsî ǀgapise hâb tawa nî ǂkhau, ǁnā omgu, ǁîgu ǃnân nî ǂû bigu tawa.

⁸On ge ǁgansa ǁnā tsuxub ǁkhāb ǃnâ ǀaes tawa amhe hâse nîra ǂû, ǀkhuruǀkhuruhe tama peregu ǀkha; au ǁharen ǀkhan ge nî ǂû bi.

⁹Orase du ge ǁîb xa ǂû tide, ǁkhāti ǁgam-i ǃnâ sâihe hâse tā ǂû bi; xawe ǀaes tawa amhe hâse, danas âba tsî tîra âba tsî ǃnāxūn âba.

¹⁰Tsî du ge ǁkhāti xū-e ǃgau tide ǁgoas kōse; tsî ǁgoas kōse ga ǁîb xa ǃgau-i, ǁî-e du ge ǀaes ǀkha nî khauǃkhū.

¹¹Tsî du ge nēti nî ǂû bi: Sadu kamanagu ge ǃgaehe hâse, sadu ǁharodi ge sadu ǂaidi tawa tsî sadu ǀkharus ge sadu ǃomǁae nî hâ; tsî du ge ǁîba ǃhaese nî ǂû; ǃKhūb di Pasxab komo.

¹²Tita ge nē tsuxub ǃnâ Egipteǃhūba nîra ǃgûǃnâǃganu tsî Egipteǃhūb ǃnâ hâ ǂguroǃnaesabegu hoaga nîra ǂnau, khoena xu ǀgoan kōse; tsî ta ge tita ǀgoraǃgâsa nîra hî, hoa elogu Egipteǁîn digu tawa, tita hîa ǃKhūta.

¹³Tsî ǁnā ǀaob ge sado saose nî ība, ǁnā omgu hîa du nî hâǃnâgu tawa, ǁnā ǀaoba ta ga tita mûo, o ta sado nîra ǃgû-īǀkhā xui-ao, tsî i ge ǁnora-ai-i xare-e sadu ǃnâ hâ tide ǁgaoǁgaosib ǃoa, Egipteǃhūba ta nîra ǂnau ǃnubai.

¹⁴Tsî nē tsēs ge sado ǂâiǂâisenxūse nîra ība, tsî du ge ǁîsa ǃKhūba kaitsēse nî tsēdība; ǁîsa du ge nî tsēdī, sadu di ǃhaodi ǃnâ, ǀamo ǂnûiǂgā-i ase.

¹⁵Hû tsēdi kōse du ge ǀkhuruǀkhuruhe tama perega nî ǂû; ǂguro tsēs ai du ge ǀkhuruǀkhurupereba nî dībē sadu di omga xu; ǀkhuruǀkhuruhe hâ-e ga ǂguro tsēsa xu hûǁî tsēs kōse ǂû-i hoa-i, ǁnā-i di ǀoms ge nî ǃhūǃnomahe Israela xu.

¹⁶Tsî ǂguro tsēs ai i ge ǃanu ǀhû-e nîra hâ; ǁkhāti du ge ǃanu ǀhû-e nî ūhâ hûǁî tsēs ai; sîsen-i xare-i ge ǁîs ai dīhe tide; xawe mâ ǀoms hoas xa nî ǂûhe-i, ǁî-i ǀgui-i ge sadu xa a ǁāǁāhe ǁkhā.

¹⁷Î du ǁnâi ǀkhuruǀkhuruhe tama perega ǃkhōǀgaipe, ǁnā tsēs ǁkhās ai ta ge tita sadu di ǂnubide Egipteǃhūba xu nîra ǂgaeǂguiǂui xuige; ǁnā-amaga du ge nē tsēsa nî ǃkhōǀgaipe sadu di ǃhaodi ǃnâ ǀamo ǂnûiǂgā-i axase.

¹⁸ǂGuro ǁkhâb di disihakaǀaǁî tsēs ǁkhâb dis ai du ge ǃuia ǀkhuruǀkhuruhe tama perega nî ǂû, ǁnā ǁkhâb di ǀgamdisiǀguiǀaǁî tsēs kōse ǃuia.

¹⁹Hû tsēdi kōse a-i ǀkhuruǀkhurupere-i xare-e tā hōhe sadu omgu ǃnâ; ǀkhuruǀkhuruhe hâ-e ga ǂû-i hoa-i di ǀoms ge Israeli di ǀhûsa xu nîra ǃhūǃnomahe xuige, ǃhaokhoe-i karao, ǃhūb ǃnaesabe-i karao.

²⁰Sadu ge xū-i ǀkhuruǀkhuruhe hâ-e ǂû tide; sadu di ǁanǃkhaidi hoadi ǃnâ du ge ǀkhuruǀkhuruhe tama perega nî ǂû.

²¹Ob ge Moseba Israeli kaigu hoaga ǂgai tsî ge mîǀî gu: ǃKhōǂuibasen î go ǁkhaoga sago omgu dina ūba î go Pasxaba ǂā.

²²Î go ǁnâi ǃgaeǀkharosa hisob xa ū î go ǁîba ǀaob, ǃore-i ǃnâ nî hâb ǃnâ ǂgobe; î go ǁnā ǀaob, ǃore-i ǃnâ nî hâb xa ǀgapise hâ haib dao-ams dib ai tsî ǃnamamhaikha ai ǂkhau ǁnā ǃores ǃnâ hâ ǀaob xa; xawe sadu xa i ge khoe-i xare-e ǁî-i ommi di dao-amsa xu ǂoa tide, ǁgoas kōse.

²³ǃKhūb nîra ǃgûǃnâǃganu xui-ao, Egipteǁînab nî ǂnause; xawe ǁîb ga ǁnā ǀaoba mûo, ǀgapise hâ haib dao-ams dib ai tsî ǃnamamhaikha tawa, ob ge ǃKhūba ǁnā dao-amsa nîra ǃgû-īǀkhā, tsîb ge ǁgaoǁgao raba mā-am tide, sadu omgu ǃnâb nî sīsa, ǂnau dub nîga.

²⁴ǁNā-amaga nē ǃkhaisa ǃkhōǀgaipe sadu tsî sadu di ôan tsîdo, ǂnûiǂgābahe du hâ xū-i ase ǀamosib kōse.

²⁵Tsî i ge nîra ī, ǁnā ǃhūb ǃKhūb nîra mā dub ǃnâ du ga sīo, ǁîb ge mî khami, o du ge nē ǃoabasa nîra ǃkhōǀgaipe.

²⁶Tsî i ge nîra ī, sadu di ôan ga sadu ǃoa mîo: Mâ ǃoaba-e du nēpa ūhâ?

²⁷O du ge nî mî: Pasxaǁguibas ǃKhūb dis ge nēsa, Egipteb ǃnâ Israeli omga ge ǃgû-īǀkhāba, Egipteǁînab ge gere ǂnau tsî sida omgab ge ǃnoraǃnora ǃnubai. ǃNubais ge ǁaesa ǃgamǃgâ tsî ge ǃhonǁgoa.

²⁸Tsî Israeli ôan ge ǃgû tsî ge dī, ǃKhūb ge Moseb tsî Aronni tsîkha mîmā khami, ǁnāti kha ge ge dī.

²⁹Tsî i ge tsuxuǃgâb ai ge ī, ob ge ǃKhūba ǂguroǃnaesabegu hoaga ge ǂnau Egipteǃhūb ǃnâ, ǂguroǃnaesabeb Faraob dib, trons âb ai ga ǂnû hâba xu ǃkhōsab, ǃkhō-oms ǃnâ hâb di ǂguroǃnaesabeb kōse, tsî ǂguroǃnaesabegu ǀgoan digu hoagu kōse.

³⁰Ob ge Faraoba tsuxuba ge khâi, ǁîb tsî ǁîb di ǃgāgu hoagu tsî Egipteǁîn tsîn hoana; tsî i ge kai ǃau-e ge hā Egipteb ǃnâ; ǀgui ommi ǁō hâ-i hâǃnâ tamab xareb ge hâ tama ge hâ i xui-ao.

³¹ǃNubaib ge ǁîba Moseb tsî Aronni tsîkha tsuxub ǃnâ ǂgai tsî ge mî: Khâi î kho doe ti ǁaes di ǁaeguba xu, sakho tsî Israeli ôan tsîdo; ǃgû î du ǃKhūba sī ǃoaba, sakho gere mî khami.

³²Î du ǁkhāti ūǃgû sadu gūn tsî sadu goman tsîna, sakho gere mî khami; ǃgû î du tita ona ǀkhae re!

³³Tsî Egipteǁîn ge ǁaesa kaise ge ǁgari, ǃhaesen nî ǁîna ǃhūba xu doeǁgaǂuise: Hoatsama da kom nî ǁō-o, ti mî tsî.

³⁴Os ge ǁaesa ǀâpereba, ǀkhuruǀkhuruhe tamab hâ hîa, peren ǃorede saran ân ǃnâ ǃgami hâse, ǃhōgu ân ai ge ūkhâi.

³⁵Tsî Israeli ôan ge Moseb di mîs ǃoa ge dī, tsîn ge Egipteǁîn tawa ge ǂgan ǀhaiǀurisoadi tsî ǃhuniǀurisoadi tsî saran tsîna.

³⁶ǁNās tawab ge ǃKhūba ǁaesa ǀkhomma ge mā, Egipteǁîn mûǁae, on ge ǁîna ǁîn di turaba ge dība; tsîn ge ǁîna Egipteǁîna ge ǀâǀhana.

³⁷Nētin ge Israeli ôana Ramsesa xu Sukots ǃoa ge dāǁnâ, ǁaupe ǃnanikaidisiǀoadisi khoegu ǀnūǃgû ra gu, aoregu ǀguigu ǀgôaron ose.

³⁸Tsî ǂgui ǁaukhoen ge ǁkhāti ǁîn ǀkha ge doeǃapa tsî gūn, goman tsî kaise ǂgui ǀgoan tsîna.

³⁹Tsîn ge ǀâpereb Egipteba xun ge ūhāb xa ǀkhuruǀkhuruhe tama amperega ge ǁgan, ǀkhuruǀkhuruhe tamab hâ xui-ao: Egipteba xun ge doeǁgaǂuihe amagan ge ǀhawe ǁoa tsî daob ǂûna ǁāǁābasen ǁoa ge i.

⁴⁰Tsî ǁaeb, Israeli ôan Egipteb ǃnâ ǁan hâ ge in dib ge hakakaidisi tsî ǃnonadisi kuri ge i.

⁴¹Tsî i ge ǁnā hakakaidisi tsî ǃnonadisi kurigu di ǀunis ai ge ī, ǁnā tsēs ǁkhās ai i ge ī, ǃKhūb di ǂnubidi ge Egipteba xu ǃgûǂoa ǃkhaisa.

⁴²Ob ge nē tsuxuba ǃKhūba ama ǂōrisase nî ǃkhōǀgaipebahe, Egipteǃhūba xub ge ǁîna ǂgaeǂguiǂui amaga; nēb ge tsuxub ǃKhūb dib ama ǂōrisase nî ǃkhōǀgaipeheba Israeli ôan hoan xa ǁîn di ǃhaodi ǃnâ.

⁴³ǃAruǀîb ge ǃKhūba Moseb tsî Aronni tsîkha ǃoa ge mî: Nēs ge ǂnûiǂgās Pasxab disa: ǃHaokhoe-i di ôab xareb ge ǁîb xa ǂû tide,

⁴⁴xawe mâ-i hoa-i di ǃgāb, mari-i ǀkha ǁamahe hâb ge ǃgao bits kao, ǁîb xa nî ǂû.

⁴⁵Nau ǃhūb dib karao, ǃgaesab karao, ǁîb ge ǁîb xa ǂû tide.

⁴⁶ǀGui ommi ǀguib ǃnâb nî ǂûhe, ǁgans xa du ge ommi ǃauga tani tide, tsî du ge ǁîb tawa ǂkhō-i xare-e khôa tide.

⁴⁷Israeli ǀhûs hoas ge ǁîsa nî dī.

⁴⁸Tsî ǃhaokhoe-i ga sadu tawa hâ tsî i ga ǃKhūba Pasxaba dība ǂgao-o, o i ge ǁî-i tawa hâ aoreb hoaba nî ǃgaokaibasen, îb ǁnās khaoǃgâ sī îb dīǀhao; ob ge ǃhūb ǃnâ ǃnae hâb axase nî ī; xawe ǃgaohe tama hâb xareb ge ǁîb xa ǂû tide.

⁴⁹ǀGui ǂhanub ǀguib ge ǃhūb ǃnâ ǃnae hâb tsî ǃhaokhoeb, sadu ǃnâ ra hâb tsîkha nî hâba.

⁵⁰On ge Israeli ôan hoana ǁîsa ge dī; ǃKhūb ge Moseb tsî Aronni tsîkha mîmā khamin ge ǁîna gere dī.

⁵¹Tsî i ge ǁnā tsēs ǁkhās ai ge ī, ǃKhūb ge Israeli ôana Egipteǃhūba xu ǂgaeǂguiǂui ǃkhaisa ǁîn di ǂnubidi ǃoa.