Read Khoekhoegowab Eksodus 13 Bible Online

Eksodus 13 - Khoekhoegowab bible

Eksodus 13

¹ǃNubaib ge ǃKhūba Moseb ǁga ǃhoa tsî ge mî:

²Hoa ǂguroǃnaesabega tita khaiba; Israeli ôan ǃnâ ǁgûs ǁhāsa ra ǁkhowa-ammi hoab, khoen xas kas, ǀgoan xas kas hoasa, ǁîb ge a ti.

³ǃAruǀîb ge Moseba ǁaes ǃoa ge mî: ǂÂi du re ǁnā tsēs, ǁîs ai du ge Egipteb ǃgāsis di omma xu ǃgûǂoas xa; ǃKhūb ge sado ǀgaisa ǃommi ǀkha ǁnāpa xu ǂgaeǂguiǂui xuige, ǁnā-amaga i ge ǀkhuruǀkhuruhe hâ-e ǂûhe tide.

⁴Nētsē du ge ra ǃgûǂoa Abib ǁkhâb ai.

⁵Tsî i ge nîra ī, ǃKhūb ga satsa ǁnā ǃhūb Kanaanǁîn, Hetiǁîn, Amorǁîn, Hiviǁîn tsî Jebusǁîn dib ǃnâ ūǂgâo, ǁnā ǃhūb sa îgab ge nūbaba, ǁîgab nî ǁîba māse, ǁnā ǃhūb, daib tsî danib tsîkha ra dâuǃnâba, ots ge nē ǃoabasa nē ǁkhâb ǃnâ nî dī.

⁶Hû tsēdi kōsets ge ǀkhuruǀkhuruhe tama perega nî ǂû, tsî hûǁî tsēs aits ge ǃKhūba kaitsē-e nî tsēdība.

⁷Hû tsēdi kōse gu ge ǀkhuruǀkhuruhe tama perega nî ǂûhe, tsî ǀkhuruǀkhuruhe hâ-i ge sa tawa mûhe tide, ā ǀkhurupere-i xare-i ge sa tawa mûhe tide sa ǃhūǀkharigu hoagu ǃnâ.

⁸Tsîts ge sa ôaba nî ǂanǂan ǁnā tsēs ǁkhās ai, mî rase: Nēs ra ī, ǃKhūb ge tita Egipteba xu ta ge doeǂoa ǃnubai dī-ū ǃkhais ǃaroma.

⁹Tsîs ge ǁîsa saose nî ība tsi sa ǃommi ai tsî ǂâiǂâisenxūse sa mûra ǁaegu, ǂhanub ǃKhūb dib nî sa oms ǃnâ hâga, ǃKhūb ge satsa ǀgaisa ǃommi ǀkha Egipteba xu ǂgaeǂguiǂui amaga.

¹⁰ǁNā-amaga nē ǂnûiǂgāsa ǃkhōǀgaipe, mîmâisa ǁaeb ai, kurikorobe.

¹¹Tsî i ge ǁkhāti nîra ī, ǃKhūb ga satsa Kanaanǁîn di ǃhūb ǃnâ ūǂgâ, sa îgab ge nūba khami, tsîb ga ǁîba satsa māo,

¹²ots ge ǃKhūba nî khaiba ǁhāsa ra ǁkhowa-am-i hoa-e; ǁkhāti mâ ǂguroǃnaesabe-i ǀgoan di-i ūts nî hâ-i hoa-e; aoregu ge ǃKhūb dise nî i.

¹³Xawe esels di ǃnaesabe-i hoa-ets ge ǁkhao-i ǀkha nîra ore; ǁî-ets ga ore tama io, ǁnâi ǃaoba khôa i; xawe khoe-i di ǂguroǃnaesabegu sa ôagu digu hoagats nî ore.

¹⁴Tsî ī i kao, sa ôab ga ǁari dî tsi tsî: Tare-e nē-e? ti mîo, ots ge ǁîb ǃoa: ǃKhūb ge ǀgaisa ǃommi ǀkha Egipteba xu, khobosis omma xu ge ǂgaeǂguiǂui da, ti nî mî.

¹⁵Ī i kom geo, Faraob ge karokarosen tsî doe kai dasa ǂkhāo, ob ge ǃKhūba ǂguroǃnaesabegu Egipteǃhūb ǃnâ hâgu hoaga ge ǃgam, khoeb di ǂguroǃnaesabeba xu ǀgoan di ǂguroǃnaesabeb kōse: ǁNā-amaga ta ge mâ aore-i, ǁhāsa ra ǁkhowa-am-i hoa-e ǃKhūba ra ǁguiba; xawe ǂguroǃnaesabeb ti ôan dib hoaba ta ra ore.

¹⁶Tsîs ge ǁîsa sa ǃommi ai hâ saose nî ī tsî sa mûra ǁaegu hâ ǂâiǂâiǃnâxūse: ǃKhūb ge sada ǀgaisa ǃommi ǀkha Egipteba xu ǂgaeǂguiǂui amaga.

¹⁷Tsî i ge ge ī, Faraob ge ǁaesa doe kaio, ob ge Eloba ǁîna Filisteǁîn di ǃhūba-ū gau daob ǀkha ǂgaeǂgui tama, ǁîb a ǀgū xawe: Nētib ra Eloba mî xui-ao: Îs ǁaesa tā ǃhausen ǃkhamman ga mûo, în tā Egipteb ǃoa oa.

¹⁸Ob ge Eloba ǁaesa ǂĀxahuriba-ū garu daob ǃgaroǃhūb dib ǀkha ge ǂgaeǂguiǂnamipe; tsî Israeli ôan ge korokorobese Egipteǃhūba xu ge doeǂoa.

¹⁹Tsîb ge Moseba Joseb di ǂkhōga ge ūǃgû; ǁîb ge Israeli ôana ǃgom nū-e nū kai tsî: Elob ge sado ǂanǂansase nîra ôaǀkhā, xuige ti ǂkhōga ǁnâi nēpa xu ūǃgûǃapa! ti ge mî.

²⁰Nētin ge Sukotsa xu ge dāǁnâ; tsîn ge Etams ǃnâ ge sī ǁgoe, ǃgaroǃhūb ǀams tawa hâsa.

²¹Tsîb ge ǃKhūba ǁîn ais aiǃâ gere ǃgû, tsēa ǀnanuǂkhâǃnâ-i ǃnâ, daob aib nî ǁîna ǂgaeǂguiga, tsî tsuxuba ǀaeǂkhâǃnâ-i ǃnâ, ǁînab nî ǃnâǃnâbase, tsēs tsî tsuxub tsîran nî ǃgû ǁkhāse.

²²ǀNanuǂkhâǃnâ-eb ge ǁîba tsēa tsî ǀaeǂkhâǃnâ-e tsuxuba ǁaes di aisa xu ūbē tama ge hâ i.