Read Khoekhoegowab Eksodus 14 Bible Online

Eksodus 14 - Khoekhoegowab bible

Eksodus 14

¹Tsî ǃKhūb ge Moseb ǃoa ǃhoa tsî ge mî:

²Israeli ôana mîba în oa, în ǁgoe Pi-Hahirots aiǃâ, Migdols tsî hurib tsîra ǁaegu, Baal-Sefons aiǃâ, ǁîs ǃoa-ai, î du ǁgoe hurib amǃgâ.

³Ob ge Faraoba Israeli ôan xa: ǃKhoeǂnân kom hâo ǁnā ǃhūb ǃnâ, ǃgaroǃhūb kom ǁîna ǃkhōǂgā hâo, ti nîra mî.

⁴Tsî ta ge tita Faraob di ǂgaoba nîra karokaro, ǁînab nî ǃkhoeǃgonga; o ta ge tita Faraob tawa tsî ǂnubis âb hoab tawa nîra ǂkhaiǂkhaihe, on ge Egipteǁîna nîra mûǂan, Tita a ǃKhū ǃkhaisa. Tsîn ge ǁnāti ge dī.

⁵Tsî Egipteb di gao-aob ge ǂhôaheo, ǁaes ra ǃhū ǃkhaisa, ob ge ǂgaob Faraob dib tsî ǁîb ǃgāgu diba ge ǀkhara ǁaesǀî tsî gu ge ge mî: Tare xū-i ǃaroma ge kha ǁnâi ǁîsa go dī, Israela ge go doe kai ǃkhaisa, sadan ǃoaba tidega?

⁶Ob ge kunis âba ǂgāǃao tsî ǁaes âba ge ǃgû-ū.

⁷Ob ge ǃnanikaidisi ūǂuihesa kunide ge ū, ā, kunidi Egipteb didi hoade tsî ǁîdi hoadi di danakhoegu ona.

⁸ǃKhūb ge Faraob, Egipteb di gao-aob di ǂgaoba karokaro xui-ao, Israeli ôanab nî ǃkhoeǃgonga; xawe Israeli ôan ge ǀgapi ǃommi ǀkha ge ǃgûǂoa hâ i.

⁹O gu ge Egipteǁîga ǁîna ǃkhoeǃgon tsî ge saoǁae in, hurib tawan ǁgoe hâ hîa, hān hoan tsî Faraob di kunidi tsî ǁîb di ǃgapi-aogu tsî ǁîb di ǂnubis tsîna, Pi-Hahirots xōǀkhā, Baal-Sefons aiǃâ.

¹⁰Tsî Faraob a ǀgū hîan ge Israeli ôana ge ǃgapakhâi, tsî mû, Egipteǁîn ge ǁîn khaoǃgâ ra hā; on ge kaise ge ǃao. ǃNubain ge Israeli ôana ǃKhūb ǃoa gere ǂgai.

¹¹On ge Moseb ǃoa ge mî: Egipteǃhūb hoaragab ǃnâ di ǀhobade a ǀkhai amagasa ǁnâi sidats ge ūbēsa nē ǃgaroǃhūb ǃnâ da nî ǁōse? Tare xū-i ǃaromats kha ǁîsa dī tsî Egipteba xu ge ǂgaeǂguiǂui da?

¹²ǁÎ mî tamasa kha nēs, Egipteb ǃnâ da ge sa ǁga mîsa: ǀÛǀkhā da re, î da Egipteǁîna ǃoaba, ti? Egipteǁîna ǃoabas kom ga ǃgâiba da hâo, nē ǃgaroǃhūb ǃnâ ǁōs xa.

¹³Ob ge Moseba ǁaes ǃoa ge mî: Tā ǃao, î du mâhō, î du ǃgâiǃōb ǃKhūb dib nētsēb nî sadu tawa dība mû; nē Egipteǁîn nētsē du go mûn, ǁîna du ge ǁkhawa mû tide ǀamosib kōse xuige.

¹⁴ǃKhūb ge sado nîra ǂnoaba tsî sadu ge nîra ǃnō.

¹⁵ǃNubaib ge ǃKhūba Moseb ǃoa ge mî: Tarexats ra ǂgai tiǀî? Israeli ôana mîba, în aiǃâb ǃoa doe!

¹⁶Îts satsa sa ǀkharusa ǀhōkhâi îts ǃommi âtsa ǀhōǂui hurib ǂama îts ǁîba ǀgoraǃā, în Israeli ôana hurib ǁaeguba ǃgûǃnâǃganu ǂnâsab ai.

¹⁷Tsî tita, mû tita ge ǂgaob Egipteǁîn diba nîra karokaro, ǁîn khaoǃgân nî ǂgâsa; o ta ge tita nîra ǂkhaiǂkhaihe Faraob tawa tsî ǁîb di ǂnubis hoas tawa, ǁîb di kunidi tsî ǁîb di ǃgapi-aogu tsîn tawa.

¹⁸On ge Egipteǁîna nîra ǂan, tita a ǃKhū ǃkhaisa, Faraob tawa ta ga ǂkhaiǂkhaiheo, ǁîb di kunidi tawa tsî ǁîb di ǃgapi-aogu tawa.

¹⁹Ob ge ǀhomǃgāb Elob diba, Israeli ǂnubisa ra ai-aibaba khâi tsî ǁîn khaoǃgâ ge sī; tsî ǀnanuǂkhâǃnâs ge ǁkhāti ǁîn di ais aiǃâ khâi tsî ge sī mâ ǁîn khaoǃgâ.

²⁰Tsîs ge ǁîsa Egipteǁîn di ǁgoeǃkhais tsî Israelǁîn di ǁgoeǃkhais ǁaegu ge sī, tsî ǀnanus ge ǁkhā ǁaeb ai ǃkhae ge i tsî tsuxuba ge ǃnâǃnâ, nēn ge nauna ǀgū ǁoa is kōse tsuxub hoaba.

²¹Tsî Moseb ge ǃommi âba hurib ǂama ǀhōǂuio, ob ge ǃKhūba huriba ge bē kai ǃgom ǂoab aiǂoas dib ǀkha ǁnā tsuxub hoaba, tsî huriba ge ǂnâ kai tsî ǁgamga ge ǀgoraǃā.

²²On ge Israeli ôana hurib ǁaegub ǃnâ ge ǂgâ ǂnâsab ai; o gu ge ǁgamga ǁîna ǂnubiǂgoagu axase ge ība ǁîn di amǀkhāb tsî ǁîn di ǁareǀkhāb ǁôab ai.

²³O gu ge Egipteǁîga ǃgôaǃgon tsî ge ǂgâ ǁîn khaoǃgâ, Faraob di hān hoan, ǁîb di kunidi tsî ǁîb di ǃgapi-aogu tsîn hurib di ǁaegub ǃnâ.

²⁴Tsî i ge ǁnā ǁgoaǂkhaiǁaeb ǁkhāb ai ge ī, ǃKhūb ge ǀaes tsî ǀnanus tsîra di ǂkhâǃnâsa xu Egipteǁîn di ǁgoeǃkhais ai kō ǃkhaisa; ob ge ǁîba Egipteǁîn di ǁgoeǃkhaisa ge ǃhuri kai.

²⁵Tsîb ge kunidi ân di ǀnūde ge ǃoeǃā tsî ǃgomse ǁîde aiǃâb ǃoa ge ǃgû kai. ǃNubain ge Egipteǁîna ge mî: A da ǁhâ Israeli di aisa xu, ǃKhūb ra ǁîna ǃkhamba Egipteǁî da ǃoagu xuige.

²⁶Ob ge ǃKhūba Moseb ǃoa ge mî: ǀHōǂui ǃommi âtsa hurib ǂama; î gu ǁgamga Egipteǁîn ǂama oa, kunidi ân ǂama tsî ǃgapi-aogu ân ǂama.

²⁷Ob ge Moseba ǃommi âba ge ǀhōǂui hurib ǂama; ob ge huriba ǁgoas ra ǁgoa hîa ǀgaib âb ǃnâ ǁkhawa ge oa; on ge Egipteǁîna ǁîba ge ǁhâǃoa, ob ge ǃKhūba Egipteǁîna hurib ǁaegub ǃnâ ge ǂhāǂgā.

²⁸ǁGamgu ge oa, o gu ge kunidi tsî Faraob ǂnubis di ǃgapi-aogu tsîn, ǁîna hurib ǃnâ ge saona ge ǃgū-ai xui-ao; o i ge ǀgui-i xare-i âna ǃgau tama ge i.

²⁹Xawe Israeli ôan ge ǂnâsab ai ge ǃgû hurib di ǁaegub ǃnâ; tsî ǁgamgu ge ǁîna ǂnubiǂgoase ge ība ǁîn di amǀkhāb tsî ǁîn di ǁareǀkhāb ǁôab ai.

³⁰Nētib ge ǃKhūba ǁnā tsēs ai Israela ge ore Egipteǁîn di ǃomǁaeba xu; tsî Israeli ge Egipteǁîna ǁō hâse ge mû hurib amǃgâ.

³¹Tsî Israeli ge ǁkhāti ǁnā kai ǃommi, ǃKhūb ge Egipteǁîna ǁgau-ūba ge mû; os ge ǁaesa ǃKhūba ge ǃao tsî ǃKhūb ǃnâ ge ǂgom tsî Moseb, ǁîb di ǃgāb ǃnâ.