Read Khoekhoegowab Eksodus 15 Bible Online

Eksodus 15 - Khoekhoegowab bible

Eksodus 15

¹ ǃNubain ge Moseb tsî Israeli ôan tsîna nē ǁnaetsanasa ǃKhūba ǁnaeba tsî ǃhoa tsî ge mî: A ta ǃKhūba ǁnaeba, kaiseb ǀgapiǀgapihe hâ xuige. Hāb tsî ǃgapi-aob âb tsîkhab go hurib ǃnâ aoǂgā.

²ǃKhūb ge a ti ǀgai tsî ti am, tsîb ge a ti ǃgâiǃō; ǁîb ge a ti Elo xui-ao ta ge ǁîba nî koa; ǁîb ge a ti îb di Elo xui-ao ta ge ǁîba nî kaikai.

³ǃKhūb ge a toro-ao; ǁîb ge ǃKhū ti ǀon hâ.

⁴ǁÎb ge Faraob di kunidi tsî ǂnubis âb tsîna hurib ǃnâ go aoǂgā, tsî ǃkhōǂuihesa danakhoegu âb ge go āǁō ǂĀxahurib ǃnâ.

⁵ǁGamgu ge ǁîga ge ǃgū-ai tsî gu ge ǀui-i khami ǃgammi ǃnâ ge ǂgâ.

⁶ǃKhūtse, sa amǀkhāb ǁôab ge go ǀgapiǀgapihe ǀgaib ǀkha, ǃKhūtse, sa amǀkhāb ǁôab ge khākhoeba go khôaǂkhū.

⁷Tsî kai ǀgapisib âts ǀkhats ge sa mâǃoasabena go hîkākā; sats ge khau ra ǁaib âtsa sîǂuio, on ge ǃhoroǃgao-i khami go hapuhe.

⁸Sa ǂguis di ǃgomsa xu gu ge ǁgamga go khâi, tsî dâuǁgamgu ge ǂgōse ge mâ i ǀgui xū-i khami, ǁgamgu ge ge karo hurib di ǁaegub ǃnâ.

⁹Khākhoeb ge go mî: Î ta ǃgôaǃgon, î ta ǁîna saoǁae, î ta ǁkhâuǁnâ-amǃnâsa ǀgoraǃā, os ge ti ǀomsa ǁîn xa nîra ǀoa; î ta ti gôaba ǂgaeǂui, îb ti ǃomma ǁîna ǃhomǂui.

¹⁰ǃNubaits ge satsa sa ǂoaba ge ǃgom kai; ob ge huriba ǁîna go ǃgū-ai, on ge ǂgoaǀurib khami sa ǁgamgu ǃnâ ge ǂgâǁgôa.

¹¹ǃKhūtse, tari-e sats khami ī elogu ǃnâ? Tari-e sats khami ī, sats ǃanusib ǃnâ ǂkhaisats, koatsanadi ǃnâ ǃaoǃaosats, buruxana ra dītsa?

¹²Sats ge sa amǀkhāb ǁôaba go ǀhōǂui; ob ge ǃhūbaiba ǁîna go hapu.

¹³Sats ge sa ǃgâixasib ǀkha nē ǁaes hîats ge oresa ge ǂgaeǂgui; sats ge ǁîna sa ǀgaib ǀkha ǂause ǀnamǀnamsa hâǃkhais sa ǃanusib dis ǃoa ra ǂgaeǂgui.

¹⁴ǁAedi ge ǁîsa ǁnâuo, o di ge ge ǀkhū, on ge Filistiab ǃnâ ǁan hâna tsûb xa ge ǃkhōhe.

¹⁵ǃNubai gu ge Edommi di gao-aoga ge burugâ; o gu ge Moab di ǀgaisaga ǀkhūb xa ge ǃkhōhe; on ge Kanaanni ǃnâ ǁan hân hoana ge tsuni.

¹⁶A kha ǃhurib tsî ǃaob tsîkha ǁîn ai ǁnā; kaisib sa ǁôab diba xu an ǃgome ǀui-i khami; sa ǁaes, ǃKhūtse, nî sīǃganus kōse; nē ǁaes, sats ge ǃoaǂuibasens nî sīǃganus kōse.

¹⁷ǁÎnats ge ūǂgâ tsî nîra ǂgā ǁnā ǃhommi sa ǀumis dib ai, ǁnā ǃkhais, sats ǃKhūts ge ǁanǃkhaise dībasens ai, ǁnā ǃanusib, sats ǃKhūts di ǃomkha ge kurub ai.

¹⁸ǃKhūb ge ǀamose tsî hugaǀgui nîra gaosîsen.

¹⁹Faraob di hāb tsî ǁîb di kunidi tsî ǁîb di ǃgapi-aogu tsîn go hurib ǃnâ sīo, ob ge ǃKhūba hurib di ǁgamga ǁîn ǂama go oa kai xui-ao; xawe Israeli ôan ge ǂnâsab ai hurib di ǁaeguba go ǃgûǃnâǃganu.

²⁰Os ge Miriams, kēbo-aos Aronni ǃgâsasa ǃkhomǃkharurusa ǃomǁae ge ū; o di ge taradi hoade ǂoa tsî ǁîsa ge sao ǃkhomǃkharurudi tsî dâ-aidi tsîdi ǀkha.

²¹ǃNubais ge Miriamsa ǁîde ge ǃeream: ǃKhūba ǁnaeba so re, kaiseb a ǀgapi xuige. ǁÎb kom hāb tsî ǁîb di ǃgapi-aob tsîkha hurib ǃnâ go aoǂgāo! ti.

²²ǁNās khaoǃgâb ge Moseba Israelǁîna ge doe kai ǂĀxahuriba xu; on ge ǃgaroǃhūb, Suri kōse ge doeǂoa; tsîn ge ǃnona tsēdi kōse ǃgaroǃhūb ǃnâ doeǂgâ tsî ǁgam-e hō tama ge i.

²³ǃNubain ge Maras tawa ge sī, xawen ge Maras di ǁgam-e ge ā ǁoa i, au-i a amaga; ǁnā-amagas ge ǃkhaisa Maras ti ge ǂgaihe.

²⁴Os ge ǁaesa Moseb ǃoagu ǀara tsî: Tare-e da nî ā? ti ge mî.

²⁵Ob ge ǁîba ǃKhūb ǃoa gere ǂgai, ob ge ǃKhūba hai-e ge ǁgau bi, tsî ǁgam-i ǃnâb ge aoǂgā io, o i ge ǁgam-e ge ǂkhon. ǁNāpab ge ǁîba ǁaesa ǂnûiǂgā-e ge ǂnûiba, tsî ǁnāpab ge ǁîna gere ǃâitsâ.

²⁶Ob ge ge mî: Ī i kao, ǃKhūb sadu Elob di domma du ôasase nî ǃgâbasen tsî ǁîb mûǁae a ǂhanu xū-e dī tsî du nî sadu ǂgaede ǁîb mîmādiǀî ǂō ǃkhaisa, ǁîb di ǂnûiǂgādi hoade du nî dīga, o ta ge tita ǁnā ǀaesengu, Egipteǃhūba ta ge ǁgui-aigu xa ǀguib xareba sadu ai ǁgui tide; tita ǃKhūta, sa ǂgauǂgau-aota amaga.

²⁷ǃNubain ge Elims tawa ge sī; ǁnāpa di ge disiǀgamǀa ǀaudi tsî hûdisi palmhaide ge hâ i; on ge ǁnāpa ǁgamgu tawa ge ǁgoe.