Read Khoekhoegowab Eksodus 16 Bible Online

Eksodus 16 - Khoekhoegowab bible

Eksodus 16

¹Tsî Elimsa xun ge dāǁnâo, ob ge ǀhaohâb Israeli ôan dib hoaba ǃgaroǃhūb Sinni, Elims tsî Sinaib tsîra ǁaegu ǁgoeb ǃnâ ge sī, disikoroǀaǁî tsēs ǀgamǁî ǁkhâb dis ai, Egipteǃhūba xun ge doeǂoa hâ is khaoǃgâ.

²Ob ge ǀhaohâb Israeli ôan dib hoaba Moseb tsî Aronni tsîkha ǃoagu gere ǀara ǃgaroǃhūb ǃnâ.

³On ge Israeli ôana ǁîkha ǃoa ge mî: Ae, î da ga Egipteǃhūb ǃnâ ǁō hâ i ǃKhūb di ǃomma xu, ǁgansūdi tawa da ǂnôa hîa, pereb xa da ra ǂûǁâ hîa! Sakho kom sida nē ǃgaroǃhūb ǃnâ ge ǂgaeǂguihāo, nē ǀhaohâb hoaba kho nî ǃâǁō kaise.

⁴ǃNubaib ge ǃKhūba Moseb ǃoa ge mî: Mû, tita ge sado ǀhomma xu pereb xa nîra ǀapi kaiba; os ge ǁaesa ǃgûǂoa tsî nîra tsēkorobe ǀhaoǀhaobasen, mâ tsēs hoas di ǀgausa; î ta tita ǁîna ǃâitsâ, isen ti ǂhanub ǃnâ nî ǃgûsa, isen ǁîb ǃnâ ǃgû tidesa.

⁵Tsî i ge ǃnaniǁî tsēs ai nî ī, ūhân nî xūnan kara ǂhomio, on ge ǃhonarisase tsēkoroben ra ǀhaoǀhaosa xu nî ǀhaoǀhao.

⁶ǃNubai kha ge Moseb tsî Aronni tsîkha Israeli ôan hoan ǃoa ge mî: ǃUi-amǁaeb ai du ge nî ǂan, ǃKhūb ge sado Egipteǃhūba xu ǂgaeǂguiǂui ǃkhaisa;

⁷tsî ǁari du ge ǃKhūb di ǂkhaisiba nîra mû, ǃKhūb ǃoagu du ra ǀara ǃkhaisab ge ǁîba go ǁnâu amaga. Okha, tari khom a sikhoma, o du sikhom ǃoagu ra ǀara?

⁸ǃAruǀîb ge Moseba ge mî: ǃKhūb ga sado ǃui-amǁaeb ai ǁgans xa ǂû kaio, tsî ǁgoaǁaeb ai pereb xa ǁâ kaio, o i ge nîra ī sadu di ǀaraǃkhaidi, ǁîb ǃoagu du go ǀaradeb ǃKhūba go ǁnâu amaga. Okha, tari khoma sikhoma? Sadu di ǀaraǃkhaidi ge sikhom ǃoagu hâ tama hâ, tsî di kom ǃKhūb ǃoagu hâo.

⁹Ob ge Moseba Aronni ǃoa ge mî: Israeli ôan di ǀhaohâb hoab ǃoa mî: ǀGūǀgūsen ǃKhūb di ais aiǃâ, ǁîb ge sadu di ǀaraǃkhaide go ǁnâu xuige.

¹⁰Tsî i ge ge ī, Aronni Israeli ôan di ǀhaohâb ǃoa ra ǃhoa hîa, tsî ǁîn ra ǃgaroǃhūbǀî ūnusen hîa, mû, ob ge ǂkhaisib ǃKhūb diba ǀnanus ǃnâ ge ǂhai.

¹¹ǁKhātib ge ǃKhūba Moseb ǃoa ge mî:

¹²Tita ge ǀaraǃkhaidi Israeli ôan dide go ǁnâu, ǃhoa ǁnâi îts ǁîna mîba: ǀGam ǃuira ǁaegu du ge ǁgans xa nîra ǂû, tsî ǁgoas ai du ge pereb xa nîra ǁâ, o du ge nî ǂan, tita ǃKhūta a sadu di Elo ǃkhaisa.

¹³Tsî i ge ǃui-amǁaeb ai ge ī, ǃnabarin ra hā tsî ǁgoeǃkhaisa ra ǃgū-ai ǃkhaisa, tsî sao ra tsēs aib ra ǀauba ǁgoe ǃkhaisa ǁgoeǃkhais ǂnamipe.

¹⁴Tsî ǁgoe hâ ǀaub ge bēo, mû o i ge ǂkhari ǃgupu xūro-i ǃhūb ai ǁgoe-e ǃgomdan khami ī-e, ǃgaroǃhūb ai ge hâ i.

¹⁵ Tsî Israeli ôan ge ǁî-e mûo, on ge nē-e nau-i ǃoa: Tare-e? ti ge mî, tare xū-i a ǃkhaisa ǀū tsî. Ob ge Moseba ǁîna ǃoa ge mî: Nēb ge ǁnā pereb, ǃKhūb ra sado ǂû kaiba.

¹⁶Nēs ge mîs ǃKhūb go mîmāsa: A-i mâ-i hoa-e ǀhaoǀhaobasen, ǂû ǁkhā i as kōse, mâ dana-i hoa-e ǀgui gomera ǀhaoǀhaoba, sadu ǀomdi di ǀgausa ǃoa; a-i mâ-i hoa-e tentoms â-i ǃnân hâs kōse ū.

¹⁷On ge Israeli ôana ǁnāti dī tsî gere ǀhaoǀhaobasen, ǀgui-i ge kaise tsî nau-i ge ǀorose ge ū.

¹⁸Xawe gomeri ǀkhan ge ǀguiro, o i ge ǁnā-i, kaise ǀhaoǀhaobasen go hâ i-e, xū-e ǃnā tama, tsî ǁnā-i ǀorose ǀhaoǀhaobasen go hâ i-e xū-e tôasi tama ge hâ i, mâ-i hoa-i ge ǂû ǁkhā i as kōse ge ǀhaoǀhaobasen.

¹⁹Ob ge Moseba ǁîn ǃoa ge mî: Khoe-i xare-i ge xū-e ǃgau tide ǁaris kōse!

²⁰Xawen ge Moseba ǁnâu tama ge i, tsî ǀnî aogu ge xū-e ge ǃgau nau ǁgoas kōse. ǃNubain ge ǂunina ǁî-i ǃnâ ǀkhī, tsî i ge ge ǀō, ob ge Moseba ǁîgu ǂama kaise ge ǁaixa.

²¹Tsîn ge ǁî-e mâ ǁgoas hoas ai gere ǀhaoǀhao, mâ-i hoa-e ǂû ǁkhā i as kōse; sores ra ǀgam ǁaeb ai i gere tsuni xui-ao.

²²Tsî i ge ge ī ǃnaniǁî tsēs ai, ǃhonarisasen ge pereb xa ǀhaoǀhaobasen ǃkhaisa, ǀgam gomerkha ǀgui-i amǃnâs ai; o gu ge ǀhaohâb di danakhoegu hoaga hā tsî ǁîsa Moseba ge mîba.

²³Ob ge ǁîba ǁîgu ǃoa ge mî: Nēs ge ǁîs ǃKhūb ge mîsa: ǁAri i ge a sâtsē; ǃanu sâtsēs ǃKhūb dis a ǁî: ǁGan ǂgao du ka-e ǁgan, tsî sâi ǂgao du ka-e sâi, tsî ǃgau ka xū-i hoa-e sâubasen ǁarikam ǁgoas kōse.

²⁴On ge ǁî-e nautsēkam ǁgoas kōse ge sâu, Moseb ge mîmā khami; o i ge ǀō tama tsî ǂuni-i xare-i ge ǁî-i ǃnâ hâ tama ge i.

²⁵ǃNubaib ge Moseba ge mî: ǁÎ-e ǂû nētsē, nētsēs a ǃKhūb di sâtsē xuige; nētsē du ge ǃaub ai xū-i xare-e hō tide.

²⁶ǃNani tsēde du ge ǁî-e nî ǀhaoǀhaobasen, xawe hûǁî tsēs ge a sâtsē, ǁîs ai i ge nî ǀkhai.

²⁷Tsî i ge hûǁî tsēs ai ge ī, ǀnîn ǁaes din ra ǃgûǂoa ǃkhaisa, ǀhaoǀhaobasen nîse, xawen ge hō tama ge i.

²⁸Ob ge ǃKhūba Moseb ǃoa ge mî: Matikōse du kha ra ǂkhā ti mîmādi tsî ǂhanugu tsîna ǃkhōǀgaipesa?

²⁹Kō, ǃKhūb ge sado sâtsēsa ge mā ǃkhais ǃaromab ge ǃnaniǁî tsēs ai ǀgam tsēra di pereba ge mā du; a-i mâ-i hoa-e ǁî-i di hâǃkhais ǃnâ hâ! Khoe-i xare-e a-i hûǁî tsēs ai tā ǂoa, hâǃkhais â-e xu!

³⁰Nētis ge ǁaesa hûǁî tsēs ai ge sâ.

³¹Tsî Israeli ommi ge ǁî-e Man ti ge ǂgai tsî i ge korianderǃkhommi khami ǃuri ge i, tsî i ge daniǁganperedan khami ge tsâ i.

³²ǃAruǀîb ge Moseba ge mî: Nēs ge ǁnā mîs ǃKhūb ge mîmāsa: ǁÎ-i xa ǀgui xapa-e ǀoaǀoa, sadu suriba nî sâubaheba, mûn nîse nē pereb, sado ta gere ǂû kaiba nē ǃgaroǃhūb ǃnâ, Egipteba xu ta ge ǂgaeǂguiǂui du ǃnubai.

³³ǁKhātib ge Moseba Aronni ǃoa ge mî: Xapa-e ū îts Manab xa ǀgui gomer-e ǂgā; îts ǁî-e ǃKhūb di ais aiǃâ ǂnûi sadu di ǃhaode i nî sâubahega.

³⁴ǃKhūb ge Moseba mîmā khamib ge Aronna ǁî-e ǀhûǀguitimîs aiǃâ ge ǂnûi, sâuhe i nîga.

³⁵Tsîn ge Israeli ôana Manaba hakadisi kuriga gere ǂû, khoen xa ǁanhe ǁkhā ǃhūb ǃnân ge sīs kōse; Manaban ge gere ǂû, Kanaanǃhūb di ǀkharib tawan ge sīs kōse.

³⁶ǀGui gomeri ge disiǁî ǃâb efab diba.