Read Khoekhoegowab Eksodus 17 Bible Online

Eksodus 17 - Khoekhoegowab bible

Eksodus 17

¹ǁNās khaoǃgâb ge ǀhaohâb Israeli ôan dib hoaba ǃKhūb di mîmās ai ǃgaroǃhūb Sinna xu tsēdaogu ân ǃoa ge doe tsîn ge Refidims tawa sī ge ǁgoe. ǁNāpa i ge ǁgam-i ǁaes nî ā-e ge ǀkhai i.

²ǃNubais ge ǁaesa Moseb ǀkha ǂnoagu tsî: ǁGam-i xa kho mā da î da ā! ti ge mî. Ob ge Moseba ǁîn ǃoa: Tarexa du tita ǀkha ra ǂnoagu? Tare xū-i ǃaroma du ǃKhūba ra ǃâitsâ? ti ge mî.

³Tsî ǁaes ge ǁnāpa ǁgam-e ǁgâo, os ge ǁaesa Moseb ǃoagu ǀara tsî ge mî: Tarexats ǁnâi Egipteba xu ge doeǃapa kai da, tita tsî ti ôan tsî ti ǀgoan tsînats nî ǁgâǁō kaise?

⁴Ob ge Moseba ǃKhūb ǃoa ǂgai tsî: Tare-e ta nî nē ǁaes ǀkha dī? ǂKhari ǁaerob ǀguib kōse, on ge nî ǀuiǁhom te, ti ge mî.

⁵ǃNubaib ge ǃKhūba Moseb ǃoa ge mî: ǃGûsī ǁaes di ais aiǃâ, îts Israeli di kaiga ūǃgû, îts sa ǀkharus, ǁîs ǀkhats ge Nylǃāba ǂnausa sa ǃomǁae ū îts ǃgû!

⁶Mû, tita ge ǁnāpa sa ais aiǃâ Horeb ǃnâ hâ ǃhaob ai nîra mâ, ots ge ǃhaob ai nî ǂnau, o-i ge ǁgam-e nî ǀkhī, ǁaes nî ā-e. Ob ge Moseba Israeli kaigu di ais aiǃâ ǁnāti ge dī.

⁷Ob ge ǁnā ǃāsa Masa tsî Meriba ti ge ǂgai Israeli ôan di ǂnoagus ǃaroma, tsî ǃKhūba ǃâitsâ tsîn ge ǃKhūba hâba sida ǁaegu, tamas ka io ǀkhaib a? ti a mî amaga.

⁸ǃNubaib ge Amaleka hā tsî Israeli ǀkha ge ǃkham Refidims ǃnâ.

⁹Ob ge Moseba Josuab ǃoa ge mî: Khoega ūǂuiba khom îts satsa ǃgûǂoa îts Amaleki ǀkha ǃkham; o ta ge tita ǁari ǃnoms di ǀgapisib ai nî mâ, ǀkharus Elob disa ti ǃomǁae ūhâǃâ.

¹⁰Ob ge Josuaba Moseb ge ǁîba mîmā khami dī tsî Amaleki ǀkha ge ǃkham; o gu ge Moseb, Aronni tsî Huri tsîga ǃnoms di ǀgapib ai ge ǃapa.

¹¹O i ge ge ī, Moseb ra ǃommi âba ǀhōkhâi hîab ge Israela ge ǀgaisa i; xawe ǃommab ra ǃgamǃgam hîab ge Amaleka ge ǀgaisa i.

¹²Xawe ǃomkha Moseb dikha ge ǃgom amaga kha ge ǀui-e ū tsî ǁîb ǃnaga ǁgui tsî ǁî-i ai ge ǂnûi bi, tsî kha ge Aronni tsî Huri tsîkha ǃomkha âba ge ǂkhâkhâi, ǀguib nē ǀkhāb ai tsî naub nau ǀkhāb ai, ǁnāti kha ge ǃomkha âba ge ǁapo, sores ge ǂgâs kōse.

¹³Nētib ge Josuaba Amaleki tsî ǁaes âba ǁîb gôab di ǀāb ǀkha ge ǂnaudan.

¹⁴ǃNubaib ge ǃKhūba Moseb ǃoa ge mî: Nēsa ǂâiǂâisenǃkhaise ǂkhani-i ǃnâ xoa îts ǁîsa Josuab ǂgaera ǃnâ ǁgui: Amaleki xa ǂâisa ta ge tita ǀhommi ǃnagaba xu nîra ǃhūǃnomasi, ti.

¹⁵Ob ge Moseba altarsa ge ǂnubi, tsîb ge ǁîsa ǃKhūb ge a ti ǃkhau, ti ge ǂgai.

¹⁶Nētib ra mî xui-ao: ǃOmmi ǃKhūb di trons ai hâs kōseb ge ǃKhūb di toroba Amaleki ǃoagu nîra hâ, ǃhaosa xu ǃhaos kōse.