Read Khoekhoegowab Eksodus 18 Bible Online

Eksodus 18 - Khoekhoegowab bible

Eksodus 18

¹Tsî Jetrob, Midianni di pristeri, Moseb di ǀuiǁgûb ge ǁnâuo, Elob ge Moseb tawa tsî Israeli ǁaes âb tawa dī xūn hoana: ǃKhūb ge Israela Egipteba xu ǂgaeǂguiǂui ǃkhaisa,

²ob ge Jetrob, Moseb di ǀuiǁgûba Siporas, Moseb di taras, sî-oab gesa ū,

³ǁîs di ǀgam ǀgôakha ǀkha, ǀguib âkha ge Gersom ti ǀon hâ, nētib ra mî xui-ao: Tita ge ǃhaokhoe ge i ǃhao ǃhū-i ǃnâ.

⁴Tsî naub ge Elieser ti ǀon hâ, Elob ti îb dib ge tita huise ge ība tsîb ge tita ge ore Faraob di gôaba xu, tib ge mî xui-ao.

⁵Tsî Jetrob, Moseb di ǀuiǁgûb ge ǁîb di ôakha tsî ǁîb di taras tsîn ǀkha ǃgaroǃhūb ǃnâ Moseb tawa sīo ǃhommi Elob dib, ǁîb tawab ǁgoeb tawa,

⁶ob ge ǁîba Moseb ǃoa ge mî: Tita, sa ǀuiǁgû Jetrota ge sa tawa ra hā, sa taras ǀkha tsî ǁîs di ǀgam ǀgôakha ǀkha.

⁷ǃNubaib ge Moseba ǂoa tsî ǀuiǁgûb âba ge ǃgûǃoa, ob ge ǃgamǃgâ tsî ge ǁoa bi; tsî ǃgâihâsib xa kha ge dîǀîguo, o kha ge tentoms ǃnâ ge ǂgâ.

⁸Ob ge Moseba ǀuiǁgûb âba ǁnā xūn, ǃKhūb ge Faraob tawa tsî Egipteǁîn tawa Israeli ǂama dīn hoan xa gere ǃhoaba; ǁnā ǀhupub, daob ai ge ǁîn ǂama hāb hoab xa tsî matin ge ǃKhūb xa orehe ǃkhaisa.

⁹Ob ge Jetroba ge ǃgâiaǂgao ǁnā ǃgâib, hîab ge ǃKhūba Israeli tawa dīb hoab ǃaroma; ǁîb ge ǁîna Egipteǁîn di ǃomma xu xore ǃkhais xa.

¹⁰Ob ge Jetroba ge mî: Ab karehe ǃKhūb, sado Egipteǁîn di ǃomǁaeba xu ge oreba tsî Faraob di ǃomǁaeba xu, nē ǁaesa Egipteǁîn di ǃomǁaeba xu ge oreba.

¹¹O ta ge tita nēsi a ǂan, ǃKhūb a kai ǃkhaisa elogu hoagu ǃgâ-ai; ǁînab ǃnâudanaxase ge dī ǃkhais ǃnâb ge Egipteǁîna ǃnā hâ ge i amaga.

¹²ǃNubaib ge Jetrob, Moseb di ǀuiǁgûba khauǁguibas tsî ǂāǁguibas xūna ū tsî ǁîna Eloba ge ǁguiba; o gu ge Aronni tsî Israeli di danakhoegu tsîga ge hā, Moseb di ǀuiǁgûb ǀkha gu nî pereǂûse Elob di ais aiǃâ.

¹³Tsî i ge sao ra tsē ge ī, Moseb ǂnû tsî ǁaesa ra ǀgoraǃgâ ǃkhaisa, os ge ǁaesa ǁgoasa xu ǃuis kōse Moseb aiǃâ ge mâ i.

¹⁴Tsî Moseb di ǀuiǁgûb ge ǁaes ǀkhab ra dī xūn hoana mûo, ob ge ge mî: Tare xū-e kha nē-i ǁaes ǀkhats ta dī-e? Tarexats kha sats ǂûtsa ǀguri ra ǂnû, tsî ǁaes hoas ra mâ sa aiǃâ ǁgoasa xu ǃuis kōse?

¹⁵Ob ge Moseba ǀuiǁgûb âb ǃoa ge mî: Nē ǁaes ra ti tawa hā amaga, Elob tawan nî ǀape-ôase.

¹⁶ǃKhai-en ga ūhâo, on ra ti tawa hā, ǀgoraǃgâ ta nîga nē-i tsî nau-e, ǀgūkhoe-i â-i ǁaegu, tsî ǂanǂan in ta nîse Elob di ǂnûiǂgādi tsî ǁîb di ǂhanugu tsîna.

¹⁷Ob ge ǀuiǁgûb Moseb diba ǁîb ǃoa ge mî: Dīts ra ǃkhai-i ge ǃgâi tama hâ.

¹⁸Hoaragasets ge nî dāhe, sats tsî nē ǁaes sa ǀkha hâsa; nē ǃkhais ra ǃgomdā tsi, ǀgurits kom satsa ǁîsa dī ǁoao.

¹⁹Ti domma ǁnâi ǁnâuǀnam î ta ǀapemā tsi, ob ge Eloba sa ǀkha nîra hâ: Satsa ǁaesa hâba Elob tawa, îts dīǃkhaide Elob tawa ūsī.

²⁰Îts ǁîna ǂnûiǂgādi tsî ǂhanugu tsîna ǁguiǃāba, îts ǁîna ǂanǂan ǁnā daob ǁîb ain nî ǃgûba tsî ǁnā sîsenni, ǁîn nî dība.

²¹Îts ǁaes hoas ǃnâ mûǂuibasen ǁkhā khoegu, Eloba ra ǃaoga, ǂhauǃnâ khoega, xūǃgunuxasiba ra ǁkhanga: ǁÎga mâi ǁîn ǂama ǀoadisin di danakhoese, kaidisin di danakhoese, korodisin di danakhoese, disin di danakhoese.

²²Î gu nē ǁaesa ǂhanuǂhanu mâ ǁaeb hoab ai; î-i ǁnâi ī, î gu kai ǁhōgu hoaga sa tawa ūhā, î gu ǂkhari ǁhōgu hoaga ǂhanuǂhanu; îts ǁnâi ǁî-aitsama supusupubasen, î gu sa ǀkha tani.

²³Nē ǃkhaisats ga dīo, tsî Elob ga ǁîna mîmā tsio, ots ge nî mâ ǁkhā, os ge ǁkhāti nē ǁaes hoasa ǂkhîb ǀkha hâǃkhai-i âs tawa nîra sī.

²⁴Ob ge Moseba ǀuiǁgûb âb di domma ǁnâu tsî ǁîb goro mî xūn hoana ge dī.

²⁵Ob ge Moseba Israeli hoaba xu ǁkhā khoega ūǂuibasen tsî ǁîga ǁaes ǂama danakhoese ge mâi; ǀoadisin di danakhoese, kaidisin di danakhoese, korodisin di danakhoese tsî disin di danakhoese,

²⁶ǁaesa gu nî mâ ǁaeb hoab ai ǂhanuǂhanuga, tsî ǃgom ǁhōga gu nî Moseb tawa ūhā, xawe ǂkhari ǁhōga gu nî ǂhanuǂhanuga.

²⁷ǃNubaib ge Moseba ǀuiǁgûb âba ge ǃgû kai; tsîb ge ǁîb di ǃhūb ǃoa ge ǁaru.