Read Khoekhoegowab Eksodus 19 Bible Online

Eksodus 19 - Khoekhoegowab bible

Eksodus 19

¹ǃNonaǁî ǁkhâb ǃnâ, Israeli ôan ge Egipteǃhūba xu doeǂoas khaoǃgâ, ǁnā tsēs ǁkhās ain ge ǃgaroǃhūb Sinaib ǃnâ ge sī.

²Refidimsa xun ge doeǂoa xui-ao, tsîn ge ǃgaroǃhūb Sinaib dib ǃnâ sī tsî ǁnāpa ǃgaroǃhūb ǃnâ ge ǁgoe; tsîb ge Israela ǁnāpa ǁnā ǃhommi ǃoa-ai ge ǁgoe.

³Ob ge Moseba Elob ǃoa ge ǃapa. Ob ge ǃKhūba ǁîba ǁnā ǃhomma xu ǂgai tsî ge mî: Nētits ge satsa Jakob omma nî mîba tsî Israeli ôana nî ǂhôa:

⁴Sadu ge ge mû Egipteǁîna ta ge dī-ū ǃkhaisa; mati ta ge tita sado ǃariǃkhās di ǁgabogu ai tani tsî sado ti ǃoa ūhā ǃkhaisa.

⁵Nēsi ǁnâi ti domma du ga ôasase ǁnâuǀnamo tsî ti ǃgaeǀhaosa ǃkhōǀgaipeo, o du ge ǁaedi hoadi ǃgâ-ai ti dise nîra ī, ǃhūbaib hoaragab a ti xui-ao.

⁶O du ge tita pristersi gaosise tsî ǃanu ǁaese nîra ība. Nēdi ge mîdi, Israeli ôanats nî ǃhoa-ūde.

⁷Ob ge Moseba hā tsî kaigu ǁaes diga ǂgai tsî nē mîdi hoade ǁîga ge mâi-aiǃâ, ǃKhūb ge ǁîba mîmā hâ ide.

⁸ǃNubais ge ǁaes hoasa ǀgui ǃeream tsî ge mî: ǃKhūb goro mî xūn hoan, ǁîna da nî dī. Ob ge Moseba ǁaes di mîde ǃKhūba ge ūsība.

⁹Ob ge ǃKhūba Moseb ǃoa ge mî: Mû, tita ge sa tawa nî sī ǁau ǀnanu-i ǃnâ, ǁaes nî ǁnâuga, sa ǀkha ta ra ǃhoa hîa tsî ǀamosen nî sats ona ǂgomse. Moseb ge ǁaes di mîde ǃKhūba ǂhôa xui-ao.

¹⁰ǁKhātib ge ǃKhūba Moseb ǃoa ge mî: ǃGûsī ǁaes tawa îts ǁîna khai, nētsē tsî ǁari în saran âna ǁā.

¹¹În ǂhomisen hâ ǃnonaǁî tsēs ai: ǃNonaǁî tsēs aib ge ǃKhūba ǁaes hoas di mûdi aiǃâ nî ǁgôaxa xuige Sinaiǃhommi ai.

¹² Îts ǁaes ǂnamipe ǃhara-e dī, mî raǃâ: ǃÛisen î du ǃhommi ai tā ǃapa, î du ǀams âba tā tsâǀkhā; ǃhomma ga tsâǀkhā-i hoa-i ge ǂanǂansase nî ǃgamhe xuige.

¹³ǃOm-i xare-i xa i ge tsâǀkhāhe tide, xawe i ge ǂanǂansase nîra ǀuiǁhomhe tamas ka io ǂanǂansase nîra ǁkhâuǃganuhe; ǀgoa-i karao, khoe-i karao, ǁî-i ge ûi tide; bairaǁnâb ga ǂause ǀō-o, on ge ǃhommi ai nîra ǃapa.

¹⁴ǃNubaib ge Moseba ǃhomma xu ge ǁgôaxa ǁaes ǃoa, tsîb ge ǁaesa ge khai; on ge saran âna gere ǁā.

¹⁵Ob ge ǁaes ǃoa ge mî: ǂHomisen hâse hâ ǃnonaǁî tsēs kōse, î du tarasa tā ǀgū.

¹⁶Tsî i ge ǃnonaǁî tsēs ai ge ī, ǁgoas ge ǁgoao, o gu ge ǃgurugu tsî napagu tsîga ǃhommi ai ge hâ i, tsî ǃgom ǀnanu-i tsî ǀō-i kaise ǃgari xâiǁnâb di-e; ǁaes hoas, ǁgoeǃkhais ǃnâ hâs ge ǃhuris kōse.

¹⁷Ob ge Moseba ǁaesa ǁgoeǃkhaisa xu Eloba ge ǂgaeǂguiǃoa; on ge ǃhommi ǃgao ge mâ.

¹⁸Ob ge Sinaiǃhommi hoaragaba ge ǀan, ǃKhūb ge ǁîb ai ǁgôa amaga, ǀaes ǃnâ; tsî ǀanni âb ge ǁganommi dib axase ge ǃapa, tsî ǃhommi hoab ge kaise ge ǀkhū.

¹⁹Tsî xâiǁnâb di ǀōb ge ǀō-o tsî kaise ǀgaisao, ob ge Moseba ge ǃhoa, tsî Elob ge ǁîba ǃgarise ge ǃeream.

²⁰Tsî ǃKhūb ge Sinaiǃhommi ai, ǃhommi di ǂaob ai ǁgôaxao, ob ge ǃKhūba Moseba ǃhommi di ǂaob ai ge ǂgaiǃapa; ob ge Moseba ge ǃapa.

²¹Ob ge ǃKhūba Moseb ǃoa ge mî: ǁGôa îts nē ǁaesa ǀhûǀguitimîba, în tā ǃKhūb kōse ǃganu mû nîse, în tā ǂguin âna ǁnā.

²²ǁÎn xōǀkhā gu ge ǁkhāti pristergu ǃKhūba ra ǀgūga nî khaisen, îb ǃKhūba ǁîga tā hāǂam.

²³ǃNubaib ge Moseba ǃKhūb ǃoa ge mî: ǁAes ge Sinaiǃhommi ai ǃapa tide, sats ge ǀhûǀguitimî tsî ge mîba da xui-ao: ǃHomma ǁgâuǂnamipe îts ǁîba khai!

²⁴Ob ge ǃKhūba ǁîb ǃoa ge mî: ǃGû îts ǁgôa, ǁnās khaoǃgâ î kho sats tsî Aronni tsîkho hā ǃapa; xawe an pristergu tsî ǁaes tsîna tā hāǃganu, ǃKhūb ǃoan nî ǃapase, îb ǁîba ǁîna tā hāǂam.

²⁵ǃNubaib ge Moseba ǁaes ǃoa ǁgôa tsî ǁîsa ǁîna sī ge mîba.