Read Khoekhoegowab Eksodus 2 Bible Online

Eksodus 2 - Khoekhoegowab bible

Eksodus 2

¹Tsîb ge aob Levib ommi diba ǃgû tsî ǀgôas Levib disa tarase ge ū.

²Tsî taras ge ǀgamǀkhā tsî ǀgôaba ge ǁora. Tsî ǁîb a îsa ǃkhaisas ge mû, os ge ǃnona ǁkhâga ge gaugau bi.

³Tsî aiǃâb ǃoas ge ǁîba gaugau ǁoa, os ge ǀharun xa dīhe hâ ǂgaero-e ǁîba ūba tsî ǂaeb tsî ǂnūǂaeb ǀkha ge ǂkhauǂgan; tsîs ge ǀgôaroba ǁî-i ǃnâ ge ǁgui, tsî ǃāb amǃgâ hâ ǂāgu ǃnâ ge mâi.

⁴Tsî ǃgâsas âb ge ǃnūse mâ tsî gere ǃûiǃgâ, tare xū-i ǁîb ǀkha nî ī ǃkhaisa.

⁵Tsîs ge Faraob ôasa ge ǁgôa, ǃāb ǃnâs nî khōsense; tsî ǂkhamkhoedi âs ge ǃāb amǃgâ gere ǃgûma; tsî ǂgaerosas ge ǂāb ǁaegu mûo, os ge ǃgās âsa sîsī tsî ge ūhā kai si.

⁶Tsî ǁkhowa-am sis geo, os ge ǀgôaroba ge mû; tsî kō, ǀgôarob ge gere ā; os ge ǁîba ǀkhom tsî ge mî: Hebreǁî ǀgôarogu di ǀguib komo.

⁷Os ge ǃgâsas âba Faraob ôas ǃoa ge mî: ǃGû tsî ta nî ǁnâi Hebreǁî daisitaradi xa ǀguisa ǂgaiba si, ǀgôarobas nî daisiba siga?

⁸Os ge Faraob ôasa ǁîs ǃoa ge mî: ǃGûsī. Os ge ǂkhamkhoesa ǃgû tsî ǀgôarob îsa ge sī ǂgai.

⁹ǃNubais ge Faraob ôasa ǁîs ǃoa ge mî: Nē ǀgôaroba ū îs ǁîba daisiba te, o ta ge sa amǃnâsa nî mā si. Os ge tarasa ǀgôaroba ū tsî gere daisi bi.

¹⁰Tsî ǀgôarob ge kaio, os ge ǁîba Faraob ôasa ge ūsība tsîb ge ge ǁîs di ôa kai; tsîs ge ǁîba Moseb ti ge ǂgai: ǁGamma xu ta ge ge ǂgaeǂui bi, tis ge mî xui-ao.

¹¹Tsî i ge ǁnā tsēdi ǃnâ ge ī, Moseb ge kaio, ob ge ǃgâsagu âb ǃoa ǃgûǂoa tsî ǁkhō sîsenni âga ge kō; ob ge ge mû Egipteǁî khoeb ra Hebreǁî khoeb, ǃgâsagu âb di ǀguiba ǂnau ǃkhaisa.

¹²Ob ge nēpa tsî naupa kō tsî khoe-i a ǀkhai ǃkhaisab ge mûo Egipteǁîba ǃgam tsî ǃhūb ǃnâ ge ǁkhō bi.

¹³Tsîb ge sao ra tsēs ai ǁkhawa ge ǂoa; tsî kō, ǀgam Hebreǁî khoekha ge gere ǃkham; ob ge ǂhanuoǃnâb ǃoa ge mî: Tarexats ra sa ǀgūkhoeba ǂnau?

¹⁴Ob ge ge mî: Tari-e satsa sikhom ǂama ǂamkhoese tsî ǂhanuǂhanu-aose mâi hâ? Titats nî ǃgamgats ra nēsa mî, Egipteǁîbats ge ǃgam khami? ǃNubaib ge Moseba ǃao tsî: Amases go ǂansa ǁî ǃkhaisa, ti ge mî.

¹⁵Tsî Faraob ge nē ǃkhaisa ǁnâuo, ob ge Mosebab nî ǃgamse ge ôa-am; xawe Moseb ge Faraob di aisa xu ǁhâ tsî Midianǃhūb ǃnâ ge ǁan, tsîb ge ǂgâb tawa ge ǂnôa i.

¹⁶Tsî Midianni ǃnâ hâ pristeri ge hû ǀgôade ge ūhâ i xuri nîse ge ǀkhīde, tsî di ge āǃnâǃorega ge ǀoaǀoa, ǁgûb di gūna di nî āsiga.

¹⁷ǃNubai gu ge ǃûi-aoga hā tsî ǁîde ǁnāpa xu ge ǃhaebē; ob ge Moseba khâi tsî ǁîde ore tsî gūn âde ge āsi.

¹⁸Tsî ǁîdi îb Regueli tawa di ge sīo, ob ge ge mî: Tare xū-i ǃaroma so kha nētsē nētikō ǃhaese ǁkhawa go hā?

¹⁹O di ge ǁîde ge mî: Egipteǁî khoeb ge sise go ore ǃûi-aogu di ǃomǁaeba xu; tsîb ge ǁkhāti ǃnāǂamsase goro xuribase tsî gūna goro āsi.

²⁰Ob ge ǁîb di ôadi ǃoa ge mî: Mapab ǁnâi hâ? Tarexa so kha ǁnā khoeba go ǃgû kai? ǁKhau bi îb pereǂû re.

²¹Tsî Moseb ge ge māsen, aob tawa ǁansa, tsîb ge ǁîba ǁîb di ôas Siporasa Moseba ge mā.

²²ǁÎs ge ǀgôaba ge ǁora tsîb ge ǁîba Gersom ti ge ǂgai bi; nētib ra mî xui-ao: Tita ge ge ǃhaokhoe kai ǃhao ǃhū-i ǃnâ.

²³Tsî i ge ǂgui tsēdi ǁîs khaoǃgâ ge ī, Egipteb di gao-aob ge ǁō hâ i ǃnubain ge Israeli ôana ǀhâimâinǀom tsî ge ǃau sîsenni ǃaroma; tsî sîsenni ân ǂaman ra ǃgae ǃgaes ge Elob tawa ge sī ǃapa.

²⁴Tsî Elob ge ǃgaes âna ge ǁnâu tsî Elob ge ǃgaeǀhaos âb Abrahammi, Isaki tsî Jakob tsîgu ǀkhab ge dīs xa ge ǂâi.

²⁵Tsî Elob ge Israeli ôana ge kōǀî tsî Elob ge ǁîna ge ǂan.