Read Khoekhoegowab Eksodus 21 Bible Online

Eksodus 21 - Khoekhoegowab bible

Eksodus 21

¹Nēgu ge ǁnā ǂhanugu, ǁînats nî mâi-aiǃâga:

²Hebreǁî ǃgābats ga ǁamao, ob ge ǁîba ǃnani kuriga nî ǃoaba tsi; xawe hûǁîb ǃnâb ge ǁause ǃnora hâse nî ǃgûǂoa, xū-i ama tama,

³ǁîb soros ǀguis ǀkhab ga hā hâ io, ob ge ǁîb soros ǀguis ǀkha nî ǃgûǂoa; ǃgame hâ aob kao, os ge tarasa ǁîb ǀkha nî ǃgûǂoa.

⁴ǀHonkhoeb âb ga tara-e mā bi hâ io, tsîs ga ǁîba ǀgôagu tsî ǀgôadi tsîna ǁoraba hâ io, os ge tarasa ǀgôan âs ǀkha nî ǀhonkhoeb di; ob ge ǁîb soros ǀguis ǀkha nî ǃgûǂoa.

⁵Xawe ǃgāb ga ǂhause: Ti ǀhonkhoeb tsî ti taras tsî ti ôana ta ǀnam hâ xui-ao ta ǃgûǂoa ǂgao tama ti a mîo;

⁶ob ge ǀhonkhoeb âba elogu ǃoa nî ūsī bi, ǁnās khaoǃgâb ge ǁîba, ǁāb tawas kao, ǁāb di hais tawas kao, ūsī; ob ge ǀhonkhoeb âba ǂoro-i ǀkha ǂgaes âba nî ǃkhāǃganu, ob ge ǀamose nî ǃoaba bi.

⁷Tsî khoe-i ga ǁî-i ôasa ǃgāse ǁamaxūo, os ge ǁîsa ǃgûǂoa tide ǃgāgu ra ǃgûǂoa khami.

⁸ǀHonkhoeb âs ga ǁîsa sora tsîb ga ǃgame si tama io, ob ge nî xore kai si; ǃhao ǁaes tawab ge ǁamaxū si ǁkhā tama nî i, îǂhôa tamaseb ge ǁîsa sîsenū hâ i amaga.

⁹Xawe ǁîb di ôabab ga ǃgame kai sio, ob ge ǀgôadi di ǂhanuba nî sîsenū si.

¹⁰Tsî ǀkharasab ga ūbaseno, xaweb ge nēs ona ǁîs di ǂû-i tsî ǁîs di ǃgū-ai xū-i tsî ǁîs di ǃgamesurudeba tôatôa tide.

¹¹Tsî nē ǃnona xūnab ga dība si tama io, os ge ǁause nî ǃgûǂoa marin ose.

¹²Khoe-e kara ǂnau-i, ǁō i nîs kōse, ǁî-i ge ǂanǂansase nî ǃgamhe.

¹³Xawe ǁî-e i ga ôa-am tama hâ io, tsî Elob ga ǁî-e ǃomǁaeb â-i ǃnâ ǂgâ kai hâ io, o ta ge tita satsa ǃkhai-e nî ǂnûiba ǁî-i ǃoab nî ǁhâ-e.

¹⁴Xawe khoe-i ga ǁî-i ǀgūkhoe-e ǂanapega sîsenūo, ǁî-e i nî gāxaǃnâsib ǀkha ǃgamse, ots ge ǁî-e ti altarsa xu nî ūbē, ǁō i nîga.

¹⁵ǁGûb kas, ǁgûs kas hoasa ga ǂnau-i, ǁî-i ge ǂanǂansase nî ǃgamhe.

¹⁶Tsî khoe-e ga ǀâ-i, ǁî-e i ga ǁamaxū hâs kas, ǁî-i ǃomǁae i ga hōhe hâs kas hoasa, ǁî-i ge ǂanǂansase nî ǃgamhe.

¹⁷Tsî ǁgûb kas, ǁgûs kas hoasa ga ǀâxare-i, ǁî-i ge ǂanǂansase nî ǃgamhe.

¹⁸Tsî aore khoegu ga ǃkhamo, tsî ǀguib ga nauba ǀui-i ǀkhas kas, ǃoms ǀkhas kas hoasa ǂnauo, xaweb ga ǁō tama i tsîb ga kharob ai ǁgoeo,

¹⁹ǁkhawab ga khâi tsîb ga ǀkharus ǀkha ǃās daob ai ǃgûo, ob ge ǁnāb ǁîba ge ǂnauba nî ǀhapio; nēs ǀguisa dī tsîb nî tôasib hâna matare bi tsî hoaragase nî ǂgau kai bi.

²⁰Tsî khoe-i ga ǁî-i di ǃgāb kas, ǁî-i di ǃgās kas hoasa hai-i ǀkha ǂnauo, ǁî-i ǃommi ǃnâb ra ǁōs kōse, o i ge ǂanǂansase nî ǀkhaohe.

²¹Xawe ǀgui tsēs kōses kas, ǀgam tsēra kōses kasab ga ûio, ob ge ǀkhaohe tide, ǁîb di marib a amaga.

²²Tsî aogu ga ǂnoagu tsî gu ga ǀgamǀkhā hâ tara-e ǂnauo, ǀgôaro-i ra ǁgôas kōse, xawe ǁōǁōsa ǂkhôa-i ga hâ tama io, ob ge ǂanǂansase nî ǁkharahe, taras di aob nî ǁîba ǁgui-ai khami, tsîb ge ǁîsa ǂhanuǂhanu-aogu ǃommi ǃnâ nî mā.

²³Xawe ǁōǁōsa ǂkhôa-i ga hâo, ots ge nî mā ǀomsa ǀoms ama,

²⁴mûsa mûs ama, ǁgûba ǁgûb ama, ǃomma ǃommi ama, ǂaisa ǂais ama,

²⁵dâuǃkhai-e dâuǃkhai-i ama, ǀhapisa ǀhapis ama, ǃhonaba ǃhonab ama.

²⁶Tsî khoe-i ga mûs ǁî-i ǃgāb dis kas, mûs ǁî-i ǃgās dis kas hoasa ǂnau tsî ga hîkākā sio, o i ge ǁî-e ǃnorasase nî ǃgû kai mûs â-i ǃaroma.

²⁷Tsî ǁgûb ǃgāb â-i dib kas, ǁgûb ǃgās â-i dib kasa i ga ǂnauǂuio, o i ge ǁî-e nî ǃnoraǃnora ǁgûb â-i ǃaroma.

²⁸Tsî gomab ga ao-i kas, tara-i kas hoasa ǃkhāo, ǁō i nîs kōse, ob ge gomaba ǂanǂansase nî ǀuiǁhomhe, tsî ǁgans âb ge ǂûhe tide, xawe ǀhonkhoeb ǁnā gomab dib nî ǀhapio.

²⁹Xawe gomab ga aibe ǃkhāxa hâ i, tsî ǀhonkhoeb âb ga hōhōhe hâ i, tsîb ga sâu bi tama hâ i tsîb ga ao-i kas tara-i kas hoasa ǃgamo, ob ge ǁnā gomaba nî ǀuiǁhomhe tsî ǀhonkhoeb âb ge ǁkhāti nî ǃgamhe.

³⁰Tsî xoremari-eb ga ǁgui-aiheo, ob ge xores ǁîb ǀoms dis ǂama ǁgui-aiheb nîn hoana nî mā.

³¹Tsî ǀgôab kas ǀgôas kas hoasab ga ǃkhāo, ob ge nē ǂhanub ǁkhāba nî sîsenūhe.

³²Tsî gomab ga ǃgāb kas, ǃgās kas hoasa ǃkhāo, ob ge ǀhonkhoeb âba ǃnonadisi ǀhaiǀurimarina nî mā, tsî gomab on ge nî ǀuiǁhomhe.

³³Tsî khoe-i ga tsau-e ǁkhowa-amo, tamas ka io khoe-i ga tsau-e khao-o, tsî i ga ǁî-e ǃgū-ai tama i tsî gomab kas eseli kas hoas ga ǁî-i ǃnâ ǁnāo,

³⁴ob ge ǀhonkhoeb ǁnā tsau-i diba nî mādawa-am, ǁîb di ǀhonkhoebab ge mariba nî matare; xawe ǁō hâ-i ge nî ǁîb di.

³⁵Tsî khoe-i di gomab ga ǀgūkhoe-i â-i di gomaba ǃkhāo ǁōb nîs kōse, ob ge ûitsama gomaba nî ǁamaxūhe, tsî marib ge ǃkhareǃkharese nî ǀgorahe, tsî ǁō hâb ge ǁkhāti ǃkhareǃkharese nî ǀgorahe.

³⁶Xawe ǂansa i ga hâ io, gomab ge aiga ǃkhāxa hâ i, tsî ǀhonkhoeb âb ge sâu bi tama hâ i ǃkhaisa, ob ge mâ dommi hoab ai gomab ama nî mā; xawe ǁō hâb ge nî ǁîb di.