Read Khoekhoegowab Eksodus 22 Bible Online

Eksodus 22 - Khoekhoegowab bible

Eksodus 22

¹Khoe-i ga gomab kas ǀgoa-i kas hoasa ǃnari tsî ga ǂā i kas, ǁamaxū i kas hoasa, ǁî-i ge koro gomana ǀgui gomab ama nî mādawa-am, tsî haka gūna ǀgui ǀgoa-i ama.

²ǃNari-ao-i ga hōheo, khaoǃkhopa i ra hîa, tsî i ga ǂnauheo, ǁō i nîs kōse, os ge ǁî ǃkhaisa ǂnau goba ǀaoǀhapise ība tide.

³Xawe sores ga ǁî-i ǂama ǁhaio, os ge ǁî ǃkhaisa ǀaoǀhapise ǁî-e nî ība; ǁî-i ge hoaragase nî mādawa-am; ūhâ tama i ga io, o i ge ǃnaris â-i ǃaroma nî ǁamaxūhe.

⁴Tsî ǃnarixū-i ga ǁî-i tawa amase ûitsamase hōheo; gomab karao, eseli karao, ǀgoa-i karao, ǃhonarisase i ge nî mādawa-am.

⁵Khoe-i ga ǃhana-i kas, ǂauxûiǂûǃhana-i kas hoasa ǃûhapu kaio, tsî i ga ǀgoan â-e doeǁgao, nau khoe-i di ǃhanab ǃnân nî ǃûse, ǁî-i ge ǁî-i di ǃhanab di ǃgâi-i tsî ǁî-i ǂauxûiǂûhais di ǃgâi-i xa nî mādawa-am.

⁶ǀAe-i ga khauǂoa tsî i ga ǁkhūna ǃkhō, ǃhoroǃgaeǀkhādan kas, ǃhanab ai mâ ǃhorob kas hoas nî hapuhes kōse, ǁî-i, ǁnā ǀae-e ge ǂhubi-i ge ǀoa hâse nî mādawa-am.

⁷Khoe-i ga ǁî-i di ǀgūkhoe-i marib kas, soadi kas hoasa sâu kaio, tsîn ga ǁnā khoeb di omma xu ǃnariheo; ǃnari-ao-i ga hōheo, o i ge ǃhonarisase nî mādawa-am.

⁸Tsî ǃnari-ao-i ga hōhe tama io, ob ge ǁnā ommi di ǀhonkhoeba Elob tawa nî ūsīhe, iseb ǀnîsi ǁîb di ǃomma ǁîb di ǀgūkhoe-i di xūn tawa ǁgui tama hâsa.

⁹Mâ ǂkhabab hoab di ǃkhais, gomab dis kas, eseli dis kas, ǀgoan dis kas, saran dis kasa, kā hâ xū-i, ǁî-i xa i ga khoe-e: ǁÎ-i ge a ti xū, ti mî-i dis xase, ǁîkha hoakha di ǃkhais ge elogu tawa nî sī; elogu xa ga ǀhapimāhe-i hoa-i, ǁî-i ge ǁî-i di ǀgūkhoe-e ǃhonarisase nî mādawa-am.

¹⁰Khoe-i ga ǁî-i di ǀgūkhoe-e eseli kas, gomab kas, ǀgoa-i kas, goma-i hoa-i kas hoasa sâu kaio, tsî i ga ǁōǂkhôaǂkhôahe i kao, doeǁgabēhe i kao, khoe-i xare-i xa i ge mûhe tama is kōse,

¹¹os ge nūs ǃKhūb disa ǁî ǀgamkha ǁaegu nî hâ, iseb ǀnîsi ǃommi âba ǀgūkhoeb di xū-i tawa ǁgui tama hâsa; tsî ǁnā xū-i di ǀhonkhoeb ge ǁîsa nî ǃkhōǃoa, tsîb ge mādawa-am tide.

¹²Xawe ǂanǂansase i ga ǁîb xa ǃnarihe hâo, ob ge ǁî-e ǀhonkhoeb â-e nî mādawa-am.

¹³Xawe ǂanǂansase i ga ǀkhauǃāhe hâo, ab ǁî-e ūhâ ǀhûǀguitimîxūse, ob ge ǀkhauǃāhe hâ-e ǀhonkhoeb â-e mādawa-am tide.

¹⁴Tsî khoe-i ga ǀgūkhoe-i â-i tawa ǀkhupio, tsî i ga ǂkhôadīheo, ǁō i kao, ǀhonkhoeb â-i a ǀkhai hîa, o i ge hoaragase nî mādawa-am.

¹⁵Xawe ǀhonkhoeb â-i ga hâ hâ io, o i ge mādawa-am tide; ǃgaehe i ga hâ io, o i ge ǃgaeǀgaus di amǃnâs ai nî hâ.

¹⁶Tsî aore khoeb ga ǂkhamkhoes hîa āba mā bi tamasa ǂgaeǂhapu tsî ǁgoeǀkhā sio, ǁîb ge ǁîsa ǃgameǁui-e mā tsî nî tarase ū si.

¹⁷ǁGûb ga hoaragase ǂkhāo, ǁîsa mā bisa, ob ge mariba nî mā, ǂkhamkhoedi di khāǁuiba a anuba khami.

¹⁸ǃGai-aodets ge ûi kai tide.

¹⁹ǀGoa-i ǀkha ra ǁgoe-i ǁî-i ge ǂanǂansase nî ǃgamhe.

²⁰Eloga ra ǁguiba-i tsî ǃKhūb ǀguiba tama, ǁî-i ge nîra hîǀhuruhe.

²¹ǁKhātits ge ǃhaokhoe-e tsûtsû tsî ǁgâiǀā tide; sadu on ge ǃhaokhoe i Egipteǃhūb ǃnâ amaga.

²²ǃOatara-i kas, ǃoaǀgôa-i kas hoasats ge ǁgâiǀā tide.

²³ǁÎnats ga domǃnôa-i hoa-i ai ǁgâiǀāo, tsîn ga ǃgāse tita ǃoa ǂgaio, o ta ge tita ǁîn di ǂgaisa ǂanǂansase nîra ǁnâu;

²⁴ob ge ti ǁaiba nîra khau, o ta ge tita sado gôab ǀkha nîra ǃgam; o di ge sadu tarade nîra ǃoatara kai, tsîn ge sadu ôana nîra ǃoaǀgôa kai.

²⁵Ti ǁaes sa tawa ǀgâkhoese hâsats ga mari-e ǀkhupio, ots ge ǁîna mariǀkhupi-aose ība tide; tsîts ge ǁîna hōǃnā-e ǁgui-ai tide.

²⁶Sa ǀgūkhoeb di sarabats ga ǀnîsi ǁauǁauxūse ūo, ots ge ǁîba ǁî-e nî mādawa, sores ǂgâb aiǃâ.

²⁷ǁÎb ǀguiba i kom ǃgū-aixūse ūhâo, anaǂamxūb ǁî-i khōb dib komo; mâ xū-i ǃnâ i kha nî ǁgoe? O i ge nîra ī, ǁî-i ga tita ǃoa ǂgaio, o ta ge tita nîra ǁnâu; tita a ǀkhomxaǃnâ xui-ao.

²⁸Elobats ge ǀâxare tide, tsî ǁaes di ǂamkhoegats ge ǃkhāǃkhā tide.

²⁹Sa ǀoasib tsî sa ǁgamron tsînats ge mâiǂui tide; ǂguroǃnaesabeb sa ôagu dibats ge tita nî mā.

³⁰ǁNās ǁkhās khamits ge sa goman tsî sa gūn tsîn ǀkha nî dī, hû tsēdi kōse gu ge ǁgûs ǀkha nî hâ, ǁkhaisaǁî tsēs aits ge ǁîga tita nî mā.

³¹Sadu ge ǃanu khoese tita nî ība; ǁnā-amaga du ge ǁgan-i, ǃgarob ai ǀkhauǃāhe hâ-e ǂû tide, arina du ge ǁî-e nî aomā.