Read Khoekhoegowab Eksodus 23 Bible Online

Eksodus 23 - Khoekhoegowab bible

Eksodus 23

¹ǂKhaba gom-ets ge ǃkhōǃoa tide îts eloxoresaba tā mâǃgâ, ǂkhaba ǂgā-amao kaits nîse.

²ǂGuibats ge ǂkhabadīǃkhaidi ǃnâ sao tide; tsîts ge ǁkhāti ǂnoaguǃkhai-i ǃnâ ǃhoa tide, îts tā ǂguiba ǂōsenǀî, ǂhanubats nî gama kaise.

³Tsîts ge ǁkhāti ǀgâsaba mâba tide, ǁîb di ǂnoaguǃkhai-i ǃnâ.

⁴Sa khākhoeb di gomab kas, ǁîb di ǁhapuma ra eseli kas hoasats ga ǃoao, ots ge ǁîba hoaragase ǁkhawa nî ūsība bi.

⁵Satsa ra ǁkhanni di eseli ǃnaob ǃnâ ǁgoe ǃkhaisats ga mûo, ǁnâi ǀhawets nî sa xū-e ǁnāxūsa ǁîb ǃaroma, ǁîbats nî huise? Sats ge nî ǁnāxū i, ǁîb ǃaroma!

⁶Sa ǃgâsab di ǂhanubats ge gama kai tide ǁîb di ǂnoaguǃkhai-i ǃnâ.

⁷ǃNūse hâ ǂkhaba ǃkhai-e xu, tsîts ge ǀhapio-i tsî ǂhanu-ai-e ǃgam tide: Eloxoresa-e ta ǂhanu-ai kai tide xui-ao.

⁸ǁKhātits ge ǃnarexū-e ū tide; ǃnarexū-i ge mû rana ra ǂgī kai tsî ǂhanu-ain di ǃkhaisa ra dabaǃkhuni xui-ao.

⁹ǃHaokhoebats ge ǁkhāti ǁgâiǀā tide: ǃHaokhoe-i di ǂgaobats a ǂan xui-ao, sadu on kom ǃhaokhoe ge io Egipteǃhūb ǃnâo.

¹⁰ǁKhātits ge ǃnani kuriga sa ǃhanaba nî tsoro-ai tsî ǁîb di ūǀkhīna nî ǀhaoǀhaobasen;

¹¹xawe hûǁîb aits ge ǁîba sâ tsî nî ǁgoe kai, în ǀgâsan sa ǁaes dina ǂû, în ǃgau ka xūna ǃaub di ǀguruna ǂû; ǁnās ǁkhās xasets ge ǁkhāti nî dī sa ǂauxûiǂûǃhanab ǀkha tsî sa ǀkherahaidi ǀkha.

¹²ǃNani tsēdets ge sa sîsenga nî dī, xawe hûǁî tsēs aits ge nî sâ, sa gomab tsî sa eseli tsîkha nî sâga, sa ǃgās di ôab tsî ǃhaokhoeb tsîkha nî ǀomǂnûise.

¹³Sado ta gere mîban hoan, ǁîna du ge nî ǃkhōǀgaipe; tsî ǀkhara elogu di ǀons xa du ge ǂâi tide, sa amsa xus ge ǁnâuhe tide.

¹⁴ǃNona ǃnādi kōse du ge kurib ǃnâ kaitsē-e tita nî tsēdība:

¹⁵Kaitsēs ǀkhuruǀkhuruhe tama peregu disats ge nî tsēdī. Hû tsēdi kōsets ge ǀkhuruǀkhuruhe tama peregu xa nî ǂû, mîmā tsi ta go khami, mîmâihesa ǁaeb ai, Abib ǁkhâb ǃnâ; ǁîb ǃnâts ge Egipteba xu doeǂoa amaga, xawen tā ǀkhaiǃnâse ti ais aiǃâ ǂhai.

¹⁶Tsî ǃgaos di kaitsēs ǂguro ǂûn sa xūreb din, ǃhanab aits nî tsoro hân disa. Tsî ǀhaoǀhaobasens di kaitsēs kurib di ǀamǂoas ai, sa xūrebats ga ǃhanaba xu ǀhaoǀhaobasen ǃnubai.

¹⁷ǃNona ǃnādi kōse gu ge sa aogu hoaga kurib ǃnâ ǃKhūb Elob di ais aiǃâ nî ǂhai.

¹⁸Ti ǁguibas di ǀaobats ge ǀkhuruǀkhuruhe hâ peren ǀkha ǁguiba tide, ǁkhātib ge kaub ti kaitsēs diba ǁgoas kōse hâǁgoa tide.

¹⁹ǂGurosan sa ǃhanab di ǂguro ǂûn dinats ge ǃKhūb, sa Elob di ommi ǃnâ nî ūǂgâ. Piriro-ets ge ǁgûs di dai-i ǃnâ sâi tide.

²⁰Mû, tita ge ǀhomǃgāba sa ais aiǃâ ra sî, nē daob aib nî sâu tsi tsî ǁnā ǃās, tita ǂhomi hâs tawab nî ūsī tsiga.

²¹ǂAnbasen ǁîb di ais aiǃâ îts ǁîb di domma ǁnâuǀnam, îts ǁîba tā au-auǃnâ. Sadu di ǃûǂamdeb ǀûba du tide amaga, ti ǀons ge ǁîn ǃnāb ǃnâ hâ xui-ao.

²²Xawe dommi âbats ga ôasase ǁnâuǀnamo tsî tita nî mîn hoana dīo, o ta ge sa khākhoe-i di khākhoe tsî sa mâǃoasabe-i di mâǃoasabese nîra ī.

²³Ti ǀhomǃgāb ge sa ais aiǃâ ǃgû tsî nîra ūǂgâ tsi Amorǁîn, Hetiǁîn, Perisiǁîn, Kanaanǁîn, Hiviǁîn tsî Jebusǁîn tsîn tawa, tsî tita ge ǁîna nîra hîkākā.

²⁴ǁÎn di Elogu aiǃâts ge satsa ǃhonǁgoa tsî ǁîga ǃoaba tide, tsîts ge ǁkhāti ǁîn di sîsengu ǃoa dī tide, xawets ge ǁîga hoaragase nî khôaǁnâ, tsî ǂnûikhâihe hâ īgu âgats ge hoaragase nî hîǀhuru.

²⁵Tsîts ge ǃKhūb sa Eloba nî ǃoaba ob ge ǁîba sa pereb tsî sa ǁgammi tsîkha nîra ǀkhae; o ta ge tita ǀaesenga sadu ǁaeguba xu nîra ǁkhae.

²⁶O i ge ǁorasā-i kas, ǂûoǃnâ-i kas hoasa sa ǃhūb ǃnâ hâ tide; o ta ge tita ǀgaus sa tsēdi disa nîra ǀoaǀoa.

²⁷O ta ge tita ti ǃhuriba sa ais aiǃâ nîra sî, o ta ge ǁnā ǁaes, ǁîs tawats ga sīs hoasa nîra ǂkhabuǂâi kai; o ta ge nîra dī, khākhoen âts hoan ǃkhomǃnoro nîra ǃgû ǃkhaisa.

²⁸Tita ge ǁkhāti kai ǀgeruga sa ais aiǃâ nîra sî, ǁîgu ge sa ais aiǃâ nîra ǂhāǂui, Hiviǁîn, Kanaanǁîn tsî Hetiǁîn tsîna.

²⁹Tsî ta ge tita ǁîna ǀgui kurib ǃnâ sa ais aiǃâba xu ǂhāǂui tide, ǃhūb ǀkhaiǃnâ tidega, în ǃaub di ǀguruna tā ǂgui sadu ǃoa-ai.

³⁰Saogubes ai ta ge tita ǁîna sa ais aiǃâba xu nî ǂhāǂui, ǂgui tsî du nî ǃhūba ǀumis kōse.

³¹Tsî ta ge tita sa ǀkhariga nîra mâi ǂĀxahuriba xu Filisteǁîn di ǃhūb kōse, tsî ǃgaroǃhūba xu ǃāb kōse: ǁNā ǃhūb ǃnâ ǁan hâ khoena ta sa ǃomǁae nîra mā xui-ao, sa ais aiǃâba xuts nî ǁîna ǂhāǂuise.

³²Sats ge ǁîn ǀkhas kas, ǁîn di elogu ǀkhas kas hoasa ǃgaeǀhao-e dī tide.

³³ǁÎn ge sa ǃhūb ǃnâ ǁan tide, în satsa ti ǃoagu tā ǁore kai ti, ǁîn di elogats ga ǃoabao, o i ge ǂanǂansase ǃnôase nî ība tsi.