Read Khoekhoegowab Eksodus 25 Bible Online

Eksodus 25 - Khoekhoegowab bible

Eksodus 25

¹ǃNubaib ge ǃKhūba Moseb ǃoa ge mî:

²Mîba Israeli ôana în ǀhaoǀhaoǁguiba-e ǁguiba te. Mâ-i, māsenxase kara ǁguiba-i hoa-i xats ge ti ǀhaoǀhaoǁguibasa nî ū.

³Tsî nēs ge ǀhaoǀhaoǁguibas, ǁîs xats nî ūsa: ǃHuniǀurib, ǀhaiǀurib, ǂaib,

⁴ǀhommiǂhoab, purpurǀapab, îǀapab, ǀui ǃurilineǃkhain tsî piriǀûn;

⁵ǀapaǀapahe hâ bairakhōn, ǃâukhōn tsî akasiahain;

⁶olib ǃamamǀaes dib, ǃgâihamxūn ǂkhauǀkhās din tsî ǃgâihamxūn ǀanǀans din;

⁷sardoniksǀuidi tsî ǀuidi efob ǃnâ nî ǂnûihedi tsî ǁkhaixūb didi tsîna.

⁸Tsîn ge tita ǃanusi-e nî dība, tita nî ǁîn ǁaegu ǁanga.

⁹Tita aiǁgau-i nē tabernakeli di-e satsa nîra ǁgaus hoas, tsî aiǁgau-i ǁî-i sîsenūxūn hoan di-i nî ī xase, ǁnās ǁkhās xasets ge satsa ǁî-e nî dī.

¹⁰On ge akasiahain xa ǂgaesa nîra dī: ǀGam ǂhâkha tsî ǃkhare ǂhâb kōb ge gaxusib âsa nî ī, tsî ǀgui ǂhâb tsî ǃkhare ǂhâb kō ǂhabasib âsa, tsî ǀgui ǂhâb tsî ǃkhare ǂhâb kō ǀgapisib âsa.

¹¹Tsîts ge ǁîsa ǀui ǃhuniǀurib ǀguib ǀkha nî ǃkhûǀkhā, ǃnāb ǃnâ tsî ǃaugab aits ge ǁîsa nî ǃkhûǀkhā; tsîts ge ǁîsa ǃhuniǀurikransa nî dī ǁî-i ǂnamipe.

¹²Îts ǁî-e haka ǃhuniǀuriǃganuna ǂnâba, îts ǁîna ǁî-i di haka ǁhôagu ai ǂnûi, î ra ǀgam ǃganura ǁî-i di ǀgui ǀkhāb ai hâ tsî ǀgam ǃganura ǁî-i di nau ǀkhāb ai.

¹³Îts tani-ūhaiga dī akasiahain xa, îts ǁîga ǃhuniǀurib ǀkha ǃkhûǀkhā.

¹⁴Îts tani-ūhaiga ǃganun ǃnâ ǂgā ǂgaes di ǃnamkha tawa, îs ǂgaesa ǁîgu ǀkha tanihe.

¹⁵Tani-ūhaigu ge ǂgaes di ǃganun ǃnâ nî hâ, ǁîgu ge ǂgaeǂuihe tide.

¹⁶ǁNās khaoǃgâts ge ǂgaes ǃnâ nî ǁgui ǁnâ ǀhûǀguitimîs, tita nîra mā tsisa.

¹⁷Tsîts ge ǁkhāti ǃgū-ai-i ǂkhîbagus di-e nî dī ǀui ǃhuniǀurib xa: ǀGam ǂhâkha kōse a-i gaxu, î-i ǀgui ǂhâb tsî ǃkhareb kōse ǂhaba.

¹⁸Tsîts ge ǁkhāti ǀgam xerukha nî dī ǃhuniǀurib xa; ǀui ǃhuniǀurib xats ge ǁîkha nî dī ǃgū-aixūs ǂkhîbagus dis di ǃnamkha ǃnâ.

¹⁹Îts ǀgui xeruba dī nē ǀkhāb di ǀamsa xu tsî ǀnî xeruba nau ǀkhāb di ǀamsa xu; î kha xerukha ǃgū-ais ǂkhîbagus dis tawa ǁapo ǁîs di ǀamra hoara ai.

²⁰Î kha xerukha ǁgabogu âkha ǀgapise ǃā, î kha ǂkhîbagus di ǃgū-aisa ǁîkha di ǁgabogu ǀkha ǃgū-ai, î ra ǁîkha di aira ǃoagu; î ra xerukha di aira ǂkhîbagus di ǃgū-aisǀî kō.

²¹Tsîts ge ǂkhîbagus di ǃgū-aisa ǂgaes ǂamǃnâ nî ǂnûi, ǀhûǀguitimîs, tita nîra mā tsisats ga ǂgaes ǃnâ ǁguis khaoǃgâ.

²²O ta ge tita ǁnāpa sa tawa nî sī, tsî ta ge tita sa ǀkha nîra ǃhoa ǂkhîbagus di ǃgū-ais di ǂamǃnâba xu, ǀgam xerukha, ǀhûǀguitimîs di ǂgaes ai hâkha ǁaeguba xu ǁnā xūn, Israeli ôana ta nî satsa mîba kain hoana.

²³Tsîts ge ǁkhāti tāba nî dī, akasiahain xa: ǀGam ǂhâkha kōse ab gaxu îb ǀgui ǂhâb kōse ǂhaba, îb ǀgui ǂhâb tsî ǃkhareb kōse ǀgapi.

²⁴Tsîts ge ǁîba ǀui ǃhuniǀurib ǀkha nî ǃkhûǀkhā; tsîts ge ǁkhāti ǃhuniǀurikransa ǁîb ǂnamipe nî dī.

²⁵Tsîts ge ǁîb ǂnamipe ǃkhui-amhai-e nî dī, ǃommi ǂhabab kō-e; tsîts ge ǃhuniǀurikransa nî dī ǁîb di ǃkhui-amhais ǂnamipe.

²⁶Tsîts ge ǁîb ai ǁkhāti haka ǃhuniǀuriǃganuna nî dī; tsîts ge ǃganuna nî ǂnûi ǁnā haka ǁhôagu, ǁîb di haka ǂaidi tawa nî hâgu ai.

²⁷ǃKhui-amhais ǃoa-ain ge ǃganuna nî hâ tanihaigu di ǂgāǃnâxūse, tāb nî tanihese.

²⁸Nē tanihaigats ge akasiahain xa nî dī, tsîts ge ǁîga ǃhuniǀurib ǀkha nî ǃkhûǀkhā; tsî tāb ge ǁîgu ǀkha nî tanihe.

²⁹Tsîts ge ǁkhāti nî dī ǁîb di ǃorede tsî ǁîb di ǀanǀansoade tsî ǁîb di ǂhaba ǃorede tsî ǁîb di ǀgabide, ǁîde xun nî ǂnâde; ǀui ǃhuniǀurib xats ge ǁîna nî dī.

³⁰Tsîts ge nē tāb ai ǁkhāti hugaǀgui ǁgaupereba ti ais aiǃâ nî ǁgui.

³¹Tsîts ge ǁkhāti kandelara nî dī ǀui ǃhuniǀurib xa. ǂNauǃgâiǃgâihe hâ xū-i xab ge kandelara nî dīhe, tsî ǁîb di ǃgaos tsî ǁîb di ǁôagu tsîna, ǁîb di ǀgabidi tsî ǁîb ǃhûdi tsî ǁîb di ǃkhādi ge ǁîba xu nî ǀkhī.

³²Tsî ǃnani ǁôagu ge ǁîb di ǃnamkha xu nî ǂoaxa: ǃNona ǁôagu kandelari diga ǀgui ǀkhāb âba xu, tsî ǃnona ǁôagu kandelari diga nau ǀkhāb âba xu.

³³ǀGui ǁôab ǃnâ di ge ǃnona ǀgabide nî hâ, amandelǂûn khami īde, ǀgui ǃhûs tsî ǀgui ǃkhās tsîra; tsî ǃnona ǀgabidi amandelǂûn khami īde nau ǁôab ai, ǀgui ǃhûs tsî ǀgui ǃkhās tsîra; nēti gu ge ǁnā ǃnani ǁôagu kandelara xu ra ǂoaxaga nî ī.

³⁴Tsî kandelari ǂhanib tawa di ge haka ǀgabide nî hâ, amandelǂûn khami īde, ǁîb di ǃhûdi tsî ǁîb di ǃkhādi ǀkha.

³⁵Tsî i ge ǃhû-e nî hâ ǀgam ǁôakha ǃnagaba xu ra ǀkhīse. ǁNāti i ge nî ī ǃnani ǁôagu, kandelara xu ra ǀkhīgu ǀkha.

³⁶ǁÎgu di ǃhûdi tsî ǁîgu di ǁôagu ge ǁîba xu nî ǂoaxa; ǁîn hoan ge ǀgui ǂnauǃgâiǃgâihe hâ sîsenai-i ǀgui-i ase nî i, ǀui ǃhuniǀurib xa.

³⁷Tsîts ge ǁkhāti hû ǃamamǀaede ǁîba nî dība, î di ǃamamǀaedi âba ǃamamhe, î di ǃnâ ǁîb di ǃnamkha ai.

³⁸ǁÎb di ǁaraǂaoxūn tsî ǁîb di ǀari-ūxūn tsîn ge ǀui ǃhuniǀurib xa nî dīhe.

³⁹ǀGui talens ǀui ǃhuniǀurib ǀkhan ge nî dīhe, nē xapan hoan ǀkha.

⁴⁰Kōbasen ǁnâi îts ǁîna dī ǁîn di ai-ība ǃoa, ǃhommi aits ge ǁgauheba.