Read Khoekhoegowab Eksodus 26 Bible Online

Eksodus 26 - Khoekhoegowab bible

Eksodus 26

¹Tsîts ge tabernakela nî dī, disi îǂgoan ǀkha ǀui ǀhôahe hâ lineǃkhaib xa tsî ǀhommiǂhoab xa tsî purpuriǀapab xa tsî îǀapab xa xerugu ǀkha, ǁāǁāǁkhāsa sîsenai-i xats ge ǁîna nî dī.

²Gaxub ǀgui îǂgoab dib ge ǀgamdisiǁkhaisaǀa ǂhâgu kōse nî i tsî ǂhabasib ǀgui îǂgoab diba haka ǂhâgu kōse; nē îǂgoan hoan ge ǀgui ǀnōs ǀguisa nî ūhâ.

³Koro îǂgoan ge nî ǃkhōǁaehe hâ, nēsa naus ǀkha. ǁKhawan ge koro îǂgoana nî ǃkhōǁaehe hâ, nēsa naus ǀkha.

⁴Tsîts ge ǀhomǂhoa ǂhīǃgaerode nîra dī ǀgui îǂgoab di ǃnammi ai ǀkhâuǀams tawa, ǃkhōǁaes ǃnâ; ǁnās ǁkhās xasets ge ǁkhāti nî dī îǂgoab di ǀuniǀams ǀkhab ai, ǀgamǁî ǃkhōǁaes tawa.

⁵Korodisi ǂhīǃgaerodets ge ǀgui îǂgoab tawa nî dī, tsî korodisi ǂhīǃgaerodets ge îǂgoab di ǀkhâuǀams, ǀgamǁî ǃkhōǁaes tawa hâs tawa nî dī; nē ǂhīǃgaerodi ge nî ǃkhōǁaegu.

⁶Tsîts ge ǁkhāti korodisi ǃhuniǀuriǂhaoǀurirona nî dī, tsîts ge îǂgoana nî ǃkhōǁae nēsa naus ǀkha nē ǂhaoǀuriron ǀkha, î-i tabernakel kai.

⁷Tsîts ge ǁkhāti îǂgoana nî dī piriǀûn xa tabernakeli di ǃgū-aixūse: Disiǀguiǀa îǂgoan xats ge ǁîsa nî dī.

⁸Kōsib ǀgui îǂgoab dib ge nî ǃnonadisi ǂhâgu kō, tsî ǂhabasib ǀgui îǂgoab diba haka ǂhâgu kō: Nē disiǀguiǀa îǂgoan ge ǀgui ǀnōs ǀguisa nî ūhâ.

⁹Tsîts ge koro îǂgoana ǀguri nî ǃkhōǁae tsî ǃnanide ǀguri; tsî ǃnaniǁîb nē îǂgoan dibats ge nî ǃhonarisa kai tabernakeli di ais aiǃâ.

¹⁰Tsîts ge korodisi ǂhīǃgaerode nî dī, ǀgui îǂgoab di ǀkhāb hîa ǃkhōǁaes di ǀkhâuǀams tawa hâb ǃnâ, tsî korodisi ǂhīǃgaerode ǁnā îǂgoab, ǀgamǁî ǃkhōǁaes tawa hâs di ǀkhāb ǃnâ.

¹¹Tsîts ge ǁkhāti korodisi ǂaiǂhao ǀurirona nî dī, tsîts ge ǂhaoǀurirona ǂhīǃgaerodi ǃnâ nî ǂgā, tsîts ge omsa nî ǃgaeǁae îs ǀgui xū kai.

¹²ǃGau ra xū-i, tentoms di îǂgoagu xa ra ǃgau-i, îǂgoab di ǃkhare-i, hîa ra ǃgau-i: ǁÎ-i ge tabernakeli di khaoǃgâga-ū nî ǂgāǂam.

¹³Tsî ǀgui ǂhâb nē ǀkhāb dib tsî ǀgui ǂhâb nau ǀkhāb dib tentoms îǂgoagu di gaxub tawa nî ǃgaub ge tabernakeli di ǀkhākha ū nî ǂgāǂam, nē ǀkhāb tsî nau ǀkhāb ai, ǁîbas nî ǃgū-aise.

¹⁴Tsîts ge ǁkhāti tentomsa ǃgū-ai-e nî dība ǀapaǀapahe hâ bairakhōgu ǀkha tsî pirikhōn ǀkha.

¹⁵Tsîts ge ǁkhāti tabernakela mâ hâ ǃnaoga nî dība akasiahain xa.

¹⁶Kōsib ǀgui ǃnaob dib ge nî disi ǂhâgu kō, tsî ǀgui ǂhâb tsî ǃkhare ǂhâb ge mâ ǃnaob hoab di ǂhababa nî kō.

¹⁷ǀGam ǃkhōǁaerab ge mâ ǃnaob hoaba nî ūhâ, leri ǃnâ hâ ǃapa-ūhairon khami, nēsa naus xōǀkhā; nētits ge ǃnaon tabernakeli din hoan ǀkha nî dī.

¹⁸Tsî ǃnaon tabernakeli dinats ge nēti nî dī: ǀGamdisi ǃnaona ǃkhawagas ǀkhāb ai ǃkhawagasǀî.

¹⁹Tsîts ge ǁkhāti hakadisi ǀhaiǀuriǂaide nî dī nē ǀgamdisi ǃnaon ǃnaga, ǀgam ǂaira ǀgui ǃnaob ǃnaga ǁîs di ǀgam ǃkhōǃkhaira tawa, tsî ǀgam ǂaira nau ǃnaob ǃnaga ǁîs di ǀgam ǃkhōǃkhaira tawa.

²⁰Tsî nau ǀkhāb tabernakeli dib ain ge ǁkhāti ǀgamdisi ǃnaona nî hâ ǀapas ǀkhāb ai.

²¹ǁÎn di hakadisi ǃhuniǀuriǂaidi ǀkha: ǀGam ǂaira ǀgui ǃnaob ǃnaga tsî ǀgam ǂaira nau ǃnaob ǃnaga.

²²Tsî tabernakeli di huriǂoas ǀkhāb aits ge ǃnani ǃnaoga nî dī.

²³ǁKhātits ge ǀgam ǃnaokha nî dī tabernakeli di ǁhôaǃnaob ase ǃnamkha hoakha ai.

²⁴Tsî kha ge hoakha ǃnagaba xu ǀgēkha xase nî ǃgaeǁaehe; tsî kha ge ǁkhāti ǀgēkha xase ǁîb di ǂamǃnâs tawa nî ǃgaeǁaehe ǃganub ǀkha. ǁNāti i ge nî ī ǁî ǀgamkha ǀkha, ǁhôaǃnaob ase kha ge nî hâ.

²⁵ǁNāti gu ge ǁkhaisa ǃnaoga nî ī, ǁîgu di ǃhuniǀuriǂaidi ǀkha: Disiǃnaniǀa ǂaide, ǀgam ǂaira ǀgui ǃnaob ǃnaga tsî ǁkhawa ǀgam ǂaira ǀgui ǃnaob ǃnaga.

²⁶Tsîts ge ǁkhāti daoǁkhaega nî dī akasiahain xa: Korode ǀgui ǀkhāb tabernakeli dib di ǃnaon tawa.

²⁷Tsî koro daoǁkhaega nau ǀkhāb tabernakeli dib di ǃnaob tawa; tsî ǁkhāti koro daoǁkhaega tabernakeli di ǃnaogu tawa ǀgam ǃnamkha ai, huriǂoasǀî.

²⁸Tsî ǁaegub daoǁkhaeb ge ǃnaogu ǁaegu nî hâ nē ǀamsa xu nau ǀams kōse ra sīse.

²⁹Tsîts ge ǃnaona ǃhuniǀurib ǀkha nî ǃkhûǀkhā tsî ǁîn di ǃganunats ge tani-ūdagu di ǂgâǃkhaise ǃhuniǀurib ǀkha nî dī, daoǁkhaegats ge ǁkhāti ǃhuniǀurib ǀkha nî ǃkhûǀkhā.

³⁰ǃNubaits ge tabernakela nî ǂnûikhâi, ǁîb di dommi ǃhommi aits go ǁgauheba ǃoa.

³¹ǁNās khaoǃgâts ge ǃgū-aiba nî dī ǀhommiǂhoab xa tsî purpurǀapab xa tsî îǀapab xa tsî ǀui ǀhôahe hâ lineǃkhai-i xa; ǁāǁāǁkhāsabe dommi aib ge nî dīhe xerugu ǀkha.

³²Tsîts ge ǁîba haka ǂkhâǃnâhaigu akasiahain digu ai nî ǂgāmâi, ǃhuniǀurib ǀkha ǃkhûǀkhāhe hâse; ǁîgu di ǂhaoǀuriron ge ǃhuniǀurib xa nî dīhe haka ǀhaiǀuriǂaidi ai ra mâse.

³³Tsîts ge ǃgū-aiba ǂhaoǀuriron ǃnaga nî ǂgāmâi, tsîts ge ǀhûǀguitimîs di ǂgaesa ǁnāpa ǃgū-aib ǃnâ nî ūǂgâ; tsîb ge ǃgū-aiba ǀgorasa nî dība du ǃanub tsî ǃanun di ǃanub tsîkha ǁaegu.

³⁴Tsîts ge ǂkhîbagus di aisa ǀhûǀguitimîs di ǂgaes ai nî mâi ǃanun di ǃanub ǃnâ.

³⁵Tsîts ge tāba ǃgū-aib ǃauga nî mâi tsî kandelara tāb ǃoa-ai, tabernakeli di ǃnammi tawa ǃkhawagasǀî; tsîts ge tāba ǀapasǀî nî mâi.

³⁶Tsîts ge ǁkhāti tentoms di dao-ams tawa ai-e nî dī ǀhommiǂhoab xa, tsî purpurǀapab xa tsî skarlakǀapab xa, tsî ǀuise ǀhôahe hâ lineǃkhai-i xa anansa sîsenai-e.

³⁷Tsîts ge ǁkhāti nē aisa koro ǂkhâǃnâhaiga nî dība sitimhain xa, tsî ǃhuniǀurib ǀkha nî ǃkhûǀkhā; ǁîgu di ǂhaoǀuriron ge nî ǃhuniǀuri; tsîts ge ǁîga koro ǂaib ǂaide nî ǂnâba.