Read Khoekhoegowab Eksodus 27 Bible Online

Eksodus 27 - Khoekhoegowab bible

Eksodus 27

¹Tsîts ge ǁkhāti altarsa nî dī akasiahain xa; koro ǂhâgu kōses ge nî gaxu tsî koro ǂhâgu kōse ǂhaba (hakaǁhôaxas ge nē altarsa nî ī) tsî ǃnona ǂhâgu kōse ǀgapi.

²Tsîts ge ǁîs di ǁnâga haka ǁhôagu âs ai nî dī, ǁîga xu gu ge ǁnâgu âsa nî ǀkhī; tsîts ge ǂai-i ǀkha ǁîsa nî ǃkhûǀkhā.

³Tsîts ge ǁkhāti xapana nî dī, tsaob âsa nî ǃkhōǃoana, ǁkhāti ǁîs di sîsenbē-ūxūn, ǁîs di ǀgapiǃoredi, ǁîs di forkn tsî ǁîs di ǂnomǃorede; ǁîs di sîsenūxūn hoanats ge ǂaib xa nî dī.

⁴Tsîts ge ǁîsa rostera nî dība, ǂaib xa dīhe hâb, ǂhams khami ība; tsîts ge ǁnā ǂhams khami ī rosteri tawa ǃganuna nî dī ǁîb di haka ǁhôagu tawa.

⁵Tsîts ge ǁîba nî ǁgui altars di ǃgûǂnamipes ǃnagaba xu, îb ǂhams khami ī rostera altars ǁaegub ǃnâ hâ.

⁶Tsîts ge ǁkhāti altarsa tanihaikha nî dība, tanihaikha akasiahain xa; tsîts ge ǁîkha ǂaib ǀkha nî ǃkhûǀkhā.

⁷Tsî tanihaikha ge ǃganun ǃnâ nî ǂgāhe, î kha tanihaikha altars di ǃnamkha hoakha ai hâ, tanihes ra hîa.

⁸Tsîts ge ǁîsa ǃnaon ǀkha nî dī ǃgoaǃnāse; ǁîb ge ǃhommi ai ǁgau tsis ǁkhās khamits ge nî dī.

⁹Tsîts ge ǁkhāti ai-ommi tabernakeli diba nî dī; ǃkhawagasǀî hâ ǃgū-aiǃkhaigu ai-ommi digu ge nî ǀui ǂgâǃnâguhe hâ lineǃkhai, ǀguikaidisi ǂhâgu kōse ǀgui ǀkhāb ai.

¹⁰ǁÎgu di ǀgamdisi ǂkhâǃnâhaigu tsî ǁîgu di ǀgamdisi ǂaidi ge nî ǂaib ǀkha dīhe; nē ǂkhâǃnâhaigu di ǂhaoǀurin tsî ǁîn di ǃgae-ūdan âgu ge nî ǀhaiǀuri.

¹¹Tsî ǁnās ǁkhās xasen ge ǃgū-aiǃkhain ǀapasǀî hâ ǀkhāb dina nî ǀguikaidisi ǂhâgu kō; ǁîgu di ǀgamdisi ǂkhâǃnâhaigu tsî ǀgamdisi ǂaidi âgu ge ǂaib xa nî dīhe; ǂhaoǀurin ǂkhâǃnâhaigu din tsî ǁîn di ǃgae-ūdan ge nî ǀhaiǀuri.

¹²Tsî ǂhabasib ai-ommi diba-ū huriǂoasǀî hâ ǀkhāb ain ge ǃgū-aiǃkhaiga nî hâ, korodisi ǂhâgu kōse; ǁîgu di ǂkhâǃnâhaigu ge nî disi tsî ǂaidi âgu ge nî disi.

¹³Tsî ǂhabasib ai-ommi dib ge aiǂoasǀî hâ ǀkhāb ai nî korodisi ǂhâgu kō.

¹⁴Nēti: Disikoroǀa ǂhâgu ǃgū-aiǃkhaigu digu ge ǀgui ǀkhāb ai nî hâ: ǂKhâǃnâhaigu ân ge nî ǃnona, tsî ǂaidi âga nî ǃnona.

¹⁵Tsî disikoroǀa ǂhâgu ǃgū-aiǃkhaigu digu ge nau ǀkhāb ai nî hâ: ǂKhâǃnâhaigu ân ge nî ǃnona tsî ǂaidi âga nî ǃnona.

¹⁶Tsî dao-ams ai-ommi dis ǃnâb ge ǃgū-aiǃkhaiba nî hâ ǀgamdisi ǂhâgu kōba, ǀhommiǂhoab xa tsî purpurǀapab xa tsî îǀapab xa tsî ǀui ǀhôahe hâ lineǃkhaib xa anansîsenai-e, ǂkhâǃnâhaigu ge nî haka tsî ǂaidi âga nî haka.

¹⁷ǂKhâǃnâhaigu ai-ommi digu hoagu ge ǀhaiǀuri-anixūn ǀkha nî ǃkhûǂnamipehe; ǂhaoǀuriron âgu ge nî ǀhaiǀuri, tsî ǂaidi âgu ge nî ǂai.

¹⁸Gaxub ai-ommi dib ge nî ǀguikaidisi ǂhâgu kō, tsî ǂhabasib nî mâ ǀkhāb hoab ai korodisi tsî ǀgapisib nî koro ǂhâgu kō, ǀui ǀhôahe hâ lineǃkhaib xa; tsî ǂaidi âgu ge nî ǂai.

¹⁹Tsî sîsenūxūn tabernakeli din xasa, ǁîn ge sîsenni ân hoab ǃnâ, ā, ǃgaeǁareǀurin âb tsî ai-ommi di ǀurin hoan ge nî ǂaiǀuri.

²⁰Israeli ôana ǁnâi mîmā, în ūhāba tsi ǃanu olib ǀkherab dib xa ǃamamxūsa ǁgâibahe hâba, î di ǃamamǀaede hugaǀgui ǁîb ǀkha ǃamamhe.

²¹Tentoms ǀhûs dis ǃnâ, ǂgāmâiǃkhaib ǀhûǀguitimîs aiǃâ hâb ǃauga, ǁnāpa gu ge Aronni tsî ǁîb di ôagu tsîga ǁîsa nî ǁāǁā, ǃuisa xu ǁgoas kōse, ǃKhūb di ais aiǃâ; nēs ge ǀamo ǂnûiǂgāse nî ība ǁîn di ǃhaodi hoade Israeli ôan ǃnâ.