Read Khoekhoegowab Eksodus 28 Bible Online

Eksodus 28 - Khoekhoegowab bible

Eksodus 28

¹ǁNās khaoǃgâts ge sa ǃgâsab Aronni tsî ǀgôagu âba ǁîb ǀkha satsa nî ǀgū kai Israeli ôan di ǁaeguba xu, pristersîsenǃâsa gu nî tita ǃoabase. ǁNāgu ge Aronni, Nadab, Abihub, Eleasari tsî Itamari tsîga, Aronni ôaga.

²Tsîts ge sa ǃgâsab Aronna ǃanu sarana nî dība ǂkhaisib ase tsî anixūb ase.

³Tsîts ge ǁkhāti gā-ai ǂgaob â-in tita gagas gā-aisib dis ǀkha ge ǀoaǀoan ǀkha nî ǃhoa, în Aronna sarana dība, ǁîban nî khaise, îb pristersîsenǃâsa tita ǃoaba, ti.

⁴Tsî nēn ge saran ǁîn nî dīna: ǁKhaib di ǃkhaib tsî efob tsî ǂamsarab tsî mûrodi xa ǀoa hâ sarab tsî hūs tsî ǃgaesenni tsîna; nētin ge ǁnâi sa ǃgâsab Aronna ǃanu sarana nî dība, tsî ǁîb di ôagu tsîn, pristersîsenǃâsa gu nî tita ǃoabaga.

⁵Tsîn ge ǁkhāti nî ū ǃhuniǀurib tsî ǀhommiǂhoab tsî purpurǀapab tsî îǀapab tsî ǀui ǀhôahe hâ lineǃkhaib tsîna.

⁶Tsîn ge efoba nî dī ǃhuniǀurib xa tsî ǀhommiǂhoab xa tsî purpurǀapab xa tsî îǀapab xa tsî ǀui ǀhôahe hâ lineǃkhaib xa hoan xa ǁkhā sîsendommi ai.

⁷ǁÎb ge ǃnamkha hoakha ai ǃgaeǁae ra ǃhâukha ǃhōkha dikha nî ūhâ, îb ǃgaeǁaehe hâse hâ.

⁸Tsî ǃgaesenǃhâub efob âb dib ǁîb ai hâb: ǁÎb ge ǁāǁāǁkhāsa sîsenni âb khami nî ī ǁkhā xūn xa: ǃHuniǀurib xa tsî ǀhommiǂhoab xa tsî purpurǀapab xa tsî îǀapab xa tsî ǀui ǀhôahe hâ lineǃkhaib xa.

⁹Tsîts ge nî ǀgam sardoniksǀuira ū tsî nî ǁîra ai Israeli ôan di ǀonde xoaǂgā:

¹⁰ǃNani ǀondi ân ǀgui ǀuis ai, tsî ǀnî ǃnani ǀonde nau ǀuis ai ǁîn di ǃnaes ǃoa;

¹¹ǀuixoaǂgā-aogu di sîsenni ǃoa, segeln ra xoaǂgāhe khamits ge nē ǀgam ǀuira nî xoaǂgā Israeli ôagu di ǀondi ǀkha; tsîts ge ǁîra nî dī, î ra ǃhuniǀuriǂgaera xa hâǂgāhe hâ.

¹²Tsîts ge ǀgam ǀuira efob ǃhâukha ǃhōkha dikha tawa nî ǂnûi Israeli ôan di ǂâiǂâisenǀuise; tsî Aronni ge ǀondi âga ǀgam ǃhōkha âb ai nî tani ǂâiǂâisenxūse ǃKhūb di ais aiǃâ.

¹³Tsîts ge ǁkhāti ǃhuniǀuriǂgaerode nî dī.

¹⁴Tsîts ge ǀgam ǁkhamrora nî dī ǃhuniǀurib ǀguib ǀkha; ǀguiǀamǀam rasets ge ǁîra nî dī ǀhôahe hâ kuru-ai-i ǃoa; tsîts ge ǀhôahe hâ ǁkhamrora ǂgaera tawa nî ǂgā.

¹⁵Tsîts ge ǁkhāti ǁkhaib ǃkhai-i ǂhanub di-e nî dī hoan xa ǁkhā dommi ai; efob ra dīhe khamits ge ǁî-e nî dī; ǃhuniǀurib xa tsî ǀhommiǂhoab xa tsî purpurǀapab xa tsî îǀapab xa tsî ǀui ǀhôahe hâ lineǃkhaib xats ge ǁî-e nî dī.

¹⁶Hakaǁhôaxase i nî ī tsî ǃhonarisa; ǀgui ǂhaob kōse i ge nî gaxu, tsî ǀgui ǂhaob kōse i ge nî ǂhaba.

¹⁷Tsîts ge ǁî-e ǃnamǂgāhe hâ ǀuidi ǀkha nîra ǀoaǀoa, haka ǁgaradi ai; ǀgui ǁgaras ge nî sardi tsî ǀguis topa tsî ǀguis karbonkel. Nēs ge ǂguro ǁgarasa.

¹⁸Tsî ǀgamǁî ǁgaras ge nî smarag tsî ǀgui safir tsî ǀgui diamant.

¹⁹Tsî ǃnonaǁî ǁgaras ge nî ǀgui hiasint tsî ǀgui axats tsî ǀgui ametis.

²⁰Tsî hakaǁî ǁgaras ge nî ǀgui turkoe tsî ǀgui sardoniks tsî ǀgui jaspi; ǁîdi ge ǁgaradi hoadi ai ǃhuniǀurib ǀkha nî hâǂgāhe.

²¹Tsî nē ǀuidi ge disiǀgamǀa ǀondi Israeli ôagu didi ǀkha nî hâ, ǁîgu di ǀondi ǀkha; ǁgâiǂganxūdi ra xoaǂgāhe khami nî xoaǂgāhe, mâs hoas ǁîs di ǀons ǀkha, disiǀgamǀa ǃhaodi ǃoa.

²²Tsîts ge ǁkhāti ǁkhaib di ǃkhaib tawa ǀguitikōse ǀamǀam hâ ǁkhamrora nî dī ǀhôahe hâ kuru-ai-i ǃoa ǃhuniǀurib xa.

²³Tsîts ge ǁkhāti ǁkhaib di ǃkhaib tawa ǀgam ǃhuniǀuriǃganura nî dī; tsîts ge ǀgam ǃganura ǁkhaiǃkhaib di ǀamra tawa nî ǂnûi.

²⁴ǁNās khaoǃgâts ge ǁnā ǀgam ǀhôahe hâ ǃhuniǀuriǁkhamrora ǀgam ǃganura ǃnâ nî ǂgā ǁkhaib di ǃkhaib ǀamra tawa.

²⁵Xawe ǀgam ǀamra ǁnā ǀhôahe hâ ǀgam ǁkhamrora dirats ge ǁnā ǀgam ǂgaerora tawa nî ǂgā; tsîts ge ǁîra ǂgaeǃapaǃhâun efob din tawa nî ǂnûi, ǂhanuse ǁîb ais di ǀkhāb ai.

²⁶Tsîts ge ganupe ǀnî ǀgam ǃhuniǀuriǃganura dī, tsîts ge ǁîra ǀgam ǀamra ǁkhaiǃkhaib dira tawa nî ǂnûi ǃnāb ǃnâ hâ ǂomamǃgâb tawa, efob di ǀkhāb ai;

²⁷tsîts ge ǁkhāti ǀnî ǀgam ǃhuniǀuriǃganura nî dī ǀgam ǂgaeǃapaǃhâukha efob dikha tawats nî ǂnûira, ǃnaga, aiǃâ hâ ǀkhāb ai, ǃgaeǁares âb ǃoa-ai, ǀgapise ǁāǁāǁkhāsa ǃhâub efob dib ai.

²⁸Tsî gu ge ǁkhaib di ǃkhaiba ǃganura âb ǀkha efob di ǃganura tawa nî ǃgaeǃapa ǀhomǂhoa tsurib ǀkha, îb ǁāǁāǁkhāsa ǃhâub efob dib ai hâ ti; tsî ǁkhaib di ǃkhaib ge efoba xu ǀgorahe tide.

²⁹Nētib ge Aronna ǀondi Israeli ôagu dide ǁkhaib di ǃkhaib ǂhanub dib ai nî tani, ǂgaob âb ai, ǃanusib ǃnâb ga ǂgâ ǃnubai, ǂâiǂâisens ase ǃKhūb di ais aiǃâ hugaǀgui.

³⁰Tsîts ge ǁkhāti ǁkhaib di ǃkhaib ǂhanub dib ǃnâ Urims tsî Tumims tsîra nî ǂnûi, Aronni di ǂgaob ai ra nî hâga, ǃKhūb di ais aiǃâb ga ǂgâ ǃnubai. Nētib ge Aronna ǂhanub Israeli ôan diba hugaǀgui ǂgaob âb ai nî tani ǃKhūb di ais aiǃâ.

³¹Tsîts ge ǁkhāti anaǂamxūb efob diba hoaragase ǀhommiǂhoab xa nî dī.

³²Tsî danas âb di soas ge ǁaegub âb ǃnâ nî hâ; nē ǁhūs ge ǂomamǃgâ-e nî ūhâǂnamipe anansa sîsenai-i xa; ǁâsarab di ǁhūs ases nî ǁîb tawa hâ, doa i tidega.

³³Tsî ǂomamǃgâgu tawats ge granatǂûna nî dī ǀhommiǂhoab xa, tsî purpurǀapab xa, tsî îǀapab xa; ǁîb di ǂomamǃgâb ǂnamipe, tsî ǃhuniǀuriǀōǀōxūrode ǁîn ǁaegu.

³⁴ǀGui ǃhuniǀuriǀōǀōxūros nî hâse, ǁîs khaoǃgâ ǁkhawa ǀgui granatǂûs, tsî ǁkhawa ǀgui ǃhuniǀuriǀōǀōxūros tsî ǀgui granatǂûs, anaǂamxūb ǂnamipe.

³⁵Ob ge Aronna ǁîba nî ana ǃoabas ǃnâ; ǀōb âb nî ǁnâuhese, ǃanub ǃnâb ga ǂgâ ǃnubai ǃKhūb di ais aiǃâ, tsî ǂoaxab ka ǃnubai ǁōb tidega.

³⁶Aiǃâts ge ǀuriǃâsa nî dī ǃhuniǀurib ǀguib ǀkha, tsîts ge ǁîs ǃnâ nî xoa segelxoaǂgās ǀkha: ǃANUSIB ǃKHŪB DIB, ti.

³⁷Tsîts ge ǁîsa ǀhomǂhoa tsurib ǀkha nî ǁapoǁapo, ǃkhaib tawas nî hâga; aiǃâ hâ ǀkhāb ǃkhaib dib ais ge nî hâ.

³⁸Tsîs ge ǃūs Aronni dis ai nî hâ, îb Aronna tani ǂhanuoǃnâsib ǃanu xūn, ǁnā xūn, Israeli ôan nî khai hân dib, ǁîn nî khai hâ xūn hoan ǃnâ; tsîs ge hugaǀgui ǃūs âb ai nî hâ, ǃKhūb di ais aiǃâb nî ǁîna ǃgâiǃgâise.

³⁹ǁKhātits ge saraba nî dī, ǂgāǃnâguhe hâba ǀui ǃuri lineǃkhaib xa; tsîts ge ǃkhaib ona nî dī ǀui ǃuri lineǃkhaib xa; xawe ǃgaesennats ge anansa sîsenai-i ǃoa nî dī.

⁴⁰Tsîts ge ǁkhāti Aronni ôaga saraga nî dība, tsîts ge ǁîga ǃgaesenga nî dība, tsîts ge ǁîga ǀgapade nî dība ǂkhaitsi tsî anixūse.

⁴¹Tsîts ge ǁîna ǃgâsab âts Aronna nî ana, tsî ǁkhāti ǁîb di ôaga; tsîts ge ǁîga nî ǂkhau tsî ǁîgu di ǃomma nî ǀoaǀoa tsî ǁîga nî khai, pristersîsenǃâsa gu nî tita ǃoabase.

⁴²Îts ǁkhāti lineǀnūsarana ǁîga dība, taotaosa ǃkhais di ǁgans nî ǃgū-aihese; ǁîn ge kamanaba xu ǀkhoedi kōse nî sī.

⁴³Tsî Aronni tsî ǁîb di ôagu tsîgu ge ǁîna nî tani, ǀhûs di tentoms ǃnâ gu ga ǂgâs, altarsa gu ga ǀgūs hoasa, ǃanusib ǃnâ gu nî ǃoabase; î gu tā ǂhanuoǃnâsi-e tani tsî ǁō, ti. Nēs ge ǀamo ǂnûiǂgāse nî ība ǁîb tsî surib âb tsîna, ǁîb khaoǃgâ.