Read Khoekhoegowab Eksodus 29 Bible Online

Eksodus 29 - Khoekhoegowab bible

Eksodus 29

¹Tsî nēs ge ǃkhais ǁîgats nî dībasa, khaihe gu nîse, pristersîsenǃâsa gu nî tita ǃoabaga. Gomaba ū, gomas ôab tsî ǀgam ūo ǂkharagūkha,

²tsî ǀkhuruǀkhuruhe tama pereb tsî ǀkhuruǀkhuruhe tama ǁganperedan olib ǀkha ǀhomamhe hân tsî ǀkhuruǀkhuruhe tama ǂhaba peredan olib ǀkha ǂkhauhe hâna. Tsaura tsampereb xats ge ǁîna nî dī.

³Tsîts ge ǁîna ǀharu-i ǃnâ nî ǁgui, tsîts ge ǀharus ǃnâ ǁîna nî sī ǁgui gomab tsî ǂkharagūkha ǀkha.

⁴ǃNubaits ge Aronni tsî ǁîb di ôaga nî ǀgū kai ǀhûs di tentoms tawa; tsîts ge ǁîga ǁgam-i ǀkha nî ǁā.

⁵ǃNubaits ge sarana ū tsî ǁîna Aronna nî ǂgaeǂgā sarab tsî anaǂamxūb efob dib tsî efob tsî ǁkhaib di ǃkhaib tsîna; tsîts ge ǁîba nî ǃgae ǁāǁāǁkhāsa ǃhâub efob dib ǀkha.

⁶Tsîts ge ǀgapasa danas âb ai nî ǀgapa; ǃanusib di kronsats ge ǀgapas ai nî ǂnûi.

⁷Tsîts ge ǂkhauǁnuiba ū tsî danas âb ai nî ǂnâ. Nētits ge ǁîba nî ǂkhau.

⁸ǁNās khaoǃgâts ge ǁîb di ôaga nî ǀgū kai tsîts ge ǁîga sarana nî ana kai.

⁹Tsîts ge ǁîga ǃgaesenni ǀkha nî ǃgae, Aronni tsî ǁîb di ôagu ona; tsîts ge ǁîga ǀgapade nî ǀgapa, î gu pristersîsenǃâsa ǀamo ǂnûiǂgāse ūhā, ti, tsîts ge ǃommi Aronni diba nî ǀoaǀoa tsî ǁîb ôagu di ǃommi tsîna.

¹⁰Tsîts ge gomaba ǀhûs di tentoms ǀgūse nî ūhā; o gu ge Aronni tsî ǁîb di ôagu tsîga ǁîgu di ǃomga gomab di danas ai nî ǁgui.

¹¹Tsîts ge gomaba nî ǂā ǃKhūb di ais aiǃâ, ǀhûs di tentoms di ǁāb aiǃâ.

¹²ǁNās khaoǃgâts ge gomab di ǀaob xa ū tsî nî ǀkhunub âts ǀkha altars di ǁnâgu ai dī, tsî ǃgaub ra ǀaob hoabats ge altars di ǃhūb ai nî ǁhōǂui.

¹³Tsîts ge ǁkhāti kaub hoaba nî ū, ǃnāb dina ra ǃgū-aib, tsî âiba ra hâǂgā ǁnôab tsî ǀgam ǃnaira tsî kaub, ǁîra ai hâb tsîna, îts ǁîna altars ai ǂhubi.

¹⁴Xawe ǁgans gomab dis tsî ǁîb di khōb tsî ǂhaub âb tsînats ge ǀaes ǀkha nî khauǃkhū ǁgoeǃkhais ǃauga: ǁOreǁguibas a xui-ao.

¹⁵ǁNās khaoǃgâts ge ǀgui ǂkharagūba nî ū tsî Aronni tsî ǁîb di ôagu tsîgu ge ǃomgu âga ǂkharagūb di danas ai nî ǁgui;

¹⁶tsîts ge ǂkharagūba nî ǂā, tsîts ge ǀaob âba ū tsî nî altarsa ǀgapiǂnamipe.

¹⁷Îts ǂkharagūba ǃâdi âb ǃnâ ǀgora; îts ǃnāb âb tsî tîra âba ǁā îts ǁîna ǃâdi âb ai tsî danas âb tawa ǁgui.

¹⁸Nētits ge ǂkharagūb hoaba altars ai nî ǂhubi; ǁîs ge ǃKhūba khauǁguibase ība, ǀnamǀnamsa ǁamase, ǁîs ge ǃKhūba ǀaeǁguibase ība.

¹⁹Ots ge nau ǂkharagūba nî ū, tsî gu ge Aronni tsî ǁîb di ôagu tsîga ǃomgu âga ǂkharagūb di danas ai nî ǁgui;

²⁰tsîts ge ǂkharagūba ǂā tsî ǀaob âb xa nî ū tsîts ge nî dī amǀkhāb ǂgaeǂhuris Aronni dis ai tsî amǀkhāb ǂgaeǂhuris ǁîb ôagu dis ai tsî ǁnās ǁkhās xase kaitsiǁgubes ǁîgu amǀkhāb ǃommi dis ai, tsî kaitsiǁgubes ǁîgu amǀkhāb ǂais dis ai; tsîts ge ǁnā ǀaoba altars ai nî ǀgapiǂnamipe.

²¹ǃNubaits ge ǁnā ǀaob, altars ai hâb xa nî ū tsî ǂkhau-olib xa, tsîts ge Aronni ai tsî saran âb ai nî ǀgapi, tsî ǁîb ôagu ai tsî ǁîb ôagu di saran ai ǁîb ǀkha; îb ǃanu ǁîb tsî ǁîb di saran, tsî ǁkhāti ǁîb di ôagu tsî ǁîb ôagu di sarana ǁîb ǀkha.

²²ǁNās khaoǃgâts ge ǂkharagūb di kauba nî ū tsî ǂareb on tsî ǁkhāti ǁnā kaub ǃnāb dina ra ǃgū-aib tsî âiba ra hâǂnami ǁnôab tsî ǀgam ǃnaira, kaub ǁîra ai hâb ǀkha, tsî amǀkhāb ǁgarab tsîna, ǂkharagūb ǀoaǀoaǁguibadi dib a amaga,

²³tsî ǀgui pereb tsî ǀgui ǁganperedab ǁnuib dib tsî ǂhaba pereb xa ǀkhuruǀkhuruhe tama peren di ǀharus ǃKhūb di ais aiǃâ hâsa xu.

²⁴Îts ǁîn hoana ǁgui Aronni di ǃomkha ai tsî ǁîb ôagu di ǃomgu ai, îts ǁîna gongonma gongonǁguibas ase ǃKhūb di ais aiǃâ.

²⁵Îts ǁîna ǁnās khaoǃgâ ū ǁîgu ǃomǁaeba xu, îts ǁîna ǂhubi altars ai khauǁguibas ǂama ǀnamǀnamsa ǁamase ǃKhūb di ais aiǃâ; ǀaeǁguibas, ǃKhūb ra dībahes a amaga.

²⁶Îts ū ǁkhaib, ǁnā ǂkharagūb ǀoaǀoaǁguibadi dib, hîa Aronni diba, îts ǁîba gongonma gongonǁguibase ǃKhūb di ais aiǀâ; ob ge ǁîba nî sa amǃnâ.

²⁷Tsîts ge ǁkhaib gongonǁguibas diba nî khai, tsî ǁgarab ǁguibas dib hîa gongonhe tsî nî ǁguibaheb, ǁnā bairab ǀoaǀoaǁguibas dib xa, ǁnāb Aronni dib tsî ǁnāb, hîa ǁîb ôagu dib xa.

²⁸Tsîs ge ǁîsa Aronni tsî ǁîb di ôagu tsîga ǀamo ǂnûiǂgāse nî ība Israeli ôan ǂama, ǃkhōkhâiǁguibas a amaga. Tsî ǃkhōkhâiǁguibas ge Israeli ôan xa nî dīhe ǁîn di ganganǁguibadi xa; ǁîn di ǃkhōkhâiǁguibas ge ǃKhūba nî hâba.

²⁹Tsî ǃanu saran Aronni di nî ī hâ in, ǁîn ge ǁîb khaoǃgâ ǁîb ôagu di nî ī, ǁîn ǃnâ gu nî ǂkhauhese, tsî ǁîn ǃnâb nî ǃommi âga ǀoaǀoahega.

³⁰Hû tsēdi kōseb ge ǁnāb, ǀgôagu âb xa nî prister kaiba ǁîna nî ana, ǁnāb, ǀhûs di tentoms ǃnâ nî ǂgâba, ǃanusib ǃnâb nî ǃoabase.

³¹Tsîts ge ǂkharagūb ǀoaǀoas diba nî ū tsî ǁgans âba ǃanu ǃkhais tawa nî sâi.

³²Tsî Aronni tsî ǁîb di ôagu tsîgu ge ǁgans nē ǂkharagūb disa nî ǂû, tsî pereb, ǀharus ǃnâ nî hâb, dao-ams ǀhûs di tentoms dis tawa.

³³O gu ge ǁnā xūna nî ǂû, ǁîn ǀkha ǂkhîbagusa nî dīhe hâ in, ǃommi âgu nî ǀoaǀoahese tsî khaihe gu nîse; xawe ǃhaokhoe-i ge ǁîn xa ǂû tide, ǁîn a ǃanu amaga.

³⁴Tsî xū-i ga ǃgauo ǁnā ǁgans ǀoaǀoaǁguibadi dis xas karao, ǁnā pereb xas karao, nau ǁgoas kōse, ots ge ǃgau go xū-e ǀaes ǀkha nî khauǃkhū; ǁî-i ge ǂûhe tide, ǃanu i a xui-ao.

³⁵Ots ge Aronni tawa tsî ǁîb ôagu tawa hoan ǃnâ ǁnāti nî dī, tita ge mîba tsî khami: Hû tsēdi kōsets ge ǃommi âga nî ǀoaǀoa.

³⁶Tsîts ge ǁkhāti tsēkorobe gomab ǁoreǁguibas diba nî ǀhami ǂkhîbagudīs ase, tsîts ge altarsa nî ǁore-o kai, ǁîs aits ra dī ǂkhîbagudīs ǀkha; îts ǁîsa ǂkhau, khaihes nîse.

³⁷Hû tsēdi kōsets ge altarsa ǂkhîbagusa nî dība tsî ǁnāti nî khai. Nētib ge ǁnā altarsa ǃanusigu di ǃanusise nî ī: Mâ-i, altarsa ga tsâǀkhā-i hoa-i, ǁî-i ge nî ǃanu.

³⁸Tsî nēs ge altars aits nî ǂhomisa: ǀGam ǁkhaokha ǀgui kurib â-ikha mâ tsēs hoas ai hugaǀgui.

³⁹ǀGui ǁkhaobats ge ǁgoas ai nî ǁāǁā; xawe nau ǁkhaobats ge nî ǁāǁā ǃui-amǁaeb ai.

⁴⁰Efab di disiǁîǃâs tsampereb dis hîa hinǀguiros di hakaǁîǃâs olib dis ǀkha; tsî ǂnâǁguibas ase hakaǁîǃâs ǀgui hinǀguiros ǂauxûib dib ǁnā ǀgui ǁkhaob tawa.

⁴¹Tsî nau ǁkhaobats ge ǀgam ǃuira ǁaega nî ǂhomi; ǁîb ǀkhats ge nî dī ǁgoas di ǂûǁguibas ǀkhas ǁkhās khami tsî ǂnâǁguibas âs ǀkhas ǁkhās khami ǀnamǀnamsa ǁamase. ǀAeǁguibases ra ība ǃKhūba.

⁴²Hâhâ ra khauǁguibases nî ī sadu ǃhaodi ǃnâ tentoms ǀhûs dis di ǁāb tawa ǃKhūb di ais aiǃâ. ǁNāpa ta ge tita sadu ǀkha nî ǀhû, gowaǀkhā du ta nîse ǁnāpa.

⁴³Tsî ǁnāpa ta ge tita Israeli ôan tawa nî sī, khaihen nîse ti ǂkhaisiba xu.

⁴⁴Tsî tita ge ǀhûs di tentomsa nî khai tsî altars ona. Tita ge ǁkhāti Aronni tsî ǁîb di ôagu tsîga nî khai, tita gu nî pristersîsenǃâsa ǃoabase.

⁴⁵Tsî tita ge Israeli ôan ǁaegu nî ǁan, tsî tita ge ǁîna Elose nî ība.

⁴⁶Tsîn ge nî ǂan, tita ge a ǃKhū, ǁîn di Elota a ǃkhaisa, Egipteǃhūba xu ǁîna ge ǂgaeǂguiǂui ta, ǁîn ǁaegu ta nî ǁanga; tita ge ǃKhūta, ǁîn di Elota.