Read Khoekhoegowab Eksodus 3 Bible Online

Eksodus 3 - Khoekhoegowab bible

Eksodus 3

¹Tsî Moseb ge Jetrob, ǀuiǁgûb âb, Midianni pristeri di gūna gere ǃûi, tsîb ge gūna ǃgaroǃhūb ǃnâ gere ǂgaeǂguiǂgā tsîb ge Elob ǃhommi, Horeb kōse ge sī.

²Tsî ǀhomǃgāb ǃKhūb dib ge ǁîb tawa ǁkhūs ǁaeguba xu ǀaeǁhabu-i ǃnâ ge ǂhai; ob ge ge kō, tsî mû, ǁkhūs ge ǀaes ǀkha khau, xawes ge ǁkhūsa khauǃkhūhe tama ge hâ i.

³Ob ge Moseba ge mî: Tita ge ǁnāǀî ǃgû tsî ǁnā kai ǀaesa nî sī kō, tare xū-i ǃaromas ǁkhūsa khauǃkhūhe tamasa.

⁴Tsî ǃKhūb ge mûo, ǁnāǀîb ra ǃgû ǃkhaisa, kōb nîse, ob ge Eloba ǁkhūs ǁaeguba xu ǂgai bi tsî: Mosetse, Mosetse! ti ge mî. Ob ge ǁîba: Mû, nē ta a, ti ge mî.

⁵Ob ge ǁîba ge mî: Tā ǀgū nēpa; ǁharora âtsa sa ǂaira xu ǂgaeǂui, ǁîs aits mâ ǃkhais a ǃanu ǃhū xuige.

⁶Tsîb ge ǁîba ǃaruǀî ge mî: Tita ge sa îb di Elota, Abrahammi di Elota tsî Isaki di Elota tsî Jakob di Elota. Ob ge Moseba ais âba ge gaugau, Eloba kōǀîsab ra ǃao amaga.

⁷Ob ge ǃKhūba ge mî: Tita ge go mû ti ǁaes Egipteb ǃnâ hâs di ǁgâiǀāba, tsî ta ge ǁîn di ǃausa go ǁnâu, ǁîn di doeǁga-aogu ǃaroma; ǁîn di tsûga ta ge a ǂan.

⁸ǁNā-amaga ta ge tita go ǁgôaxa, Egipteǁîn di ǃomǁaeba xu ta nî ǁîna orega tsî nē ǃhūba xu ta nî ǁîna ǂgaeǂguiǃapase, ǃgâi tsî hara ǃhūba ǃoa, ǃhūb, daib tsî danib tsîkha ra dâuǃnâba, ǁanǃkhaib, Kanaanǁîn, Hetiǁîn, Amorǁîn, Perisiǁîn, Hiviǁîn tsî Jebusǁîn dib ǃoa.

⁹Tsî nēsi mû, Israeli ôan di ǃaus ge ti tawa go hā; tsî ta ge ǁkhāti go mû ǁnā ǁgâiǀāb, Egipteǁîn ra ǁîna ǁîb ǀkha ǁgâiǀāba.

¹⁰Hā ǁnâi nēsi, î ta satsa Faraob ǃoa sî, îts satsa ti ǁaes, Israeli ôana, Egipteba xu ǂgaeǂguiǂui.

¹¹ǃNubaib ge Moseba Elob ǃoa ge mî: Tari ta tita o ta Faraob ǃoa nî ǃgû, o ta Israeli ôana Egipteba xu nî ǂgaeǂguiǂui?

¹²Ob ge ǁîba ge mî: Tita ge sa ǀkha ǂanǂansase nîra hâ, tsî nēs ge saose nîra ība tsi, tita go sî tsi ǃkhaisa: Nē ǁaesats ga Egipteba xu ǂgaeǂguiǂuio, o du ge Eloba nē ǃhommi ai nîra ǃoaba.

¹³Ob ge Moseba Elob ǁga ge mî: Mû, Israeli ôan tawa sī tsî ta ga ǁîna ǃoa mîo, Elob sadu îgu dib go sî te sado ǃoa, tsîn ga tiǀî mîo: Matib ǁîba ǀon hâ? Tare-e ta kha ǁnâi ǁîna nî mîǀî?

¹⁴Ob ge Eloba Moseb ǃoa ge mî: Tita ge ī ta a khami nî īta. Tsîb ge ǁîba ǁkhāti ge mî: Nētits ge Israeli ôana nîra mîba: Ī nî ta ge tita sadu ǃoa go sî.

¹⁵ǃNubaib ge Eloba ǃaruǀî Moseb ǃoa ge mî: Nētits ge Israeli ôan ǃoa nî mî: ǃKhūb sadu îgu di Elob, Abrahammi di Elob tsî Isaki di Elob tsî Jakob di Elob ge sadu ǃoa go sî te; nēs ge ti ǀonsa ǀamos kōse, tsî nēs ge ti ǂâiǂâisensa ǃhaosa xu ǃhaos kōse.

¹⁶ǃGû îts Israeli di kaiga sī ǀhaoǀhao îts ǁîgu ǃoa mî: ǃKhūb sadu îgu di Elob ge tita tawa go ǂhai, Abrahammi, Isaki tsî Jakob tsîgu di Eloba, mî rase: Tita ge sado îǂhôase sari tsî go mû, Egipteb ǃnâ du ge sîsenūhe xūna;

¹⁷ǁnā-amaga ta ge tita go mî: Tita ge sado Egipteb di ǁgâiǀāba xu nîra ǂgaeǂguiǃapa Kanaanǁîn, Hetiǁîn, Amorǁîn, Perisiǁîn, Hiviǁîn tsî Jebusǁîn tsîn di ǃhūba ǃoa, ǁnā ǃhūb daib tsî danib tsîkha xa ra dâuba ǃoa.

¹⁸Tsîn ge ǁîna dommi âtsa nîra ǁnâu; tsî go ge nîra ǃgû, sats tsî Israeli di kaigu tsîgo, Egipteb di gao-aob ǃoa, tsî go ge ǁîb ǃoa nîra mî: ǃKhūb Hebreǁîn di Elob ge sige go ǃoa; îts ǁnâi ǃgû kai da re ǃnona tsēdi daob kōse ǃgaroǃhūb ǃnâ, î da ǃKhūb sida Eloba ǁguiba.

¹⁹Xawe ta ge a ǂan, Egipteb di gao-aob ǃgû kai du tide ǃkhaisa, ǀgaisa ǃommi ǀkhas ka xawe.

²⁰Tita ge ti ǃomma ǀhōǂui tsî Egipteba nîra ǂnau ti buruxa dīn, ǁîb ǃnâ ta nîra dīn hoan ǀkha; ǁnās khaoǃgâb ge sado nîra doe kai.

²¹Tsî tita ge nē ǁaesa ǀkhomma nîra mā Egipteǁîn mûǁae, o i ge nîra ī, ǃgûǂoa du kao o du ge ǀkhaiǃnâse ǃgûǂoa tide.

²²Os ge mâ taras hoasa ǁîs di ǀgūkhoes tsî ǁîs di ommi horesas tawa nî ǂgan, ǀhaiǀurisoadi, ǃhuniǀurisoadi tsî saran tsîna; ǁîna du ge sadu di ôagu tsî sadu di ôadi ai nî ǁgui, tsî du ge nēti Egipteba nî ǀâǀhana.