Read Khoekhoegowab Eksodus 30 Bible Online

Eksodus 30 - Khoekhoegowab bible

Eksodus 30

¹Tsîts ge ǁkhāti ǀanǀanaltars ǃgâihamxūn disa nî dī; akasiahain ǀkhats ge ǁîsa nî dī.

²ǀGui ǂhâb ge kōb âsa nî i, tsî ǀgui ǂhâb ǂhabasib âsa, hakaǁhôaxas nî i tsî ǀgam ǂhâkha ǀgapisib âsa; ǁîsa xu gu ge ǁnâgu âsa nî ǀkhī.

³Tsîts ge ǁîsa ǃhuniǀurib ǀguib ǀkha nî ǃkhûǀkhā, ǂamais âs tsî ǁîs di ǀkhāgu hoagu tsî ǁnâgu âs ona; tsîts ge ǃhuniǀurikransa nî dīǂnamipe si.

⁴Tsîts ge ǁkhāti ǀgam ǃhuniǀuriǃganura nî dī krans âs ǃnaga; ǁîs ǀgam ǀkhākha aits ge ǁîra nî dī, ǀgam ǀkhākha hoakha âs ai; tsî ra ge ǁîra tanihaira di ǃkhōǃkhaise nî hâ, ǁîn ǀkhas nî tanihega.

⁵Tanihairats ge akasiahain ǀkha nî dī, tsîts ge ǁîra ǃhuniǀurib ǀkha nî ǃkhûǀkhā.

⁶Tsîts ge ǁîsa nî mâi ǂgāmâisab ǀhûǀguitimîs di ǂgaes aiǃâ hâb aiǃâ; ǂkhîbagus di ǃgū-ais aiǃâ, ǀhûǀguitimîs ǂamǃnâ nî hâs sadu ǀkha ta nî ǀhû ǃkhais tawa.

⁷Tsî Aronni ge ǁîs ai ǃgâihamxūna nî ǂhubi; mâ ǁgoas hoas ai ǃamamǀaedeb ga ǁāǁāo, ob ge ǁîna nî ǂhubi.

⁸Tsî Aronni ga ǃamamǀaede ǃamamo ǀgam ǃuira ǁaegu, ob ge ǁîna nî ǂhubi; ǁîs ge hâhâ ra ǀanǀansîsense nî i ǃKhūb di ais aiǃâ sadu di ǃhaodi tawa.

⁹Tsîts ge ǃhao ǀanǀanxūna ǁîs ai ǂhubi tide, khauǁguibas kas, ǂûǁguibas kas hoasa, tsîts ge ǁkhāti ǂnâǁguiba-e ǁîs ai ǂnâ tide.

¹⁰Tsî Aronni ge kurikorobe ǀgui ǃnāsa ǁîs di ǁnâgu ǂama ǂkhîbagusa nî dī ǁoreǁguibadi ǂkhîbagudi ǀaob ǀkha, kurikorobe ab ǀgui ǃnāsa ǁîs ai ǂkhîbagusa dī sadu di ǃhaodi tawa: ǁÎs ge ǃKhūba ǃanusigu di ǃanusise ība xui-ao.

¹¹Aiǃâb ge ǃKhūba Moseba ǃhoaǀî tsî ge mî:

¹²Israeli ôan danakhoegu di ǀgausats ga ǃgôao, kōǂnamipe gu kao, ob ge mâb hoaba ǃKhūba ǂkhîbagumarisa nî mā ǁîb di ǀoms ǂama, ǁîgats ra ǃgôa hîa; tsû-ai-i ǁîga hāǂam tidega, kōǂamhe gu ra hîa.

¹³Nēti gu ge nî mā, mâb ǃgôahe hâgu ǃoa ra sīb hoaba: Sekels di ǃkhareba ǃanusib di sekels ǃoa (nē sekels ge a ǀgamdisi gera). Nē ǃkhareb sekels dib ge ǃKhūba ǃkhōkhâiǁguibase nî ība.

¹⁴Mâb, ǃgôahe hâgu tawa ra sīb, ǀgamdisi kurigu â-ib tsî ǃnā hâb hoab, ǁîb ge ǃKhūba ǃkhōkhâiǁguibasa nî mā.

¹⁵ǃKhū hâb ge ǁîs ǃgâ-ai ǂguina mā tide, tsî ǀgâsab ge nē ǃkhareb sekels dib xa ǀorose mā tide, ǃKhūb di ǃkhōkhâiǁguibasa du ga mâo, sadu di ǀomdi ǃaroma du ǂkhîbagusa nî dīse.

¹⁶Ots ge marib ǂkhîbagudi diba Israeli ôaga xu nî ū, tsîts ge ǁîba tentoms ǀhûs dis di sîsenni tawa nî mâ; tsîts ge ǁîsa Israeli ôana ǂâiǂâisenxūse nî ība ǃKhūb di ais aiǃâ, sadu ǀomde du ǂkhîbagusa nî dībase.

¹⁷Tsî ǃKhūb ge Moseba ǃhoa-ū tsî ge mî:

¹⁸Îts ǁkhāti ǂaiǃoreb khōs diba dī, ǂaib ǂais âb ǀkha, khōsens ǃaroma; tsîts ge ǁîba nî mâi ǀhûs di tentoms tsî altars tsîn ǁaegu, tsîts ge ǁgam-e nî ǂnâǂgā.

¹⁹Î gu Aronni tsî ǁîb ôagu tsîga ǁîs ǃnâ ǁā ǁîgu di ǃomgu tsî ǂaidi tsîna.

²⁰Tentoms ǀhûs dis ǃnâ gu ga ǂgâo, o gu ge ǁgam-i ǀkha nî khōsen, ǁō gu tidega; tsî ǁkhāti altarsa gu ga ǀgūo, ǃoaba gu nîse, ǀaeǁguibasa gu nî ǃKhūba ǂhubibaga;

²¹î gu ǁnâi ǁîgu di ǃomgu tsî ǂaidi tsîna ǁā, î gu tā ǁō. Tsî nēs ge ǁîga ǀamo ǂnûiǂgāse nî ība, ǁîb tsî ǁîb di surib tsîna, ǁîn di ǃhaodi ǃnâ.

²²ǃAruǀîb ge ǃKhūba Moseb ǃoa ǃhoa tsî ge mî:

²³Îts ǁnâi satsa hoan xa ǃgâi ǃgâihamxūn xa ū, hoan xa ǃanu miren xa korokaidisi sekeldi kōse tsî ǃgâiham kaneli xa ǁnā xūn di ǃkhareb kōse, ǀgamkaidisi korodisigu kōse, tsî ǃgâiham kalmub xa ǀgamkaidisikorodisigu kōse.

²⁴Tsî ǁkhāti kasiab xa korokaidisigu kōse, ǃanusib di sekels ǃoa, tsî olib ǀkherahaidi dib xa ǀgui hinni kōse.

²⁵Îts ǁîna xu olib ǃanu ǂkhauǀkhās diba dī, ǂkhauxūb ǁāǁāǁkhāsase dīhe hâba ǂkhauxūkuru-aob di sîsenni ǃoa; ǁîb ge olib ǃanu ǂkhauǀkhās dib ase nî i.

²⁶Tsîts ge ǁîb ǀkha tentoms ǀhûs disa nî ǂkhauǀkhā tsî ǀhûǀguitimîs di ǂgaesa;

²⁷tsî tāba ǁîb di sîsenūxūn hoan ǀkha, tsî kandelara ǁîb di sîsenūxūn ǀkha tsî ǀanǀanaltarsa;

²⁸tsî altars khauǁguibas disa ǁîs di sîsenūxūn hoan ǀkha tsî khōsenǃoreba ǁîb di ǂais ǀkha.

²⁹Tsîts ge ǁîna ǁnāti nî khai, hoan xan nî ǃanuse; ǁîna kara tsâǀkhā-i hoa-i ge nî ǃanu.

³⁰ ǁKhātits ge Aronni tsî ǁîb di ôagu tsîga nî ǂkhauǀkhā tsî ǁîga nî khai, tita gu nî pristersîsenǃâsa ǃoabaga.

³¹Tsîts ge Israeli ôan ǀkha ǃhoa tsî nî mî: Nēb ge olib ǃanu ǂkhauǀkhās dise nî ība teba sadu di ǃhaodi tawa.

³²ǀNî khoe-i xare-i di ǁgans aib ge ǂnâhe tide; sats ge ǁkhāti ǀnîba dī tide, ǁîb dīhe hâ khami, ǁîb a ǃanu amaga, ǁîb ge ǃanuse nî ība du.

³³ǁNā khoeb nēti ī ǂkhauxūba ga dīb tsî ga ǁîba ǃhaokhoe-i ai dīb, ǁîb ge nî ǃhūǃnomahe ǁîb di ǁaede xu.

³⁴ǃAruǀîb ge ǃKhūba Moseb ǃoa ge mî: Ūbasen ǃgâihamxūn tsî miretsāb tsî oniksi tsî galbanni tsîn, nē ǃgâihamxūn tsî ǃanu wiroki ona, î-i mâ-i hoa-e ǀguri hâ.

³⁵Tsîts ge ǁîna xu ǃgâihamsîsenni ǂkhauxūb diba nî dī, ǂkhauxūkuru-aob di sîsenni ǃoa habahe tsî ǀkhaiǀkhā tsî ǃanuba.

³⁶Tsîts ge ǁîna nî ǃhûtsautsau, tsîts ge ǁîn xa nî ǁgui ǀhûǀguitimîs aiǃâ tentoms, ǁîs ǃnâ ta nî sadu tawa sīs ǃnâ, hoan xa ǃanu xūse du ge ǁîba nî ūhā.

³⁷Xawe nē ǃgâihamsîsenni dīs, hîa du nî dī hâ is ǃoa du ge sado aitsama dībasen tide; ǃanu xūse du ǁîba ǃKhūba nî ūhâba.

³⁸ǁNā khoeb nēti īna kara dīb, ǁînab nî ǃkhapase, ǁîb ge nî ǃhūǃnomahe ǁîb di ǁaede xu.