Read Khoekhoegowab Eksodus 31 Bible Online

Eksodus 31 - Khoekhoegowab bible

Eksodus 31

¹ǁNās khaoǃgâb ge ǃKhūba Moseb ǃoa ge mî:

²Mû tita ge ǀons ǀkha ge ǂgai Besaleeli, Urib ôab, Huri ôab, Judab ǃhaos diba.

³Tsî tita ge ǁîba Elob Gagab ǀkha ge ǀoaǀoa, gā-aisib ǀkha tsî ǁnâuǃāb ǀkha tsî ǂans ǀkha sîsenǃnôa-i hoa-i ǃnâ.

⁴ǂÂiǂuib nîse ǁnâuǃāxa sîsenni hoaba, sîsenni nîse ǃhuniǀurib, ǀhaiǀurib, ǂaib,

⁵ǁāǁāǁkhāsa ǀuiǃgaos ǃnâ, ǂnûiǂgāb nîse, tsî ǁāǁāǁkhāsa haiǃgaos ǃnâ, mâ sîsenǃnôa-i hoa-i ǃnâb nî sîsenga.

⁶Tsî tita, mû tita ge ǁîba ge māǀaro Oholiab, Ahisamaxi ôab, Danni ǃhaos diba; tsî ǂgaob, mâb gā-ai ǂgaob â-ib hoab dib ǃnâ ta ge tita gā-aisiba ge mā; tsîn ge nîra dī satsa ta go mîmā xūn hoana:

⁷Tentoms ǀhûs dis tsî ǂgaes ǀhûǀguitimîs dis tsî ǂkhîbagu-ais, ǁîs ai nî hâs, tsî tentoms di sîsenūxūn hoan,

⁸tsî tāb ǁîb di sîsenūxūn ǀkha, tsî ǂkhaisa kandelari sîsenūxūn âb ǀkha, tsî ǀanǀanaltars,

⁹tsî altars khauǁguibas dis on, ǁîs di sîsenūxūn ǀkha, tsî khōsenǃoreb ǂais âb ǀkha.

¹⁰Tsî sîsenǃâs di saran, tsî ǃanu saran pristeri Aronni din, tsî saran ǁîb ôagu din, pristersîsenǃâsa nî ǃoabase;

¹¹tsî ǁkhāti ǂkhau-olib tsî ǃgâihamxūn di ǀanǀanxūn ǃanusib din tsîna; tita ge satsa mîban hoan ǃoa gu ge nî dī.

¹²Aiǃâb ge ǃKhūba Moseb ǀkha ge ǃhoa, mî raǃâ:

¹³Satsa ǁnâi ǃhoa Israeli ôan ǀkha îts mî: ǀŌ-aise du ge ti sâtsēde nî ǃkhōǀgaipe, saos a ǁî xui-ao tita tsî sadu tsîda ǁaegu sadu di ǃhaodi tawa; sats khoets nî ǂanse, tita ǃKhūta ge ǁî ta sado ra khai ta.

¹⁴Sâtsēsa ǁnâi tsēdī, ǃanuse du nî ǁîsa ūhâ xuige; ǁîsa kara ǀuriǀuri-i, ǁî-i ge ǂanǂansase nîra ǃgamhe. Mâ-i hoa-i, ǁnā tsēs ai sîsenna kara dī-i di ǀoms ge nîra ǃhūǃnomahe ǁî-i ǁaedi ǁaeguba xu.

¹⁵ǃNani tsēdi kōsets ge sats khoetsa nîra sîsen; xawe hûǁî tsēs ge sâb di tsēs, ǃKhūba ǃanubasa. Sâtsēs ai ga sîsenai-e dī-i ge ǂanǂansase nî ǃgamhe.

¹⁶An ǁnâi Israeli ôana sâtsēsa tsēdī, sâtsēsa ra tsēdīse, ǁîn di ǃhaodi ǃnâ ǀamo ǃgaeǀhao-i ase.

¹⁷ǁÎs ge tita tsî Israeli ôan tsîda ǁaegu saose nîra i ǀamosib kōse; ǃKhūb ge ǃnani tsēdi ǃnâ ǀhommi tsî ǃhūbaib tsîkha ge dī, tsî hûǁî tsēs aib ge sâ tsî ge khoakhoasen amaga.

¹⁸Tsîb ge ǁîba, Sinaiǃhommi aib ge ǁîb ǀkha ǃhoatoao, Moseba ǁnā ǀgam xoa-aixūra ǀhûǀguitimîs dira, ǀuixoa-aixūra Elob ǀkhunub ǀkha xoa-aihe hâra ge mā.