Read Khoekhoegowab Eksodus 32 Bible Online

Eksodus 32 - Khoekhoegowab bible

Eksodus 32

¹Tsî ǁaes ge mûo Moseb ra ǀhawe ǃhomma xu ǁgôaxas ǀkha ǃkhaisa, os ge ǁaesa Aronni tawa ǀhû tsî ǁîb ǃoa ge mî: Khâi, îts eloga dība da re, sida ais aiǃâ ra ǃgûga. Nē Moseb, ǁnā aob Egipteba xu ge ǂgaeǂguiǂui dab xasa da ge a ǀū, tare xū-i xab go hāǂamhe ǃkhaisa.

²Ob ge Aronna ǁîn ǃoa ge mî: ǂGaeǁnâ ǃhuniǀuriǃgamdi sadu taradi tsî sadu ôagu tsî sadu ôadi di ǂgaedi ǃnâ hâde, î du ǁîde tita ǃoa ūhā.

³ǃNubais ge ǁaes hoasa ǃhuniǀuriǃgamdi, ǁîn di ǂgaedi ǃnâ hâde ǂgaeǁnâ tsî Aronni ǃoa ge ūsī.

⁴Ob ge ǁîde ǃomǁaeb âna xu ū tsî beitels ǀkha ǁîba xoa tsî ǂnâhe hâ tsâuba ge dī. On ge ǁîna ge mî: Nēgu ge sa eloga, Israeltse, Egipteǃhūba xu ge ǂgaeǂuiǃapa tsiga.

⁵Tsî Aronni ge mûo, ob ge altarsa ge ǂnubiba bi; tsî Aronni ge ǂgaiǂui tsî ge mî: ǁAris ge nî ǃKhūb di kaitsē.

⁶On ge sao ra tsē ǃnauǁgoaga khâi tsî khauǁguibade ge ǁguiba tsî ganganǁguibadi tsîna; ǃnubais ge ǁaesa ge ǂnû, ǂû tsîn nî āse, ǁnās khaoǃgân ge ge khâi ǀkhōn nîse.

⁷ǃNubaib ge ǃKhūba Moseb ǃoa ge mî: Khâi îts ǁgôa, sa ǁaes Egipteba xuts ge ǂgaeǂguiǃapas ge ǁgao hâ,

⁸tsîn ge ǃhaese go ǁgôa ǁnā daob, tita ge ǁîna mîmāba xu; ǂnâhe hâ tsâuban go dībasen, tsîn ge ǁîb aiǃâ go ǃhon tsî ǁîba ǁguibasa hî tsî go mî: Nēgu ge sa eloga, Israeltse, Egipteǃhūba xu ge ǂgaeǂguiǃapa tsiga.

⁹ǃAruǀîb ge ǃKhūba Moseb ǃoa ge mî: Nē ǁaesa ta go kō, tsî mû, ǁîs ge a ǂnîxaǃao ǁae.

¹⁰Tsî nēsi ǁnâi mā-am te, îb ti ǁaiba ǁîn ǂama ǂhubi, î ta ǁîna hapu; o ta ge tita satsa nî kai ǁae kai.

¹¹Ob ge Moseba ǃKhūb, ǁîb Elob di aisa ge ǀgoreǀî, tsîb ge ge mî: ǃKhūtse, tare xū-i ǃaromab kha sa ǁaiba nî ǂhubi, sa ǁaes, kai ǀgaib tsî ǀgaisa ǃommi ǀkhats ge Egipteǃhūba xu ǂgaeǂguiǂuisǀî?

¹²Tare xū-i ǃaroman kha Egipteǁîna ǃhoa tsî nî mî: ǁAixasib ǃnâb ge ǁîna ge ǂgaeǂguiǂui, ǃhomgu aib nî ǁîna ǃgamse, tsî ǃhūbaiba xub nî ǁîna hîkākāse? ǁKhaedabasen re ǀgamsib sa ǁaib diba xu, îts ǃhausen re ǂkhabab sa ǁaes dib ǂama.

¹³ǂÂi re Abrahammi, Isaki tsî Israeli tsîgu, sa ǃgāgu xa, ǁîgats ge sats ǂûts tawa nūbaga, tsî ǁîgu ǃoats ge mîga: Tita ge sa suriba nîra ǂguiǂgui ǀhommi di ǀgamirodi xase; tsî nē ǃhūb ǁîb xa ta go mîb hoaragaba ta ge sago di suriba nîra mā, în ǁîn ǀumibasense ūhâ ǀamosib kōse.

¹⁴Ob ge ǃKhūba ge ǃhausen ǁnā ǂkhabab, ǁîb xab ge ǁaes âba nî dī-ū, tib ge mîb xa.

¹⁵Ob ge Moseba unusen tsî ǃhomma xu ge ǁgôaxa ǀgam xoa-aixūra ǀhûǀguitimîs dira ǃomǁae ūhâse; nē xoa-aixūra ge ǁîra ǀkhākha hoakha ge xoa-aihe hâ i; ǀgui ǀkhāb ai tsî nau ǀkhāb âra ge xoa-aihe ge hâ i.

¹⁶Tsî nē xoa-aixūra ge Elob di sîsen ge i; xoas ge ǁkhāti Elob ǂûb di xoa ge i, xoa-aixūra ǃnâ xoaǂgāhe hâǃâ.

¹⁷Tsî Josuab ge ǁaes di domma ǁnâuo, dân ra hîa, ob ge Moseb ǃoa ge mî: Torob ǀō-i kom ǁgoeǃkhais ǃnâ hâo.

¹⁸Ob ge ǁîba ge mî: Dans ǂgai-i di dom tama i ge, tsî i ge ǁkhāti dāhes ǂgai-i di dom tama; ǃnādi ai ǁnaes di domma ta kom tita ra ǁnâuo.

¹⁹Tsî i ge ge ī, ǁgoeǃkhaisab ge ǀgūo, tsî tsâub tsî ǂnās tsîrab ge mûo, ob ge Moseb di ǁaiba ge khâi tsîb ge xoa-aixūra ǃomǁaeb âba xu aoǁgui, tsî ǃhommi ǃgaos tawa ǁîra ge khôaǂkhū.

²⁰Tsîb ge ǁnā tsâub ǁîn go dība ū tsî ǀaes ǀkha ge khauǃkhū bi tsî ge ǂkhūǂkhū bi, tsao kaib ges kōse tsî ǁgam-i ai tsoro bi tsî Israeli ôana ge āsi bi.

²¹Ob ge Moseba Aronni ǃoa ge mî: Tare-es nē ǁaesa dī tsi hâ, ots nētikō kai ǁore-e ǁîs ǂama go hā kai?

²²Ob ge Aronna ge mî: Ab ǁaib ti ǀhonkhoets diba tā khâi; sats ge nē ǁaesa a ǂan ǂkhabab ǃnâs ǁgoe ǃkhaisa.

²³Nētin ge ǁîna tita ǃoa ge mî: Eloga dība da re, sida ais aiǃâ ra ǃgûga. Nē Moseb, ǁnā aob, Egipteǃhūba xu sida ge ǂgaeǂguiǃapab xasa da a ǀū, tare xū-i xab go hāǂamhe ǃkhaisa?

²⁴O ta ge tita ǁîn ǃoa ge mî: ǃHuniǀuri-e ga ūhâ-e a-i ǁî-e ǂgaeǁnâ, î-i tita ǁî-e mā; o ta ge ǀaes ǃnâ ǁî-e ge aoǂgā, ob ge nē tsâuba ge ǀkhī.

²⁵Tsî Moseb ge mûo, ǁaes go ǃkhau ǃkhaisa, (Aronni ge ǁîna go ǃkhau kai ǃharaxūs ǁîn di mâǃoasaben dis ǃoa)

²⁶ob ge Moseba ǁgoeǃkhais di dao-ams ǃnâ mâ tsî ge mî: ǃKhūb di-i hoa-e a-i tita ǃoa hā! O gu ge Levib ôagu hoaga ǁîb tawa ge ǀhao.

²⁷Ob ge ǁîgu ǃoa ge mî: Nētib ra mî ǃKhūb Israeli di Eloba: Ab mâb hoaba ǁîb di gôaba ǃgae kamanab âb ai. ǃGûǃnâǃganu î go ǁkhawa oa ǀgui ǁāba xu nau ǁāb kōse ǁgoeǃkhais ǃnâ, îb mâb hoaba ǃgam ǁîb di ǃgâsaba tsî mâb hoaba ǁîb di ǀhōsaba tsî mâb hoaba ǁîb di ǀgūkhoeba!

²⁸O gu ge Levib ôaga Moseb di mîs ǃoa ge dī. O gu ge ǁnātsē ǁaes xa ǃnonaǀoadisi nî i khoega ge ǁnā.

²⁹Moseb ge nēti mî xui-ao: Nētsē sago di ǃomga ǃKhūba ǀoaǀoaba, mâb hoab nî ī ǁîb di ôab ǃoagu, tsî ǁîb di ǃgâsab ǃoagu, tsî i ge nî ī, nētsēb nî ǁîba ǀkhaeba sago ǂama mā ǃkhaisa.

³⁰Tsî i ge sao ra tsē ge ī, ob ge Moseba ǁaes ǃoa ge mî: Sadu ge kai ǁore-ai-e go ǁore, xawe ta ge tita ǃKhūba ǃoa nî ǃapa, ǀnîsi ta nî sadu ǁoreba ǀûba kai.

³¹Nētib ge Moseba ǃKhūb ǃoa oa tsî ge mî: Nē ǁaes ge kai ǁore-ai-e go ǁore, ǃhuniǀuri-elogan go dībasens ǀkha.

³²Tsî nēsi ǁnâi ǁîna ǁoreba ǀûba; tsî ǁnā tamas ka io, ǁnâi tita ǀari re ǁnā ǂkhanis hîats ge xoasa xu.

³³ǃNubaib ge ǃKhūba Moseb ǃoa ge mî: ǁÎ-i hîa tita ǃoagu ra ǁore-i, ǁî-e ta ge ti ǂkhanisa xu nî ǀari.

³⁴Xawe ǃgû îts nē ǁaesa sī ǂgaeǂgui tita ge mîba tsiǀî; mû, ti ǀhomǃgāb ge sa ais aiǃâ nîra ǃgû; xawe tsēs ti ôaǃnâs dis ai ta ge tita ǁîn di ǁoreba ǁîn tawa nî ôa.

³⁵Nētib ge ǃKhūba nē ǁaesa ge ǁnora, ǁnā tsâuban ge dībasen amaga, Aronni ge dība.