Read Khoekhoegowab Eksodus 33 Bible Online

Eksodus 33 - Khoekhoegowab bible

Eksodus 33

¹ǃAruǀîb ge ǃKhūba ge mî Moseb ǃoa: ǃGû îts nēpa xu doeǃapa, sats tsî ǁnā ǁaes, Egipteǃhūba xuts ge ǂgaeǂguiǃapasa, ǁnā ǃhūb, hîa ta Abrahammi, Isaki tsî Jakob tsîga ge nūbab ǃoa mî raǃâ: Sa ǃkhomma ta ge tita nîra mā bi.

²Tsî tita ge ǀhomǃgā-e sa ais aiǃâ nîra sî tsî ta ge nîra doeǁgaǂui Kanaanǁîn, Amorǁîn, Hetiǁîn, Perisiǁîn, Hiviǁîn tsî Jebusǁîn tsîna,

³ǁnā ǃhūb, daib tsî danib tsîkha ra dâuǃnâba ǃoa; tita ge sadu ǁaegu doeǃapa tide, ǂnîxaǃao ǁaedu a amaga, î ta ga ǀnîsi daob ai tā hapu du, ti.

⁴Tsî ǁaes ge nē tsū mîsa ǁnâuo, on ge ge ǃoa; tsî khoe-i xare-i ân ge ǁî-i anixūna ana tama ge hâ i.

⁵Ob ge ǃKhūba Moseb ǁga ge mî: Israeli ôana mîba: ǂNîxaǃao ǁaedu ge sado, ǀgui mûsǀapirob ǀguib kōse ta ga sadu ǁaegu doeǃapao, o ta ge ga hîkākā du; ǁnâi sadu di anixūna sado xu ǁguiǁnâ, o ta ge tita nî ǂan, tare xū-e ta nî dī ǃkhaisa.

⁶On ge Israeli ôana anixūn âna ǁî-aitsama ge ǀâǀhanasen, Horeb ǃhomma xu aiǃâb ǁga.

⁷Ob ge Moseba tentomsa ū tsî ǁgoeǃkhais ǃauga ge ǂnaumâi si, ǃnūse ǁgoeǃkhaisa xu ra ǂgōǃâ; tsîb ge ǁîsa ǀhûs di tentoms ti ge ǂgai. Tsî i ge ge ī, mâ-i ǃKhūba ra ôa-i hoa-i ge tentoms ǁgoeǃkhais ǃauga hâs ǃoa ǂoa ǃkhaisa.

⁸Tsî i ge ge ī, Moseb ge tentoms ǃoa ǂoao, os ge ǁaes hoasa mâ, tsî mâ-i hoa-i ge ǁî-i tentoms dao-ams ǃnâ ge sī mâ, tsî Moseba ge kōǃgon, tentoms ǃnâb ge ǂgâs kōse.

⁹Tsî i ge ge ī, Moseb ge tentoms ǃnâ ǂgâo, os ge ǀnanuǂkhâǃnâsa ǁgôaxa tsî tentoms di dao-ams ǃnâ sī ge mâ, tsîb ge ǁîba Moseb ǀkha gere ǃhoa.

¹⁰Tsî ǁaes ge ǀnanuǂkhâǃnâsa tentoms di dao-ams ǃnâ mûmâ, os ge ǁaes hoasa khâi tsî ge ǃgamǃgâ mâ-i hoa-e tentoms â-i di dao-ams ǃnâ.

¹¹Tsîb ge ǃKhūba aisa xu ais ǃoa Moseb ǀkha gere ǃhoa, ǀhōsa-i ǁî-i di ǀhōsa-i ǀkha ra ǃhoa khami; ǁnās khaoǃgâb ge ǁkhawa ǁgoeǃkhais ǃoa ge oa; xawe ǃgāb âb, Josuab, Nunni ôab, ǂkham khoeb, ge tentoms ǁaeguba xu ǂgō tama ge hâ i.

¹²Tsî Moseb ge ǃKhūb ǃoa ge mî: Mû, sats ra mî tita ǃoa: Nē ǁaesa ǂgaeǂguiǃapa, xawets ge ǂan kai te tama hâ, tari-ets nî sîǀkhā te ǃkhaisa, tita ge ǀons ǀkha nîra ǂgai tsi, tsî ǁkhāti, Sats ge ti mûǁae ǀkhomma go hō, tits go mî xawe.

¹³ǁNâi ǀkhomma ta ga sa mûǁae hō hâ io, o ta ra ǀgore, a ta ǂan sa daoba, î ta satsa ǂan, tare xū-i ǃaroma ta ǀkhomma sa mûǁae go hō ǃkhaisa; îts kōkō nē ǃhaos a sa ǁae ǃkhaisa.

¹⁴Ob ge ǁîba ge mî: Ti aisa kha nî ǃgûǀkhā tsi, sâ kai tsi ta nîga?

¹⁵Ob ge ǁîba ge mîǀî bi: Sa ais ga ǃgûǀkhā da tama io, ǁnâi tā nēpa xu doeǃapa kai da re!

¹⁶Mati i kha ǁnâi nî mûǂanhe, ǀkhomma ta sa mûǁae go hō ǃkhaisa, tita tsî sa ǁaes tsîda, nēs tawa i ga ī tama io, sats ra ǃgûǀkhā da ti? Nēti da ge tita tsî sa ǁaes tsîda nî ǃkhōǂuihe, mâ ǁaes ǃhūbaib ai hâs hoasa xu.

¹⁷ǃNubaib ge ǃKhūba Moseb ǁga ge mî: ǁKhāti ta ge tita ǃkhais hîats go mîsa nî dība tsi, ǀkhommats go ti mûǁae hō tsî ǀons tawa ta a ǂan tsi amaga.

¹⁸Ob ge ǁîba ge mî: Îts ǁnâi sa ǂkhaisiba ǃgapa kai te re!

¹⁹Xaweb ge ǁîba ge mî: Tita ge ti ǃgâixasib hoaba sa ais aiǃâ ǃgû-ī kai tsî nî ǃKhūb di ǀonsa ǂgaiǂui sa ais aiǃâ; xawe ta ge tita ra ǀkhom, ǀkhom ta nî-i hoa-e, tsî ta ge tita ra ǀkhomxaǂgao, ǀkhomxaǂgao ta nî-i hoa-e.

²⁰Tsîb ge ǁîba ǃaruǀî ge mî: Sats ge ti aisa a mû ǁoa; khoe-i xare-i ge tita mû tsî ûi tide xui-ao.

²¹Tsîb ge ǃKhūba aiǃâb ǃoa ge mî: Mû, ǃkhai-i ge ti tawa hâ; ǁnāpats ge ǃhaob ai nî mâ.

²²Tsî i ge nîra ī, ti ǂkhaisib ga ǃgû-ī ǃnubai ta ge tita satsa ǃhaob di ǁhāb ǃnâ nî ǂnûi ǃkhaisa; tsî tita ge ti ǃommi ǀkha satsa nî ǃgū-ai, tita nî ǃgû-īs kōse.

²³Tsî ti ǃomma ta ga ūbēo, ots ge ti khaoǃgâb di ǃâde nîra mû, xawe ti ais ge a mûhe ǁoa.