Read Khoekhoegowab Eksodus 34 Bible Online

Eksodus 34 - Khoekhoegowab bible

Eksodus 34

¹ǃNubaib ge ǃKhūba Moseb ǃoa ge mî: ǀGam ǀuixoa-aixūra ǁhābasen, ǂgurora ge ī i khami, o ta ge tita xoa-aixūra ai ǁnā mîdi ǁkhāde nî xoa, ǂgurora, sats ge khôara ai ge hâ īde.

²Îts ǃnauǁgoaga ǂhomisen, ǃnauǁgoagats nî Sinaiǃhommi ai ǃapaga, îts ǁnāpa ǃhommi di ǂaob ai ti aiǃâ mâ.

³Tsî khoe-i xare-i ge sa ǀkha ǃapa tide, î-i ǁkhāti khoe-i xare-e tā mûhe ǃhommi hoaragab ai; ǁkhātin ge ǀgoan karas, goman karas hoasa nē ǃhommiǀî ǃû tide.

⁴ǃNubaib ge ǁîba ǀgam ǀuixoa-aixūra ge ǁhābasen, ǂgurora ge ī i khami; tsîb ge Moseba ǃnauǁgoaga khâi tsî Sinaiǃhommi ai ge ǃapa, ǃKhūb go mîba bi khami; tsîb ge ǀgam xoa-aixūra ǃomǃnāb âb ai ge ū.

⁵Ob ge ǃKhūba ǃâus ai ǁgôaxa tsî ǁnāpa ǁîb tawa ge sī mâ; tsîb ge ǁîba ǃKhūb di ǀonsa ge ǂgaiǂui.

⁶Tsî ǃKhūb ge ǁîb ais aiǃâ ǃgû-īo, ob ge ǁîba ge ǂgai: ǃKhūtse, ǃKhūtse Elots ǀkhomxaǂgaoxa tsî ǀkhomxaǃnâts, ǃnūǃnâxa tsî ǃgâidīb tsî amab tsîkha ǃnâ a kaits.

⁷ǃGâidība ra sâuts, ǂgui ǀoadisi ǃhaodi kōse, ǂhanuoǃnâsib tsî ǃûǂams tsî ǁoreb tsîna ra ǀûbats; ǀhapixa-e ǀhapiose ūhâ tamats, ǁgûgu di ǂhanuoǃnâsiga ra ôaǃnâts, ǃnonaǁî tsî hakaǁî ǃhaos kōse.

⁸Ob ge Moseba ǃhae tsî ǃhūb ai ǃgamǃgâ tsî ge ǀgoreǀî bi.

⁹Tsîb ge ge mî: ǃKhūtse, ǀkhomma ta ga sa mûǁae hō hâo, îts ǁnâi, ǃKhūtse, sida ǁaegu ǃgû; ǂnîxaǃao ǁaes ge nēsa; xawe ǀûba da sida ǂhanuoǃnâsib tsî sida di ǁoreba re, îts ūǃoa da re sa di ǀumise.

¹⁰Ob ge ǁîba ge mî: Mû, tita ge ǃgaeǀhao-e ra dī, sa ǁaes hoas aiǃâ ta ge tita buruxa dīna nîra dī ǃhūbaib hoaragab ai tsî ǁaedi hoadi ǃnâ kuruhe tama hâna; os ge ǁnā ǁaes, ǁîn ǁaeguts hâs hoasa nîra mû ǁnā sîsenni ǃKhūb dib hîa ǃhuriǃhurisab sa ǀkha ta nîra dība.

¹¹ǃKhōǀgaipe re nētsē ta tita ra mîmā tsina. Mû, tita ge sa ais aiǃâba xu nîra doeǁgaǂui Amorǁîn, Kanaanǁîn, Hetiǁîn, Perisiǁîn, Hiviǁîn tsî Jebusǁîn tsîna.

¹²ǂAnbasen îts tā ǃgaeǀhao-e dī ǁnā ǃhūb, ǁîb ǃnâts ra doeǂgâb di ǁansabe-i ǀkha; î-i ǀnîsi tā ǁnoa kaiba tsi sadu ǁaegu.

¹³Îts altardi âna ǃhanǁgui îts ǂnûikhâihe hâ īgu âna khôaǂkhūǂkhū, îts ǀhomadi âna ǁhāǁgui.

¹⁴ǀKhara elo-i aiǃâts ge satsa ǃhonǁgoa tide xuige; ǃKhūb ǀons ge Tauxab, tsîb ge ǁîba a ôasa Elo.

¹⁵Îts tā ǀnîsi ǃgaeǀhao-e dī ǁnā ǃhūb di ǁansaben ǀkha; tsî ǁîna ga elogu âna ǀaiǃgon tsîn ga elogu âna ǁguibao, în ǁîna satsa tā ǁkhau, ǁîn di ǁguibas xats nî ǂûse.

¹⁶Îts ǁîn di ôadi xa sa ôaga tā tarase ūba; î di ǁîn di ôade elogu âde di ra ǀaiǃgon hîa tā dī, sa ôagu on nî ǁnā eloga ǀaiǃgon ǃkhaisa.

¹⁷Sats ge ǂnâhe hâ eloga dībasen tide!

¹⁸Kaitsēs ǀkhuruǀkhuruhe tama peregu disats ge satsa nî tsēdī; hû tsēdi kōsets ge ǀkhuruǀkhuruhe tama pereba nî ǂû, tita ge mîmā tsî khami, mîmâihesa ǁaeb Abib ǁkhâb dib ai, nē Abib ǁkhâb aits ge Egipteba xu doeǂoa xui-ao.

¹⁹ǁHāsa ra ǁkhowa-am-i hoa-i ge a ti; ā, sa ǀgoan tsîn xa ga aorese a ǃnaeb hoab, ǂguroǃnaesabeb goman xas kas, ǀgoan xas kas hoasa.

²⁰Xawe eseli hîa ǂguroǃnaesabeb, ǁîbats ge nî ore ǀgui ǀgoa-i ǀkha; tsî ǁîbats ga ore tama io, ots ge ǁîba ǃaoba nî khôa. ǂGuroǃnaesabegu sa ôagu digu hoagats ge nî ore, tsî khoe-i ge ti ais aiǃâ ǀkhaiǀnâ ǃomgu ǀkha ǂhai tide.

²¹ǃNani tsēdets ge nî sîsen, xawe hûǁî tsēs aits ge nî sâ; ǃhūǃgaos tsî ǃhoroǃgaos tsîra xuts ge nî sâ.

²²Kaitsēs wekhegu disats ge ǁkhāti nî tsēdī, ǂguroǃnaesaben ǃhorob ǃgaos din di kaitsē tsî ǀhaoǀhaos kaitsēs a amaga kurib di ǀunis ai.

²³Sadu ǃnâ hâ aoregu hoagu ge ǃnona ǃnādi kōse kurib ǃnâ ǂamgao-aob ǃKhūb, Israeli Elob di ais aiǃâ nî ǂhai.

²⁴ǀŪbeǁaede ta ga tita sa ais aiǃâba xu, ūn hâna xu doeǁgaǂui tsî sa ǃhūb ǀkhariba haraharao, o i ge khoe-i xare-e sa ǃhūba tura tide, sats ra ǃgûǃapa hîa, ǃKhūb sa Elob di ais aiǃâts nî ǃnona ǃnādi kōse kurib ǃnâ ǂhaise.

²⁵Ti ǂāǁguibas di ǀaobats ge ǀkhuruǀkhuruhe hâ pereb ǀkha ǂû tide; ǂāǁguibas Pasxakaitsēs dis ge ǁkhāti hâǁgoa tide.

²⁶ǂGurosan ǂguro ǂûn sa ǃhanab dinats ge ǃKhūb sa Elob di ommi ǃnâ nî ūhā. Piriro-ets ge ǁgûs di dai-i ǃnâ sâi tide.

²⁷ǃAruǀîb ge ǃKhūba Moseb ǃoa ge mî: Nē mîde xoabasen, nē mîdi di ǀōb ǃoa ta ge tita sats ǀkha ǃgaeǀhao-e go dī tsî Israeli on ǀkha.

²⁸Tsîb ge ǁnāpa ǃKhūb tawa ge hâ i, hakadisi tsēdi tsî hakadisi tsuxugu kōse; pere-eb ge ge ǂû tama hâ i, tsî ǁgam-eb ge ā tama ge hâ i; tsîb ge xoa-aixūra ai mîdi ǃgaeǀhaos dide gere xoa, ǁnā disi mîde.

²⁹Tsî i ge ge ī, Moseb ge Sinaiǃhomma xu ǁgôao, tsî ǁnā ǀgam xoa-aixūra ǀhûǀguitimîs dira ge Moseb ǃomǁae ge hâ i, ǃhomma xub ge ǁgôao, ob ge Moseba ǀū i, ais âb di khōb ra ǂkhai ǃkhaisa, ǁîb ge ǁîb ǀkha gere ǃhoa ǃnubai.

³⁰Tsî Aronni tsî Israeli ôan ge Moseba ǃgapaǀîo, mû, ob ge ais âb di khōba ra ǂkhai; ǁnā-amagan ge ǁîba ǀgūsa ge ǃao.

³¹Ob ge Moseba ǁîna ge ǂgai, o gu ge ǁîb ǃoa ge oa, Aronni tsî ǀhaohâb di ǂamsagu hoaga, tsîb ge Moseba ǁîgu ǀkha ge ǃhoa.

³²Tsî ǁnās khaoǃgân ge Israeli ôan hoana ǁîb tawa ge hā, ob ge ǁîna ǃKhūb ge Sinaiǃhommi ai gere ǃhoa-ū bi xūn hoana ge mîmā.

³³Nētib ge Moseba ǁîn ǀkha ge ǃhoaǀû, tsîb ge ǃgū-ai-e ais âb ai ge ǁgui.

³⁴Tsî Moseb ge ǃKhūb di ais aiǃâ sīo, ǁîb ǀkhab nî ǃhoase, ob ge ǃgū-aisa ge ūǁnâ ǂoab ges kōse; tsî ǂoab ge, ob ge Israeli ôan ǀkha gere ǃhoa, mîmāheb go xūna.

³⁵On ge Israeli ôana Moseb di aisa ge mû, matib ra khōb ǁîb ais diba ǂkhai ǃkhaisa; ǁnāxab ge Moseba ǃgū-aisa ǁkhawa ais âb ai ge dī, ǁîb ǀkhab nî ǃhoaseb ge ǂgâs kōse.