Read Khoekhoegowab Eksodus 36 Bible Online

Eksodus 36 - Khoekhoegowab bible

Eksodus 36

¹ǃNubai gu ge Besaleeli tsî Oholiab tsî mâ aob gā-ai ǂgaob â-ib hoaba gere sîsen, ǃKhūb xa gā-aisib tsî ǁnâuǃāb tsîkha ge māhegu, ǂan gu nîga, mati gu nî sîsenni ǃanusib ǃoabas dib hoaba dī ǃkhaisa ǃKhūb ge mîmān hoan ǃoa.

²Moseb ge Besaleeli tsî Oholiab tsî gā-ai ǂgaob â-i aob hoaba ǂgai xui-ao, ǃKhūb xa gā-aisiba ǂgaob âb ǃnâ ge māheb, ǂgaob âb xa ge ǁgariheba, sîsenni tawa hā tsîb nî ǁîba dīse.

³O gu ge ǁîga Moseb di ais aiǃâba xu ǀhaoǀhaoǁguibas hoasa ge ū, Israeli ôan xa ge ūhāhesa ǃanusib ǃoabas di sîsenni ǃoa, ǁîb nî dīhega; tsîn ge gorose mâ ǁgoas hoas ai ǁîba māsenxase ǁguibade gere ūhāba.

⁴ǁNā-amaga gu ge gā-aigu, ǃanusib di sîsenna gere dīgu hoaga ge hā, mâb hoaba ǁîb di sîsenni, hîa gu gere dība xu;

⁵tsî gu ge Moseb ǀkha ǃhoa tsî ge mî: ǁAes ge kaise ra ǁguiba ǁnā sîsenni, ǃKhūb: Ab dīhe, ti ra mîb ǃoa ǂhâba hâs ǃgâ-ai.

⁶Ob ge Moseba ge mîmā ǁgoeǃkhais nî ǂgaiǃnâǃganuhe ǃkhaisa, mî raǃâ: Ao-i kas, tara-i kas hoasa a-i ǃaruǀî tā sîsenna dī ǃanusib di ǀhaoǀhaoǁguibas ǀkha! Os ge ǁaesa ge ǁguibaǀû.

⁷Sîsenxūn ge ǁîga ge ǂâuba hâ i ǁnā sîsenni, hîa nî dīheb hoab ǃoa; ā, ǃnā ge hâ i.

⁸Nēti gu ge gā-ai ǂgaob â-igu hoaga sîsenna ra dīgu ǀkha tabernakela gere dī, disi îǂgoagu ǀkha ǂgāǃnâguhe hâ ǀui ǃuri ǃkhaib xa, tsî ǀhommiǂhoab xa, tsî purpurǀapab xa tsî îǀapab xa xerugu ǀkha; hoan xa ǁāǁāǁkhāsa sîsenai-i xab ge ǁîba gere dī.

⁹Gaxub ǀgui îǂgoas dib ge ǀgamdisiǁkhaisaǀa ǂhâgu kō ge i, tsî ǂhabasib ǀgui îǂgoas diba haka ǂhâgu kō; nē îǂgoadi hoadi ge ǀgui ǀguiros ǀguis â-i ge i.

¹⁰Tsîb ge koro îǂgoade ge ǃkhōǁae nēsa naus ǀkha, tsîb ge ǀnî koro îǂgoade ge ǃkhōǀhao, nēsa naus ǀkha.

¹¹ǁNās khaoǃgâb ge ǂhīǃgaerode ge dī ǀhommiǂhoab xa îǂgoas di ǃnammi ai ǃkhōǁaes di ǀkhâuǀams ai; tsîb ge ǁîsa ǁkhāti ge dī, ǀgamǁî ǃkhōǁaes hâ îǂgoas di ǀkhâuǀams tawa.

¹²Korodisi ǂhīǃgaerodeb ge ǀgui îǂgoab tawa ge dī, tsî korodisi ǂhīǃgaerodeb ge îǂgoab di ǀkhâuǀams, ǀgamǁî ǃkhōǁaes tawa hâs ai ge dī; nē ǂhīǃgaerodi ge ra ǃkhōǁaegu, nēs naus ǃnâ.

¹³Tsîb ge ǁkhāti korodisi ǃhuniǀuriǂhaoǀurirona ge dī tsî îǂgoade ge ǃgaeǁae nēs naus tawa nē ǂhaoǀuriron ǀkha; nētib ge ge tabernakel kai.

¹⁴Tsîb ge ǁkhāti îǂgoana ge dī piriǀûn ǀkha tabernakeli di ǃgū-aixūse: Disiǀguiǀa îǂgoan xab ge ǁîsa ge dī.

¹⁵Gaxub ǀgui îǂgoas dib ge ǃnonadisi ǂhâgu kō ge i, tsî ǂhabasib âsa haka ǂhâgu kō; nē disiǀguiǀa îǂgoadi ge ǀgui ǀguiros ǀguis â-i ge i.

¹⁶Tsîb ge koro îǂgoade ge ǃkhōǁae ǀguri; tsî ǁkhawa ǃnani îǂgoade ǀguri.

¹⁷Tsîb ge korodisi ǂhīǃgaerode ge dī, îǂgoas di ǃnammi ai, ǃkhōǁaes di ǀkhâuǀams tawa; tsîb ge ǁkhāti korodisi ǂhīǃgaerode ge dī, îǂgoas di ǃnammi nau ǃkhōǁaes dib ai.

¹⁸Tsîb ge ǁkhāti korodisi ǂaiǂhaoǀurirona ge dī, tentoms nî ǃkhōǁaehese, ǀguis nîga.

¹⁹ǁKhātib ge tentomsa ǂamai-e ge dība, ǀapaǀapahe hâ ǂkharagūkhōgu xa, tsî ǁî-i xa ǀgapise hâ ǂamai-e ǃâukhōn xa.

²⁰Tsîb ge ǁkhāti tabernakela ǃnaona ge dība, mâ hâ akasiahaidi xa.

²¹ǀGui ǃnaob di gaxusib ge disi ǂhâgu kō ge i, tsî ǂhabasib mâ ǃnaob hoab dib ge ǀgui ǂhâb tsî ǃkhare ǂhâb kō ge i.

²²ǀGam ǃkhōǁaerab ge mâ ǃnaob hoaba ge ūhâ i, leri ǃnâ hâ ǃapa-ū hairodi khami, nēsa naus xōǀkhā; nētib ge ǃnaogu tabernakeli digu hoagu ǀkha ge dī.

²³Tsîb ge ǁkhāti ǃnaogu tabernakeli diga nēti ge dī: ǀGamdisi ǃnaoga ǃkhawagas ǀkhāb ai ǃkhawagasǀî.

²⁴Tsîb ge hakadisi ǀhaiǀuriǂaide ǁnā ǀgamdisi ǃnaogu ǃnaga ge dī: ǀGam ǂaira ǀgui ǃnaob ǃnaga, ǁnā ǀgam ǃkhōǃkhaira âb tawa, tsî ǀgam ǂaira ǀnî ǃnaob ǃnaga, ǁnā ǀgam ǃkhōǃkhaira âb tawa.

²⁵Tsîb ge ǁkhāti ǀgamdisi ǃnaoga ge dī, tabernakeli di nau ǀkhāb ai, ǀapasǀî.

²⁶ǁÎgu di hakadisi ǀhaiǀuriǂaidi ǀkha: ǀGam ǂaira ǀgui ǃnaob ǃnaga tsî ǀgam ǂaira nau ǃnaob ǃnaga.

²⁷Xawe tabernakeli di huriǂoas ǀkhāb aib ge ǃnani ǃnaoga ge dī.

²⁸ǁKhātib ge ǀgam ǃnaokha ǁhôaǃnaose tabernakela ge dība, ǃnamkha hoakha ai.

²⁹Tsî kha ge ǃnagaba xu ǀgēkha khami ǃgaeǁaehe ge hâ i tsî kha ge ǁkhāti ǀgapise ǀgēkha khami ǃgaeǁaehe ge hâ i ǃganu-ai-i ǀkha; ǁnātib ge nē ǀgamkha ǀkha ge dī ǀgam ǁhôakha tawa.

³⁰ǁNāti gu ge ǁkhaisa ǃnaoga ge hâ i ǁîgu di ǀhaiǀuriǂaidi ǀkha; disiǃnaniǀa ǂaide, ǀgam ǂaira mâ ǃnaob hoab ǃnaga.

³¹Tsîb ge ǁkhāti daoǁkhaega ge dī akasiahain xa; korode ǀgui ǀkhāb tabernakeli dib ai;

³²tsî koro daoǁkhaega nau ǀkhāb tabernakeli dib di ǃnaob tawa; tsî ǁkhāti koro daoǁkhaega tabernakeli di ǃnaogu tawa ǀgam ǃnamkha ai, huriǂoasǀî.

³³Tsîb ge ǁaegub di daoǁkhaeba ǃnaogu ǁaegu ge ǃganu kai ǀgui ǀamsa xu nau ǀams kōse.

³⁴Tsîb ge ǃnaoga ǃhuniǀurib ǀkha ge ǃkhûǀkhā tsî ǁîn di ǃganunats ge tani-ūdagu di ǂgâǃkhaise ǃhuniǀurib ǀkha nî dī; daoǁkhaegab ge ǁkhāti ǃhuniǀurib ǀkha ge ǃkhûǀkha.

³⁵ǁNās khaoǃgâb ge ǃgū-aiba ge dī ǀhommiǂhoab xa, tsî purpurǀapab xa, tsî îǀapab xa tsî ǂgāǃnâguhe hâ ǀui ǃuri ǃkhai-i xa; ǁāǁāǁkhāsab dommi aib ge ǁîba gere dī xerugu ǀkha.

³⁶Tsîb ge ǁnās tawa haka ǂkhâǃnâhaiga ge dī, akasiahain xa, ǁîgab ge ǃhuniǀurib ǀkha ge ǃkhûǀkhā; ǁîgu di ǂhaoǀurin ge ǃhuniǀuri ge i, tsîb ge ǁîga haka ǀhaiǀuriǂaide ge ǂnâba.

³⁷Tsîb ge ǁkhāti tentoms di dao-amsa ǃgū-ai-e ge dība ǀhommiǂhoab xa, tsî purpurǀapab xa tsî îǀapab xa, tsî ǀui ǂgāǃnâguhe hâ ǃuri ǃkhai-i xa anansa sîsenai-e.

³⁸Tsî ǁîs di ǂkhâǃnâhaiga tsî ǁîgu di ǂhaoǀurina; tsîb ge danadi âgu tsî ǁîdi di ǂgāhaide ǃhuniǀurib ǀkha ge ǃkhûǀkhā; tsî ǁîgu di koro ǂaidi ge ǂai ge i.