Read Khoekhoegowab Eksodus 38 Bible Online

Eksodus 38 - Khoekhoegowab bible

Eksodus 38

¹Tsîb ge ǁkhāti khauǁguibas di altarsa ge dī akasiahain xa; koro ǂhâgu kōses ge gaxusib âsa ge i, tsî koro ǂhâgu kōse ǂhabasib âsa, haka ǁhôagu xa, tsî ǃnona ǂhâgu kōse ǀgapisib âsa.

²Tsîb ge ǁîs di ǁnâga haka ǁhôagu âs ai ge dī; ǁîsa xu gu ge ǁnâgu âsa hâ ge i; tsîb ge ǁîsa ǂaib ǀkha ge ǃkhûǀkhā.

³Tsîb ge ǁkhāti sîsenūdan altars din hoana ge dī, sūdi tsî sîsenbē-ūxūn tsî ǀgapiǃoredi tsî ferkhegu tsî ǂnomǃoredi tsîna; ǁîs di sîsenūxūn hoanab ge ǂaib xa ge dī.

⁴Tsîb ge ǁkhāti altarsa rostera ge dība, ǂaib xa ǂgapuhe hâ ǂhams khami ība, ǁîs di ǃgûǂnamipes ǃnaga, ǃnagaba xu ǁîs di ǁaegub kōse.

⁵Tsîb ge haka ǃganuna ge ǂnâ, haka ǁhôagu ǂaib rosteri dib tawa, tanihaikha di ǃkhaise.

⁶Tsîb ge tanihaikha akasiahain ǀkha dī tsî ǂaib ǀkha ge ǃkhûǀkhā kha.

⁷Tsîb ge tanihaikha ǁnā ǃganun altars xōǀkhā hân ǃnâ ge ǂgā, ǁîkha ǀkhas nî tanihega; tsîb ge ǁîsa ǃnaon ǀkha ge dī ǃgoaǃnāse.

⁸Tsîb ge ǁkhāti ǂaiǃoreb khōsens diba ge dī, ǂaib ǂais âb ǀkha, ǁnā mûsenxūdi, ǀhûpe ra hā taradi, ǀhûpe tentoms ǀhûs dis di dao-ams aiǃâ ra hādi didi xa.

⁹Tsîb ge ǁkhāti ai-omma ge dī; ǃkhawagasǀî hâ ǃgū-aiǃkhaigu ai-ommi digu ge ǀui ǂgāǃnâguhe hâ lineǃkhai ge i, ǀguikaidisi ǂhâgu kōse.

¹⁰ǁÎgu di ǀgamdisi ǂkhâǃnâhaigu tsî ǁîgu di ǂaidi ge ǂaib ǀkha ge dīhe hâ i; nē ǂkhâǃnâhaigu di ǂhaoǀurin tsî ǃgae-ūdan âgu ge ǀhaiǀuri ge i.

¹¹Tsî ǀapas di ǁhôas ai ǀguikaidisi ǂhâgu kōse, ǁîgu di ǀgamdisi ǂkhâǃnâhaigu tsî ǀgamdisi ǂaidi âgu ge ǂaib ǀkha ge dīhe hâ i; ǂhaoǀurin ǂkhâǃnâhaigu din tsî ǁîgu di ǃgae-ūdan ge ǀhaiǀuri ge i.

¹²Tsî huriǂoasǀî gu ge ǃgū-aiǃkhaiga ge hâ i, korodisi ǂhâgu kōse; ǁîgu di ǂkhâǃnâhaigu ge disi tsî ǂaidi âgu ge ge disi i; ǂhaoǀurin ǂkhâǃnâhaigu din tsî ǃgae-ūdan âgu ge ge ǀhaiǀuri i.

¹³Tsî aiǂoas ǁhôas tawa aiǂoasǀî gu ge korodisi ǂhâ ge i.

¹⁴ǃGū-aiǃkhaigu ǁnā ǀkhāb digu ge disikoroǀa ǂhâgu kō ge i; ǁîgu di ǂkhâǃnâhaigu ge ǃnona tsî ǂaidi âgu ge ge ǃnona i.

¹⁵Ai-ommi dao-ams nau ǀkhāb ai, nē ǀkhāb tsî nau ǀkhāb ai gu ge ǃgū-aiǃkhaiga ge hâ i, disikoroǀa ǂhâgu kōse: ǁÎgu di ǂkhâǃnâhaigu ge ǃnona tsî ǂaidi âgu ge ǃnona ge i.

¹⁶ǃGū-aiǃkhaigu ai-ommi ǂnamipe hâgu hoagu ge ge ǀui ǀhôahe hâ lineǃkhai ge i.

¹⁷Tsî ǂaidi ǂkhâǃnâhaigu didi ge ge ǂai i, tsî ǂhaoǀurin ǂkhâǃnâhaigu din tsî ǁîgu di ǃgae-ūdan ge ǀhaiǀuri ge i, tsî ǂamais ǁîgu danadi dis ge ǀhaiǀuri ge i, tsî ǂkhâǃnâhaigu, ai-ommi digu hoagu ge ge ǀhaiǀurib ǀkha ǃkhûǀkhāhe hâ i.

¹⁸Tsî ǃgū-ais ai-ommi di ǁāb dis ge anansa sîsenai ge i ǀhommiǂhoab xa tsî purpurǀapab xa tsî îǀapab xa tsî ǀui ǀhôahe hâ ǃuri lineǃkhaib xa; ǀgamdisi ǂhâgu kōseb ge gaxuba ge ī i tsî ǀgapisib ǂhabasib ǃnâ koro ǂhâgu kōse ai-ommi di ǃgū-aidi ǃoagu.

¹⁹Tsî ǁîgu di haka ǂkhâǃnâhaigu tsî haka ǂaidi âgu ge ge ǂai i. ǁÎgu di ǂhaoǀurin ge ge ǀhaiǀuri i; tsî ǂamais ǁîgu danagu dis tsî ǃgae-ūdan âgu ge ǀhaiǀuri ge i.

²⁰Tsî tabernakeli tsî ai-ommi ǂnamipe hâ khaoǂgāxūdi ge ge ǂai i.

²¹Nēn ge xūn, ǃgôahe hân, tabernakeli din, ǀhûǀguitimîs di tabernakeli din, hîa ǃgôahe hâna Moseb di amsa ǃoa Leviǁîgu di ǃoabasa xu, Itamari, prister Aronni ôab di ǃommi ǀkha.

²²Tsî Besaleeli, Uri ôab, Huri ôab, Judab ǃhaos dib, ǁîb ge ǃKhūb ge Moseba mîmā xūn hoana gere dī.

²³Tsî ǁîb ǀkha Oholiab, Ahisamaxi ôab, Danni ǃhaos dib, sîsen ǁkhā-aob tsî ǁnâuǃāxa ǁāǁāǁkhāsabeb tsî ananǁkhāsabeb ǀhommiǂhoab ǃnâ tsî purpurǀapab ǃnâ tsî îǀapab ǃnâ tsî ǀui lineǃkhaib ǃnâ.

²⁴ǃHuniǀurib, nē sîsenni ǃnâ ge sîsenūheb hoab, nē sîsenni ǃanusib dib hoab ǃnâ, ǁnāb ǃhuniǀurib gongonǁguibas dib ge ǀgamdisikhoeseǀa talend ge i tsî hûkaidisi tsî ǃnonadisi sekelde, ǃanusib di sekels ǃoa.

²⁵Tsî ǀhaiǀurib ǀhaohâb xa ǃgôahe hâgu dib ge ǀguikaidisi talende ge i, tsî hûkaidisihûdisikoroǀa sekelde, ǃanusib di sekels ǃoa.

²⁶ǀGui bekasa mâ danas hoas ǂama, ǃkhare sekels ge a ǁî, ǃanusib di sekels ǃoa, mâb, ǃgôahe hâga ge ǁaeǁaesenni hoab xa, ǀgamdisi kurigu tsî ǁnāsa ǃnā hâgu ǃnanikaidisi tsî ǃnonaǀoadisikorokaidisi tsî korodisi khoegu xa.

²⁷Tsî di ge ǀguikaidisi talende ǀhaiǀurib xa ge hâ i, ǃanusib di ǂaidi nî ǂnâhega, tsî ǂgāmâisab di ǂaidi; ǀguikaidisi ǂaide di ge ǀguikaidisi talende hâba ge i, ǀgui talensa mâ ǂais hoasa.

²⁸Tsî ǀguiǀoadisihûkaidisi tsî hûdisikoroǀa sekelde xub ge ǂkhâǃnâhaigu di ǂhaoǀurina ge dī, tsîb ge danadi âga ge ǃkhûǀkhā tsî ǁîga ǃgae-ūdan ǀkha ge ǃgaeǂnamipe.

²⁹Tsî ǂaib gongonǁguibas dib ge hûdisi talende ge i tsî ǀgamǀoadisihakakaidisi sekelde.

³⁰Tsîb ge ǁîb xa, ǂaidi ǀhûs di tentoms di ǁāb dide ge dī tsî ǂaib altars tsî ǂaib rosteri ǁîs diba, tsî altars di sîsenūdan hoana.

³¹Tsî ǁkhāti ai-ommi ǂnamipe hâ ǂaide tsî ǂaidi ai-ommi daos dide, tsî ǂgāxūdi tabernakeli didi hoade tsî ai-ommi ǂnamipe hâ ǂgāxūdi hoade.