Read Khoekhoegowab Eksodus 39 Bible Online

Eksodus 39 - Khoekhoegowab bible

Eksodus 39

¹Tsî gu ge ǁkhāti sîsensaran, ǃanusib ǃnâ ǁîn ǀkha nî ǃoabahena ge dī ǀhommiǂhoab xa, tsî purpurǀapab xa tsî îǀapab xa; tsî gu ge ǁkhāti ǃanu saran, Aronna anuba hâna ge dī, ǃKhūb ge Moseba mîmā khami.

²Nētib ge efoba ge dī ǃhuniǀurib xa, tsî ǀhommiǂhoab xa tsî purpurǀapab xa tsî ǀui ǀhôahe hâ lineǃkhaib xa.

³Tsî gu ge ǃhuniǀuriǃâga ge ǂnauǁgāǁgā tsî ǁîga ǁapagu ǃnâ ge ǃgaoǃā, dīǂgāhe gu nîse ǀhommiǂhoab ǁaegu tsî purpurǀapab ǁaegu tsî ǀui lineǃkhaib ǁaegu, hoan xa ǁāǁāǁkhāsa sîsenai-i ai.

⁴Tsî gu ge ǃgaeǁae ra ǃhâukha ǃhōra dikha ǁîb tawa ge dī; ǁîb di ǃnamkha hoakha aib ge ge ǃgaeǁaehe.

⁵Tsî ǁāǁāǁkhāsa ǃhâub, efob âb dib, ǁîb ai hâb ge ǁîb di sîsenni khami ge ī ǁkhā xūn xa; ǃhuniǀurib xa tsî ǀhommiǂhoab xa tsî purpurǀapab xa tsî îǀapab xa, tsî ǀui ǀhôahe hâ lineǃkhaib xa, ǃKhūb ge Moseba mîmā khami.

⁶Tsî gu ge ǁkhāti sardoniksǀuira ge ǁāǁā ǃhuniǀuriǂgaerodi xa ǃkhōǂgāhe hâǃâ, segelxoaǂgās khami xoaǂgāhe hâǃâ, Israeli ôagu di ǀondi ǀkha.

⁷Tsîb ge ǁîra ǂgaeǃapaǃhâukha efob dikha ai ge ǂnûi, Israeli ôan di ǂâiǂâisenǀuise, ǃKhūb ge Moseba mîmā khami.

⁸Tsîb ge ǁkhāti ǁkhaiǃkhaiba ge dī, hoan xa ǁāǁāǁkhāsa sîsenai-i xa, efob di sîsenni khami, ǃhuniǀurib xa tsî ǀhommiǂhoab xa, tsî purpurǀapab tsî îǀapab xa, tsî ǀui ǀhôahe hâ lineǃkhaib xa.

⁹ǁÎb ge hakaǁhôaxa ge i; ǃhonarisaseb ge ǁkhaiǃkhaiba ge dīhe, ǀgui ǂhaob kōse gaxu tsî ǀgui ǂhaob kōse nî ǂhaba, ǃhonarisase.

¹⁰Tsî gu ge ǁîba haka ǁgaradi ai ǀuin ǀkha ge ǀoaǀoa: ǂGuro ǁgaras ai ǀgui sardis, ǀgui topas tsî ǀgui karbonkels tsîna; nēs ge ǂguro ǁgarasa;

¹¹tsî ǀgamǁî ǁgaras ai ǀgui smarags tsî ǀgui safirs tsî ǀgui diamants tsîna;

¹²tsî ǃnonaǁî ǁgaras ai ǀgui hiasints tsî ǀgui axats tsî ǀgui ametis tsîna;

¹³tsî hakaǁî ǁgaras ai, ǀgui turkoes tsî ǀgui sardoniks tsî ǀgui jaspis tsîna; ǃhuniǀuriǂgaerodi ǃnâ ǃkhōǂgāhe hâǃâ, ǁîdi di ǁgaradi ǃnâ.

¹⁴Tsî nē ǀuidi Israeli ôan di ǀondi ǀkha hâdi ge disiǀgamǀa ge i, ǀondi ân ǀkha, segelxoaǂgās ǀkha; mâs hoas ǁîs di ǀons ǀkha disiǀgamǀa ǃhaodi ǃoa.

¹⁵Tsî gu ge ǁkhāti ǁkhaiǃkhaib tawa ǀguitikōse ra ǀamǀam ǁkhamrokha ge dī, ǀhôahe hâ sîsenai-i xa ǀui ǃhuniǀurib xa.

¹⁶Tsî gu ge ǀgam ǃhuniǀuriǂgaerora ge dī, tsî ǀgam ǃhuniǀuriǃganura; tsî gu ge nē ǀgam ǃganura ǁkhaiǃkhaib di ǀamra tawa ge ǂnûi.

¹⁷Tsî gu ge ǁnā ǀgam ǀhôahe hâ ǃhuniǀuriǁkhamrokha ǁnā ǃganura tawa ge ǁapoǁapo, ǀgam ǀamra ǁkhaiǃkhaib dira tawa.

¹⁸Tsî nau ǀamra ǁnā ǀgam ǀhôahe hâ ǁkhamrokha dira gu ge ǀgam ǂgaerora tawa ge ǁapoǁapo, tsî gu ge ǁîra ǂgaeǃapaǃhâukha efob dikha tawa ge ǁapoǁapo, aiǃâ hâ ǃnammi âb ai.

¹⁹Tsî gu ge ǁkhāti ǀgam ǃhuniǀuriǃganura ge dī, tsî ǁîra ǀgam ǀamra ǁkhaiǃkhaib dira tawa ge ǂnûi ǃnāb ǃnâ hâ ǂomamǃgâb tawa efob di ǀkhāb ai.

²⁰Tsî gu ge ǁkhāti ǀgam ǃhuniǀuriǃganura ge dī, efob di ǀgam ǂgaeǃapaǃhâukha tawa gu ge ǁapoǁapo ra, aiǃâ hâ ǀkhāb, ǃnaga hâb dib ai ǃgaeǁaes âb ǃoagu, efob di ǁāǁāǁkhāsa ǃhâub ǂamǃnâ;

²¹tsî gu ge ǁkhaiǃkhaiba ǃganura âb ǀkha efob di ǃganura tawa ge ǃgae ǀhomǂhoa tsuri-i ǀkha, ǁāǁāǁkhāsa ǃhâub efob dib aib nî hâse; ǁkhaiǃkhaib efoba xu ǀgorahe tidega, ǃKhūb ge Moseba mîmā khami.

²²Tsîb ge anaǂamxūb efob diba ge dī, ǂgāǃnâguhe hâse ǀhommiǂhoab ǀguib xa.

²³Tsî ǁhūs anaǂamsarab dis ge ǁaegub ǃnâ ge hâ i, ǀuri sarab di ǁhūs khami; nē ǁhūs ge ǂomamǃgâ-e ǁîs ǂnamipe ge ūhâ i, doas tidega.

²⁴Tsî anaǂamsarab di ǂomamǃgâgu ai gu ge granatǂûna ge dī ǀhommiǂhoab xa tsî purpur tsî îǀapab xa ǀhôahe hâba.

²⁵Tsî gu ge ǁkhāti ǀōǀōǀurirode ge dī ǃhuniǀurib ǀguib xa, tsî gu ge ǀōǀōǀurirode granatǂûn ǁaegu ge ǂnûi, anaǂamsarab di ǂomamǃgâgu ǂnamipe, granatǂûn ǁaegu.

²⁶O i ge ǀgui ǀōǀōǀuriro-i tsî ǁkhawa ǀgui granatǂû-e ge hâ i, ǁkhawa ǀgui ǀōǀōǀuriro-i tsî ǀgui granatǂû-e anaǂamsarab di ǂomamǃgâgu ǂnamipe, ǃoaba nîse, ǃKhūb ge Moseba mîmā khami.

²⁷Tsî gu ge ǁkhāti ǀui lineǃkhaib xa sarana Aronni tsî ǁîb di ôagu tsîna ge dība ǂgāǃnâguhe hâ sîsenai-i xa.

²⁸Tsî ǃkhaib ona ǀui ǃuri ǃkhaib xa, tsî anxa ǀgapadi tsîna ǀui ǃuri ǃkhaib xa, tsî lineǀnūsarana ǀui ǀhôahe hâ lineǃkhaib xa.

²⁹Tsî ǃgaesenxūba ǀui ǀhôahe hâ lineǃkhaib xa tsî ǀhommiǂhoab xa tsî purpurǀapab tsî îǀapab xa, anansa sîsenai-i xa, ǃKhūb ge Moseba mîmā khami.

³⁰Tsî gu ge ǀuriǃâs ǃanusib di krons disa ge dī ǀui ǃhuniǀurib ǀguib ǀkha, tsî gu ge ǁîs ai xoa-e ge xoa segelxoaǂgās ǀkha: ǃANUSIB ǃKHŪB DIB ti.

³¹Tsî gu ge ǁîs ai tsuri-e ge ǁapoǁapo ǀhommiǂhoab xa tsî ǃkhaib ǀgapise i nî ǁapoǁapohese, ǃKhūb ge Moseba mîmā khami.

³²Nētib ge tabernakeli di sîsenni ǀhûs di tentoms dib hoaba ge dītoahe; tsî Israeli ôan ge ǁîna ge dī, ǃKhūb ge Moseba mîmān hoan ǃoa, nētin ge ge dī.

³³ǁNās khaoǃgân ge tabernakela Moseb ǃoa ge ūsī, tentoms tsî ǁîs di sîsenūdan hoan; ǁîs di ǂhaoǀurin; ǁîs di ǃnaogu, ǁîs di daoǁkhaegu tsî ǁîs di ǂkhâǃnâhaigu tsî ǁîs di ǂaidi tsîna.

³⁴Tsî ǃgū-aisa ǀapaǀapahe hâ ǂkharagūkhōgu xa, tsî ǃgū-aisa ǃâukhōgu xa, tsî ǃgū-ais di ǂgāmâisaba,

³⁵ǂgaes ǀhûǀguitimîs disa tsî ǁîs di tanihaikha tsî ǂkhîbagu-aisa.

³⁶Tāb ǁîb di sîsenūxūn hoan tsî ǁgauperegu tsîn ǀkha;

³⁷ǃnâ ra kandelari ǁîb di ǃamamǀaedi ǀkha, ǃamamǀaedi, hîa ra ǁāǁāhedi tsî ǁîb di sîsenūdan hoan; tsî olib ǃamamxūs dib tsîna;

³⁸tsî ǃhuniǀuri-altars tsî ǂkhau-olib tsî ǀanǀansîsenni ǃgâihamxūn dib tsî ǂganais tentoms di dao-ams disa;

³⁹ǂaib altars tsî ǂaib rosteri ǁîs dib, ǁîs tanihaikha tsî ǁîs di sîsenūxūn hoan, khōsenǃoreb tsî ǁîb di ǂais tsîn;

⁴⁰ǂgāmâiǃkhaigu ai-ommi digu, ǁîb di ǂkhâǃnâhaigu tsî ǁîb di ǂaidi, tsî ǂganais ai-ommi di dao-ams dis, ǁîb di tsurigu tsî ǁîb di ǂgāhaidi, tsî sîsenūdan tabernakeli ǃoabas din, ǀhûs di tentoms din;

⁴¹ǃoabas di saran ǃanusib ǃnâ nî sîsenūhese, ǃanu saran prister Aronni din, tsî saran ǁîb ôagu din tsîna, pristersîsenǃâsa gu nî ǃoabase.

⁴²ǃKhūb ge Moseba mîmān hoan, ǁnātin ge Israeli ôana sîsenni hoaba gere dī.

⁴³Ob ge Moseba sîsenni hoaba ge kō, tsî mû, ǁîn ge ǁîba ge dī hâ i, ǃKhūb ge Moseba mîmā khami: ǁNātin ge ǁîba ge dī hâ i. ǃNubaib ge Moseba ǁîna ge ǀkhae.