Read Khoekhoegowab Eksodus 4 Bible Online

Eksodus 4 - Khoekhoegowab bible

Eksodus 4

¹ǃNubaib ge Moseba ǃeream tsî ge mî: Xawe kō, ǁîn ge ǂgom te tide, tsî ǁkhāti ti domma ǁnâu tide; ǃKhūb ge sa tawa ǂhai tama hâ tin kom ǁîna nîra mîo.

²Ob ge ǃKhūba ǁîb ǃoa ge mî: Tare xū-e sa ǃomǁaets ūhâ-e? Ob ge: ǀKharu-i, ti ge mî.

³Ob ge ǁîba ge mî: ǃHūb ai aoǁgui i! Ob ge ǁî-e ǃhūb ai ge aoǁgui. ǃNubai i ge ge ǀao kai; ob ge Moseba ǁîba xu ge ǁhâ.

⁴ǃNubaib ge ǃKhūba Moseb ǃoa ge mî: Sa ǃomma ǀhōǂui îts ǂareb ai ǃkhō bi! Ob ge ǃommi âba ǀhōǂui tsî ge ǃkhō bi; ob ge ǃomǃnāb âb ǃnâ ge ǀkharu kai.

⁵ǁÎn nî ǂgomga, ǃKhūb ǁîn îgu di Elob, Abrahammi di Elob tsî Isaki di Elob tsî Jakob di Elob go ǂhai tsi ǃkhaisa.

⁶Tsîb ge ǃKhūba ǃaruǀî ǁîb ǃoa ge mî: Sa ǃomma nēsi sa ǁkhaib ǃnâ ǀhōǂgā! Ob ge ǃommi âba ǁîb di ǁkhaib ǃnâ ge ǀhōǂgā; ǁnās khaoǃgâb ge ǁîba ge ǂgaeǂui, tsî mû, ǃommi âb ge ǃomamaxa ge i, ǃuri tsamaros khami.

⁷Ob ge ǁîba ge mî: Sa ǃomma ǁkhawa ǀhōǂgā sa ǁkhaib ǃnâ. Ob ge ǃommi âba ǁkhawa ǁîb di ǁkhaib ǃnâ ge ǀhōǂgā; ǁnās khaoǃgâb ge ǁîba ǁkhaib âba xu ge ǂgaeǂui, tsî mû, ob ge ǁkhawa nau ǁgans khami ge ī.

⁸Tsî i ge nîra ī, ǂgom tsi taman ga io, tsî ǁkhātin ga dommi ǂguro saos diba ǁnâu tama io, on ge dommi nē ǀuni saos diba nîra ǂgom.

⁹Tsî i ge nîra ī, nē ǀgam saoran ga ǂgom tama io, tsî sa domma ǁnâu tama io ots ge Nylǃāb di ǁgamgu xa ū tsî nî ǂnâsab ai ǁhō gu; o gu ge ǁnā ǁgamgu, Nylǃāba xuts nî ūga nîra ǀao kai ǂnâsab ai.

¹⁰ǃNubaib ge Moseba ǃKhūb ǃoa ge mî: Okha, ǃKhūtse, tita ge ǃgâise a ǃhoa ǁoa khoeta, ǁarisa xus kao, aetsēsa xus kao ǁnā ǁaeb ǁîb aits sa ǃgāta ǀkha goro ǃhoaba xus kao: ǃGom ams â-i tsî ǃgom nams â-i ta kom titao.

¹¹Ob ge ǃKhūba ǁîb ǃoa ge mî: Tari-e khoeba amsa ge dība, tsî tari-e ǃgomeb, ǂganaǂgae hâb, mû rab tsî ǂgī hâba ge dī? Tita ǁî tama ta hîa ǃKhūta?

¹²Îts ǁnâi ǃgû, o ta ge tita sa ams ǀkha hâ tsî nîra ǁkhāǁkhā tsi, tare xū-ets nî ǃhoa ǃkhaisa.

¹³Xaweb ge ǁîba ge mî: Okha, ti ǃKhūtse, ǂgaots ra khoeb hoab di ǃomma sî re!

¹⁴ǃNubaib ge ǃKhūb di ǁaiba ge khâi Moseb ǂama, tsîb ge ǁîba ge mî: Aronni, Leviǁîba sa ǃgâsa tamaba? Tita ge a ǂan, ǁîb ǃgâise a ǃhoa ǁkhā ǃkhaisa, tsî kō ǁkhāti, ǁîb ge nîra ǂoaxa, ǃgûǃoa tsib nîse; satsab ga mûo, ob ge ǂgaob âb ǃnâ nîra ǃgâiaǂgao.

¹⁵Ots ge satsa ǁîb ǀkha ǃhoa tsî mîde ams âb ǃnâ nîra ǁgui; o ta ge tita sa ams ǀkha nîra hâ; o ta ge tita nîra ǁkhāǁkhā kho tare-e kho nî dī ǃkhaisa.

¹⁶Tsîb ge ǁîba sa amǃnâs ai ǁaes ǀkha nîra ǃhoa; tsî i ge nîra ī, ob ge ǁîba satsa amse nîra ība, ots ge satsa ǁîba Elose nî ība.

¹⁷Îts ǁnâi ǁnā ǀkharus, ǁîs ǀkhats ǁnā saode nî dīsa sa ǃomǁae ū.

¹⁸ǃNubaib ge Moseba ǃgû tsî Jetrob, ǀuiǁgûb âb ǃoa oa tsî ǁîb ǃoa ge mî: ǃGû kai te re î ta ti ǃgâsagu Egipteb ǃnâ hâgu ǁga oa re, î ta mû re ise gu ganupe a ûitsama ǃkhaisa. Ob ge Jetroba Moseb ǁga: ǂKhîb ǃnâ ǃgû re! ti ge mî.

¹⁹ǁKhātib ge ǃKhūba Moseb ǃoa Midianni ǃnâ ge mî: ǃGû îts Egipteb ǃoa ǃhoba, ǁnā aogu sa ǀomsa gere ôa-amgu hoagu ge ǁō xuige.

²⁰Ob ge Moseba taras âba ū tsî ǀgôakha âba tsî ǁîna eseli ai ūǃgû tsî ǁkhawa ge oa Egipteǃhūb ǃoa; tsî Moseb ge ǁnā ǀkharus Elob disa ǃomǁae ge ū.

²¹Tsî ǃKhūb ge Moseb ǃoa ge mî: Sats ra ǃgû, Egipteb ǃoats nî ǃhobase, xuige mûbasen, îts Faraob aiǃâ ǁnā buruxa dīn, sa ǃomǁae ta ge mâin hoana dī; xawe ta ge tita ǂgaob âba nîra karokaro, ǁaesab doe kai tidega.

²²ǃNubaits ge Faraob ǁga nî mî: Nētib ra ǃKhūba mî: Ti ôab, ti ǂguroǃnaesabeb ge Israela.

²³O ta ge sa ǃoa go mî: Ti ôaba doe kai îb tita ǃoaba, xawets ga satsa doe kai bisa ǂkhāo, o ta ge tita sa ôab, sa ǂguroǃnaesabeba nîra ǃgam.

²⁴Tsî i ge daob ai ge ī, sâu-ommi ǃnâ, ob ge ǃKhūba ǁîba ǃoa tsî ge ǃgam bi ǂgao.

²⁵Os ge Siporasa ǀuigôa-e ū tsî aikhōb ǁîs ôab diba ge ǃgao tsî ǁîba ǂaira âb aiǃâ aoǁgui tsî ge mî: Amase, sats ge ǀaoǃkhoeǂgâsabese ība te.

²⁶Ob ge ǁîba ge ǀûǀkhā bi. ǁNāǃnubais ge ǁîsa: ǀAoǃkhoeǂgâsabets, ti ge mî, ǃgaos ǃaroma.

²⁷ǁKhātib ge ǃKhūba Aronni ǃoa ge mî: Moseba ǃgûǃoa ǃgaroǃhūb ǃoa. Ob ge ǃgû tsî ǁîba ǃhommi Elob dib tawa ǃoa tsî ge ǁoa bi.

²⁸Ob ge Moseba Aronna ǃKhūb ǁîba go sîb di mîdi hoade ge ǂanǂan tsî saodi ǁîb go mîmā bi di hoade.

²⁹ǃNubai kha ge Moseb tsî Aronni tsîkha ǃgû tsî Israeli ôan di kaigu hoaga ge ǀhaoǀhao.

³⁰Ob ge Aronna ǁnā mîdi ǃKhūb ge Moseb ǃoa ǃhoadi hoade ge ǃhoa; tsîb ge ǁnā saode ge dī ǁaes di mûdi aiǃâ.

³¹Os ge ǁaesa ge ǂgom; tsî ǁnâun geo, ǃKhūb ge Israeli ôana sari tsî ǁîn di ǁgâiǀābab go mû ǃkhaisa, on ge ǃgamǃgâ tsî ge ǀgoreǀî.