Read Khoekhoegowab Eksodus 40 Bible Online

Eksodus 40 - Khoekhoegowab bible

Eksodus 40

¹ǃAruǀîb ge ǃKhūba Moseb ǃoa ge mî:

²ǀGui tsēs ǂguro ǂkham ǁkhâb dis ai, ǂguro tsēs ǁkhâb dis aits ge tabernakeli, ǀhûs di tentomsa nî ǂnaumâi.

³Tsîts ge ǁnāpa nî mâi ǀhûǀguitimîs di ǂgaesa; tsîts ge ǂgaesa ǂgāmâisab ǀkha nî ǃgū-ai.

⁴ǁNās khaoǃgâts ge tāba nî ūǂgâ, tsîts ge ǁîb ai nî ǁāǁāhe xūna nî ǁāǁā; tsîts ge ǁkhāti kandelara nî ūǂgâ tsî ǃamamǀaedi âba nî ǃamam.

⁵Tsîts ge ǃhuniǀuri-altarsa ǀanǀansîsenni ǃoa ǂgaes ǀhûǀguitimîs dis aiǃâ nî mâi; ǃnubaits ge ǂganais tabernakeli di dao-ams disa nî ǂgāmâi.

⁶Tsîts ge ǁkhāti altars khauǁguibas disa nî mâi tabernakeli tentoms ǀhûs dis di dao-ams aiǃâ.

⁷Tsîts ge khōsenǃoreba tentoms tsî altars tsîra ǁaegu nî mâi; tsîts ge ǁgam-e nî ǂnâǂgā.

⁸ǁNās khaoǃgâts ge ai-omma nî ǂnûiǂnamipe, tsîts ge ǂganaisa nî ǂgāmâi, ai-ommi di dao-ams tawa.

⁹ǃNubaits ge ǂkhau-oliba ū tsî tabernakeli tsî ǁîb ǃnâ hân hoana nî ǂkhau; tsîts ge ǁîba nî khai ǁîb di sîsenūdan hoan ǀkha, îb ǃanusib ase ība tsî.

¹⁰Tsîts ge ǁkhāti altars khauǁguibas disa nî ǂkhau tsî ǁîs di sîsenūdan hoana; tsîts ge altarsa nî khai, îs altarsa ǃanusigu di ǃanusib ase i, ti.

¹¹ǃNubaits ge khōsenǃoreba nî ǂkhau tsî ǂais âb tsîna; nētits nî ǁîba khai.

¹²Tsîts ge ǁkhāti Aronni tsî ǁîb di ôagu tsîga nî ǀgū kai tentoms ǀhûs dis di dao-ams tawa, tsîts ge ǁîga ǁgam-i ǀkha nî ǁā.

¹³Tsîts ge Aronna ǃanu sarana nî ana; tsîts ge ǁîba nî ǂkhau tsî ǁîba nî khai, titab nî pristerǃoabasa ǃoabaga.

¹⁴Tsîts ge ǁîb di ôagu ona nî ǀgū kai tsî ǁîga ǃanu sarana nî ǂgaeǂgā.

¹⁵Tsîts ge ǁîga nî ǂkhau, ǁîgu di îbats ge ǂkhau khami, pristerǃoabasa gu nî tita ǃoabase. Tsî i ge nî ī, ǁîgu di ǂkhaus ge ǀamo pristersise nî ība gu ǃkhaisa ǁîgu di ǃhaodi tawa.

¹⁶Ob ge Moseba ge dī, ǃKhūb ge ǁîba mîmān hoan ǃoa: ǁNātib ge ge dī.

¹⁷Tsî i ge ge i, ǂguro ǁkhâb ǃnâ ǀgamǁî kurib ai, ǂguro tsēs ǁkhâb dis aib ge tabernakela ge ǂnaumâihe ǃkhaisa.

¹⁸Moseb ge tabernakela ge ǂnaumâi tsîb ge ǂaidi âba ge mâi, tsî ǃnaon âba ge ǂgā, tsî daoǁkhaegu âba ge ǁapoǁapo, tsî ǂkhâǃnâhaigu âba ge ǂnaumâi.

¹⁹Tsîb ge tentomsa ge ǃā tabernakeli ǂamai, tsîb ge tentoms di ǃgū-aisa ǁîb ǂamai ge ǁgui, ǃKhūb ge Moseba mîmā khami.

²⁰ǃNubaib ge ǀhûǀguitimîsa ū tsî ǂgaes ǃnâ ge ǂgā si, tsîb ge tanihaikha ǂgaes tawa ge ǂgā, tsîb ge ǂkhîbagus aisa ǂgaes ǂamai ge ǂnûi.

²¹Tsîb ge ǂgaesa tabernakeli ǃnâ ge ǂgā, tsîb ge ǂgāmâisab ǂganais diba ge ǂgāmâi tsî ǀhûǀguitimîs di ǂgaesa ge ǃgū-ai, ǃKhūb ge Moseba mîmā khami.

²²Tsîb ge ǁkhāti tāba ge mâi tentoms ǀhûs dis ǃnâ tabernakeli di ǃnammi ai, ǀapasǀî ǂgāmâisab ǃauga.

²³Tsîb ge ǁîb ai pereba ge ǁāǁāǂhanuǂhanu ǃKhūb di ais aiǃâ, ǃKhūb ge Moseba mîmā khami.

²⁴Tsîb ge ǁkhāti kandelara tentoms ǀhûs dis ǃnâ ge mâi tāb ǃoa-ai tabernakeli di ǀkhāb ai ǃkhawagasǀî.

²⁵Tsîb ge ǃamamǀaede ge ǃamam ǃKhūb di ais aiǃâ, ǃKhūb ge Moseba mîmā khami.

²⁶Tsîb ge ǃhuniǀuri-altarsa ge mâi, ǀhûs di tentoms ǃnâ, ǂgāmâisab aiǃâ.

²⁷Tsîb ge ǁîs ai ǃgâihamxūn di ǀanǀansîsenna ge ǀanǀan, ǃKhūb ge Moseba mîmā khami.

²⁸Tsîb ge ǁkhāti ǂganais tabernakeli di dao-ams disa ge ǂgāmâi.

²⁹Tsîb ge altars khauǁguibas disa tabernakeli, tentoms ǀhûs dis di dao-ams tawa ge mâi; tsîb ge ǁîs ai khauǁguibadi tsî ǂûǁguibadi tsîde gere ǁguiba, ǃKhūb ge Moseba mîmā khami.

³⁰Tsîb ge ǁkhāti khōsenǃoreba ǀhûs di tentoms tsî altars ǁaegu ge mâi; tsîb ge ǁgam-e ge ǂnâǂgā, ǁāsen nîse.

³¹Tsî Moseb tsî Aronni tsî ǁîb di ôagu tsîgu ge ǁîb ǃnâ ǁîgu di ǃomgu tsî ǁîgu di ǂaidi tsîna gere ǁā.

³²ǂGâ gu gereo ǀhûs di tentoms ǃnâ, tsî altarsa gu gere ǀgūo, o gu ge gere khōsen, ǃKhūb ge Moseba mîmā khami.

³³Tsîb ge ǁkhāti ai-omma ge mâikhâi, tabernakeli tsî altars ǂnamipe, tsîb ge ǂganais ai-ommi di ǁāb disa ge ǂgāmâi. Nētib ge Moseba sîsenna ge dītoa.

³⁴ǃNubais ge ǀnanusa ǀhûs di tentomsa ge ǃgū-ai; ob ge ǂkhaisib ǃKhūb diba tabernakela ge ǀoaǀoa.

³⁵Moseb ge ǀhûs di tentoms ǃnâ ǂgâ ǁoa is kōse, ǀnanus ǁîs ai hâ amaga tsî ǂkhaisib ǃKhūb dib ge tabernakela ǀoaǀoa xui-ao.

³⁶Tsî ǀnanus ge ǃhâkhâiheo tabernakeli di ǂamaisa xu, on ge Israeli ôana ge dāǁnâ ǁîn di doegu hoagu ǃnâ.

³⁷Xawe ǀnanus ge ǃhâkhâihe tama io, on ge ǃgû tama ge i, ǁîs ge ǃhâkhâihe tsēs kōse.

³⁸ǀNanus ǃKhūb dis ge tabernakeli ai ge hâ i tsēa, tsî ǀaes ge tsuxuba ǁîb ai ge hâ i, Israeli ommi hoaragab di mûdi aiǃâ, ǁîgu di ǃgûdaogu hoagu ai.