Read Khoekhoegowab Eksodus 5 Bible Online

Eksodus 5 - Khoekhoegowab bible

Eksodus 5

¹Tsî ǁnās khaoǃgâ kha ge Moseb tsî Aronni tsîkha ǃgû tsî Faraoba sī ge mîba: Nētib ra ǃKhūb Israeli Eloba mî: Ti ǁaesa doe kai, îs tita ǁâu-e dība ǃgaroǃhūb ǃnâ.

²Xaweb ge Faraoba ge mî: Tariba ǁnā ǃKhūb, dommi âba ta nî ǁnâuǀnamma, Israela ta nî doe kaiga? Tita ge ǁnā ǃKhūba a ǀū, tsî ta ge ǁkhāti Israela doe kai tide.

³O kha ge ǁîkha ge mî: ǁNā Elob, Hebreǁîn dib, ǁîb ge go ǃoa khom; îts ǁnâi doe kai da re ǃnona tsēdi daob kōse ǃgaroǃhūb ǃnâ î da ǃKhūb, sida Eloba ǁguiba re, î da ǁîb xa tā hāǂamhe ǂhīǁō-i ǀkhas karao, gôab ǀkhas karao.

⁴Ob ge Egipteb di gao-aoba ǁîkha ǃoa ge mî: Sakho Moseb tsî Aronni tsîkho! Tarexa kho ǁaesa sîsengu âsa xu ra ǂgaeǁnâ? ǃGû sadu di sîsenni ǃoa.

⁵ǃAruǀîb ge Faraoba ge mî: Mû, ǀnais ge ǁaes ǃhūb disa ǃnāsase a ǂgui; tsî sakho ǁnâi ǁîna kho nî sâ kai sîsengu âna xu?

⁶ǁNā-amagab ge Faraoba ǁnā tsēs ǁkhās ai ge mîmā doeǁga-aogu ǁaes diga tsî ǁîs di ǂamkhoega, mî rase:

⁷Sago ge ǃaruǀî nē khoena ǂgoaǀuidīs tawa ǃhoroǀgâna mā tide ǁaris tsî aetsēs khami; an ǃgû aitsama, în ǃhoroǀgâna sī ǀhaoǀhaobasen.

⁸Î go ǁîna ǁnā ǀgaus ǂgoaǀuidi dis ǁari tsî aetsēn ge dīsa ǁguiǂam, ǁîsa go ǀoro kai tide; ǁausen ra ǃgû amagasa: A da doe î da sida Eloba ǁguiba! tin ra ǃausa.

⁹Nē khoegu ge nî ǃgomǃgombahe sîsenni ǃnâ, î gu dīxūxa, î gu ǁau mîdi xa tā ǂhansen.

¹⁰ǃNubai gu ge ǁaes di doeǁga-aoga ge ǃgûǂoa tsî ǁîn di ǂamkhoegu on, tsî gu ge ǁaes ǃoa ǃhoa tsî ge mî: Nētib ge Faraoba ra mî: Tita ge sado ǃhoroǀgâna mā tide.

¹¹ǃGû î du aitsama ǃhoroǀgâna sī ū, hō du ga ǃkhai-i hoa-i tawa; xawe sadu di sîsenni ge ǀoro kaihe tide.

¹²Os ge ǁaesa Egipteǃhūb hoaragab ǃnâ ge ǀgaru, ǃhoroǃgaoden nî ǀhaoǀhaose, ǃhoroǀgân di amǃnâs ai.

¹³Tsî doeǁga-aogu ge ǁaesa ǁgūǀkhā tsî ge mî: Dīǀamǀam sadu di sîsenga, mâ tsēs hoas di sîsenna ǁîb di tsēs ai ǃhoroǀgân hâ is khami.

¹⁴Tsî ǂamkhoegu Israeli ôan digu, Faraob di doeǁga-aogu ǁîn ǂama ge mâigu, ǁîgu ge gere ǂnauhe, mîn ra xui-ao: Tare xū-i ǃaroma du ǁari tsî nētsē mâibahe du hâ sîsenna dī tama hâ, ǂgoaǀuidīs ǃnâ aibe du ge dī khami?

¹⁵ǁÎ ǃkhais ǃaroma gu ge ǂamkhoegu Israeli ôan diga ǃgû tsî Faraoba ǃauǀî tsî ge mî: Tare xū-i ǃaromats ra sa ǃgāga ǁnāti dī?

¹⁶Sa ǃgāge ge ǃhoroǀgâna māhe tama hâ, xawe gu ge sida ǃoa ra mî: ǂGoaǀuide dī, tsî kō, sa ǃgā ge ge ra ǂnauhe, xawes ge ǀhapisa sa ǁaes di.

¹⁷Ob ge ǁîba ge mî: Sadu ge ǁause ra ǃgû, ǁause du ra ǃgû; ǁnā-amaga du: A da ǃgû, î da ǃKhūba ǁguiba, ti ra mî.

¹⁸ǁNâi ǃgû î du sîsen; xawe du ge ǃhoroǀgâna māhe tide; tsî ti i ī xawe du ge ǂgoaǀuidi di ǀgausa nî māǁnâ.

¹⁹ǃNubai gu ge Israeli ôan di ǂamkhoega ge mû, ǂkhabase gu ra ūhâhe ǃkhaisa, ǁîn ra mî xui-ao: Sago ge ǀoro kai tide ǂgoaǀuidīsa, mâ tsēs hoas di sîsenǃâs xa.

²⁰Tsî gu ge Moseb tsî Aronni tsîkha ge ǃoa, ǁîgu ǃoa-ai ge mâ ikha, Faraoba xu gu ge ǂoaxao,

²¹tsî ǁîkha ǃoa ge mî: Ab ǃKhūba sakho ai kō îb ǀgoraǃgâ, sige ǁamaba kho ge Faraob tawa tsî ǃgāgu âb aiǃâ ge ǀō kai ǃkhaisa, gôaba ǁîgu ǃomǁae ra māse, sige nî ǃgamhega.

²²Ob ge Moseba ǁkhawa ǃKhūb ǃoa oa tsî ge mî: ǃKhūtse, tare xū-i ǃaromats go tsūdī nē ǁaesa? Tare xū-i ǃaromats kha satsa tita go sî?

²³Tita go Faraob tawa sa ǀons ǃnâ nî ǃhoase ǂgâ ǁaeba xub ge nē ǁaesa ra tsūdī; tsî sats ge sa ǁaesa tātsē ore tama hâ.

²⁴ǃNubaib ge ǃKhūba Moseb ǃoa ge mî: Nēsits ge nî mû, Faraob tawa ta nîra dī xū-e. ǀGaisa ǃomma xub kom ǁîna nîra doe kaio, ā, ǀgaisa ǃomma xub kom ǁîna ǃhūba xu nîra doeǁgaǂuio.