Read Khoekhoegowab Eksodus 6 Bible Online

Eksodus 6 - Khoekhoegowab bible

Eksodus 6

¹ǃAruǀîb ge Eloba Moseb ǃoa ǃhoa tsî ǁîna ǃoa ge mî: Tita ge ǃKhūta.

²Tsî Tita ge Abrahammi, Isaki tsî Jakob tsîgu tawa ge ǂhai, Elob Hoaǀgaixab ase, xawe ti ǀons ǃKhūb tis ǀkha ta ǁîgu tawa ǂansa tama ge i.

³Tsî ta ge tita ǁkhāti ti ǃgaeǀhaosa ǁîgu ǀkha ge dī, Kanaanǃhūba ta ǁîga nîra mā ti, ǁnā ǃhūb ǃgûkhoesis âgu dib, ǁîb ǃnâ gu ge ǃhaokhoese hâ iba.

⁴Tsî ta ge tita ǁkhāti ǃgaes Israeli ôan, Egipteǁîn xa ǃgāse ra ūhâhen disa go ǁnâu, tsî ta ge ti ǃgaeǀhaos xa go ǂâi.

⁵ǁNā-amaga mî re Israeli ôan ǁga: Tita ge ǃKhūta, tsî tita ge sado nîra ǂgaeǂguiǂui Egipteǁîn di ǃkhanade xu, tsî tita ge sado nîra ore ǁîn di ǃgāsisa xu, tsî ta ge nîra ore du ǀhōǂuihesa ǁôab ǀkha tsî kai ǀgoraǃgâdi ǀkha.

⁶Tsî ta ge tita sado ti ǁaese nîra ǃkhōǃoa, tsî ta ge tita sado Elose nîra ība; o du ge sado nîra ǂan, tita a ǃKhū sadu di Elo, Egipteǁîn di ǃkhanade xu ra ǂgaeǂguiǂui du ta ǃkhaisa.

⁷Tsî ta ge tita sado nîra ūsī ǁnā ǃhūb ǃoa, ǁîb ǂama ta ti ǃomma ge ūkhâib, ǁîba ta nî Abrahammi, Isaki tsî Jakob tsîga māse; tsî tita ge ǁîba sado ǀumi-amǃnâse nîra mā, tita hîa ǃKhūta.

⁸Tsîb ge Moseba ǁnāti Israeli ôan ǃoa ge ǃhoa, xawen ge Moseba ǁnâu tama ge i, gagas di ǂōǂōsib ǃaroma tsî karosa ǃgāsis ǃaroma.

⁹ǃAruǀîb ge ǃKhūba Moseb ǁga ǃhoa tsî ge mî:

¹⁰ǃGû îts Faraob Egipteb di gao-aob ǁga sī ǃhoa; îb Israeli ôana ǁîb di ǃhūba xu doe kai, ti.

¹¹Xaweb ge Moseba ǃKhūb aiǃâ ǃhoa tsî ge mî: Mû, Israeli ôan xawen ǃgâ te tama hâ, matib kha ǁnâi Faraoba nî ǃgâ te? ǁNās xōǀkhā ta ge ǃgaohe tama hâ amǁgaukha ūhâ.

¹²Tsî ti i ī xaweb ge ǃKhūba Moseb tsî Aronni tsîkha ǀkha ǃhoa tsî ǁîkha mîmāde ge mā Israeli ôan ǃoa tsî Faraob Egipteb di gao-aob ǃoa, Israeli ôana kha nî Egipteǃhūba xu ǂgaeǂguiǂui ti.

¹³Nēgu ge danakhoegu mâ ommi ǁîn îgu dib hoab diga: Rubenni di ôagu, ǂguroǃnaesabeb Israeli dib digu ge Henoxi, Palub, Hesronni tsî Karmib tsîga; nēgu ge Rubenni ommi diga.

¹⁴Tsî Simeonni di ôagu ge Jemueli, Jaminni, Ohadi, Jaxinni, Sohari tsî Sauli Kanaanǁîs di ôab tsîga; nēgu ge Simeonni ommi diga.

¹⁵Tsî nēdi ge Levib ôagu di ǀonde, ǁîgu di ǃnaedi ǃoa: Gersonni, Kehati tsî Merarib tsîga. Tsî kurigu Levib ûib digu ge ǀguikaidisiǃnonadisihûǀa kuri ge i.

¹⁶Gersonni di ôakha: Libnib tsî Simeib tsîkha ǁîkha omkha din ǀkha.

¹⁷Tsî Kehati di ôagu: Amrammi, Jishari, Hebronni tsî Usieli tsîga; tsî kurigu Kehati ûib digu ge ǀguikaidisi tsî disiǃnonaǀa kuri ge i.

¹⁸Tsî Merarib ôakha: Maxlib tsî Musib tsîkha; nēn ge Levib ommi dina ǁîn di ǃnaedi ǃoa.

¹⁹Tsî Amrammi ge Joxebeds, ǁgûb âb ǃgâsasa tarase ge ūbasen, tsîs ge ǁîsa ǁîba Moseb tsî Aronni tsîkha ge ǁoraba; tsî kurigu Amrammi ûib digu ge ǀguikaidisiǃnonadisihûǀa ge i.

²⁰Tsî Jishari di ôagu ge Koraxi, Nefegi tsî Sixrib tsîga.

²¹Tsî Usieli di ôagu ge Misaeli, Elsafanni tsî Sitrib tsîga.

²²Tsî Aronni ge Elisebas, Aminadab ôas, Nasonni ǃgâsasa tarase ge ūbasen; tsîs ge ǁîsa ǁîba Nadab, Abihub, Eleasari tsî Itamari tsîga ge ǁoraba.

²³Tsî Koraxi di ôagu ge Asiri, Elkanab tsî Abiasafi tsîga ge i; nēn ge Koraxǁîgu di ommi dina.

²⁴Tsî Eleasari, Aronni ôab ge Putieli ôadi di ǀguisa tarase ge ūbasen; tsîs ge ǁîsa ǁîba Pinehaba ge ǁoraba. Nēgu ge danakhoegu Leviǁîn îgu diga ǁîgu omgu din ǃoa.

²⁵Nēkha ge Aronni tsî Moseb tsîkha, ǃKhūb ǁîkha ǃoa ge mîkha: Israeli ôana ǂgaeǂguiǂui kho Egipteǃhūba xu ǁîn di ǂnubidi ǃoa.

²⁶Nēkha ge ǁîkha, Faraob, Egipteb di gao-aob ǃoa ge ǃhoakha, î kha ga Israeli ôana Egipteba xu ǂgaeǂguiǂui ti, nēkha ge Moseb tsî Aronni tsîkha.

²⁷Tsî i ge ǁnā tsēs ǁkhās ai ge ī, ǃKhūb ge Moseb ǃoa Egipteǃhūb ǃnâ ǃhoa ǃkhaisa.

²⁸ǃNubaib ge ǃKhūba Moseb ǃoa ǃhoa tsî ge mî: Tita ge ǃKhūta, xuige Faraob Egipteb di gao-aob ǃoa ǃhoa tita ra mîba tsin hoana.

²⁹ǃNubaib ge Moseba ǃKhūb di ais aiǃâ ge mî: Mû, tita ge ǃgaohesa tama amǁgaukha â-ita, matib kha Faraoba tita nî ǃgâ?