Read Khoekhoegowab Eksodus 7 Bible Online

Eksodus 7 - Khoekhoegowab bible

Eksodus 7

¹ǃNubaib ge ǃKhūba Moseb ǃoa ge mî: Mû, tita ge satsa Faraob ǂama Elose ge ǂnûi; tsî Aronni sa ǃgâsab ge sa kēbo-aose nî ī.

²Sats ge nî ǃhoa mîba tsi ta nîn hoana; tsî Aronni, sa ǃgâsab ge Faraob ǀkha nî ǃhoa, îb Israeli ôana ǁîb di ǃhūba xu doe kai, ti.

³Xawe tita ge Faraob di ǂgaoba nî karokaro; tsî tita ge ti saodi tsî ti buruxa dīn tsîna Egipteǃhūb ǃnâ nîra ǂguiǂgui.

⁴Xaweb ge Faraoba sakho ǁnâu tide, o ta ge tita ti ǃomma Egipteb ai nîra ǁgui tsî ti ǂnubidi, ti ǁaes, Israeli ôana Egipteǃhūba xu nîra ǂgaeǂguiǂui kai ǀgoraǃgâdi ǀkha.

⁵ǃNubain ge Egipteǁîna nîra ǂan, tita a ǃKhū ǃkhaisa, ti ǃomma ta ga Egipteb ǂama ǀhōǂuio, tsî Israeli ôana ta ga ǁîn ǁaeguba xu ǂgaeǂguiǂuio.

⁶O kha ge Moseb tsî Aronni tsîkha ge dī, ǃKhūb ge ǁîkha mîmā khami.

⁷Tsî Moseb ge ǁkhaisadisi kurixa ge i tsî Aronni ge ǁkhaisadisiǃnonaǀa kurixa ge i, Faraob ǀkha kha gere ǃhoao.

⁸Tsî ǃKhūb ge Moseb tsî Aronni tsîkha ǀkha ǃhoa tsî ge mî:

⁹Faraob ga sakho ǀkha ǃhoa tsî: Buruburuxa dī-e dībasen, tī mî, ots ge satsa Aronni ǃoa nî mî: Sa ǀkharusa ū îts Faraob di ais aiǃâ aoǁgui si, os ge nîra ǀao kai.

¹⁰ǃNubai kha ge Moseb tsî Aronni tsîkha Faraob tawa ǂgâ sī ǁnāti ge dī, ǃKhūb go mî khami; tsî Aronni ge Faraob di ais aiǃâ tsî ǃgāgu âb di ais aiǃâ ǀkharus âba aoǁgui, ob ge ge ǀao kai.

¹¹Ob ge Faraoba ǁkhāti gā-aigu tsî ǃgaidī-aogu tsîga ge ǂgai; o gu ge Egipteǁî ǃgaidī-aoga ǁkhāti ǁnāti ge dī ǁîgu di nū-aidi ǀkha.

¹²Mâb hoab âgu ge ǀkharus âba aoǁgui, o di ge ge ǀao kai, xawe Aronni di ǀkharus ge ǁîgu di ǀkharude ge hapu.

¹³Ob ge Faraoba ǂgaob âba ge karokaro, ǁîkhab ǁnâu tama ge is kōse, ǃKhūb ge mî khami.

¹⁴ǃNubaib ge ǃKhūba Moseb ǃoa ge mî: Faraob di ǂgaob ge a karosa; ǁîb ra ǂkhā ǁaesa doe kaisa.

¹⁵ǃGûsī, Faraob ǃoa ǁarikamǁgoaga, mû, ǁgammiǀîb ge nî ǃgûǂoa, ots ge satsa ǁîb ǃoagu nî mâ Nylǃāb amǃgâ, tsîts ge ǁnā ǀkharus, ǀao-i ǃnâ go ǀkharaǀkharahesa ǃomǁae nî ū.

¹⁶Tsîts ge ǁîb ǃoa nî mî: ǃKhūb Hebreǁîn di Elob ge sa ǃoa go sî te, mî rase: Ti ǁaesa doe kai, îs tita ǃoaba ǃgaroǃhūb ǃnâ! Xawe mû, sats ge nēs kōse ǁnâu tama go hâ i.

¹⁷Nētib ra ǃKhūba mî: Nēs tawats ge nî ǂan, tita a ǃKhū ǃkhaisa; mû, tita ge nē ǀkharus, ti ǃomǁae hâs ǀkha ǁgammi, Nylǃāb ǃnâ hâba nî ǂnau, ob ge ǀaob ǃnâ nîra ǀkharaǀkharahe.

¹⁸On ge ǁaun ǃāb ǃnâ hâna nîra ǁō, ǃāb nîra ǀōs kōse; on ge Egipteǁîna nîra uixa, ǃāb di ǁgam-en ā ǂgao tama nî is kōse.

¹⁹ǃAruǀîb ge ǃKhūba Moseb ǃoa ge mî: Aronna mîba: Sa ǀkharusa ū îts ǃommi âtsa ǀhōǂui Egipteǁîn di ǁgamgu ǂama, tsî ǁîn di ǃāgu ǂama, tsî ǁîn di ǃārogu ǂama tsî ǁîn di ǁgamgu ra ǀhû ǃkhais hoas ǂama, î gu ǀao kai; îb ǀaoba hâ Egipteǃhūb hoaragab ǂama, haisoadi ǃnâs kas ǀuisoadi ǃnâs kas hoasa.

²⁰O kha ge Moseb tsî Aronni tsîkha ge dī ǃKhūb ge mîmā khami; ob ge ǀkharusa ǀhōǂui tsî ǁgammi ǃāb ǃnâ hâba ge ǂnau Faraob di mûra aiǃâ tsî ǃgāgu âb di mûdi aiǃâ; ob ge ǁgammi ǃāb ǃnâ hâb hoaba ǀaob ǃnâ ge ǀkhara.

²¹On ge ǁaun ǁgammi ǃnâ hâna ge ǁō, ob ge ǃāba ge ǀō, Egipteǁîn ge ǃāb di ǁgam-e ā ǁoa is kōse; tsî ǀaob ge Egipteǃhūb hoaragab ǃnâ ge hâ i.

²²O gu ge Egipteǁî ǃgaidī-aoga ǁnās ǁkhās khami ge dī ǁîgu di nū-aidi ǀkha; ob ge Faraoba ǂgaob âba karokaro tsî ǁîkha ǁnâu tama ge i, ǃKhūb ge mî khami.

²³Ob ge Faraoba unusen tsî ge ǁaru, tsîb ge ǁîsa ǁkhāti ǂgaob ǃnâ ū tama ge i.

²⁴On ge Egipteǁîn hoana ǃāba ge xoraǂnamipe, ǁgam-en nî āga; ǃāb di ǁgam-en ge ā ǁoa i xui-ao.

²⁵Nēti di ge hû tsēde ge ǀoa ǃKhūb ge ǃāba ǂnaus khaoǃgâ.