Read Khoekhoegowab Eksodus 8 Bible Online

Eksodus 8 - Khoekhoegowab bible

Eksodus 8

¹ǁNās khaoǃgâb ge ǃKhūba Moseb ǃoa ge mî: Faraob tawa ǂgâ îts ǁîb ǃoa mî: Nētib ra ǃKhūba mî: Ti ǁaesa doe kai, îs tita ǃoaba!

²Tsî ǁîna doe kaisats ga ǂkhāo, o ta ge tita sa ǃhūb ǀkharib hoaba ǁgūtsiǁgūben ǀkha nîra ǂnau.

³Ob ge Nylǃāba ǁgūtsiǁgūben xa nîra ǀoa; ǁîn ge ǃapa tsî sa ommi ǃnâ nîra sī, tsî sa ǁomǃnâ-oms ǃnâ, sa kharob ai; ǁkhāti sa ǃgāgu di omdi ǃnâ, tsî sa ǁaes ai tsî sa ǁganomdi ǃnâ tsî sa ǀhomamǃoregu ǃnâ.

⁴Tsîn ge ǁgūtsiǁgūbena nîra hā sa ai tsî sa ǁaes ai tsî sa ǃgāgu hoagu ai.

⁵ǃAruǀîb ge ǃKhūba Moseb ǃoa ge mî: Aronna mîba: ǃOmmi âtsa ǀhōǂui ǀkharus âts ǀkha ǃāgu kaigu ǂama tsî ǃāgu ǂama tsî ǀaudi ǂama, îts ǁgūtsiǁgūbena Egipteǃhūba hāǂam kai.

⁶Ob ge Aronna ǃommi âba ge ǀhōǂui Egipteb di ǁgamgu ǂama; on ge ǁgūtsiǁgūbena hā ǃapa tsî Egipteǃhūba ge ǃgū-ai.

⁷ǃNubai gu ge ǃgaidī-aoga ǁnās ǁkhās xase ge dī ǁîgu di nū-aidi ǀkha; o gu ge ǁgūtsiǁgūbena Egipteǃhūb ǂama ge hā kai.

⁸Ob ge Faraoba Moseb tsî Aronni tsîkha ǂgai tsî ge mî: ǀAexase ǀgore kho re ǃKhūb ǃoa, îb ǁîba nē ǁgūtsiǁgūbena tita tsî ti ǁaesa xu ūbē; o ta ge ǁaesa nî doe kai, îs ǃKhūba ǁguiba.

⁹Xaweb ge Moseba Faraob ǃoa ge mî: Îts satsa tita ǂamai ǃgôasiba ūhâ! Mâ ǁaeb ai ta tita sats tsî sa ǃgāgu tsî sa ǁaes tsîdo nî ǀgoreba, nē ǁgūtsiǁgūben nî satsa xu tsî sadu omga xu ūbēhega, Nylǃāb ǀguib ǃnân nî ǃgaus kōse?

¹⁰Ob ge ǁîba: ǁAri, ti ge mî. Ob ge ǁîba: As ī sa mîsa ǃoa, ǂants nîga ǀnîb xareb ǃKhūb sida Elob khami ī tama ǃkhaisa, ti ge mî.

¹¹Nētin ge ǁgūtsiǁgūbena satsa xu tsî sadu omde xu tsî sa ǃgāga xu tsî sa ǁaesa xu nîra ǂgō; on ge Nylǃāb ǀguib ǃnâ nîra ǃgau.

¹²ǃNubai kha ge Moseb tsî Aronni tsîkha Faraoba xu ge ǂoa; ob ge Moseba ǃKhūb ǃoa ge ǂgai, ǁnā ǁgūtsiǁgūben Faraob ǂamab ge hā kain ǃaroma.

¹³Ob ge ǃKhūba Moseb di mîs ǃoa ge dī; on ge ǁgūtsiǁgūbena ge ǁō omgu ǃnâ, tsî ai-omgu ǃnâ tsî ǃhanagu ai.

¹⁴On ge ǁîna ge ǀhaoǀhao ǃâdi ǃnâ ob ge ǃhūba ge ǀō.

¹⁵Tsî Faraob ge mûo, ǁkhawab ǀom ǁkhā ǃkhaisa, ob ge ǂgaob âba ge karokaro, ǁîkhab ǁnâu tidega, ǃKhūb ge mî khami.

¹⁶ǃAruǀîb ge ǃKhūba Moseb ǃoa ge mî: Aronna mîba: Sa ǀkharusa ǀhōǂui îts ǃhūb di tsaraba ǂnau, îb ǀûitsibe kai Egipteǃhūb hoaragab ǃnâ.

¹⁷O kha ge ǁnāti ge dī: Aronni ge ǃommi âba ǀhōǂuio ǀkharus âb ǀkha tsî ǃhūb di tsaraba ǂnauo, on ge ǀûitsibena ge ǂgui khoen tawa tsî ǀgoan tawa; tsarab ǃhūb dib hoab ge ge ǀûitsibe kai Egipteǃhūb hoaragab ǃnâ.

¹⁸O gu ge ǃgaidī-aoga ǁkhāti ǁnās ǁkhās xase ge dī nū-aidi âgu ǀkha, ǀûitsibena gu nî ǀkhī-ūga; xawe gu ge ǁkhā tama ge i. Nētin ge ǀûitsibena khoen tawa tsî ǀgoan tawa ge hâ i.

¹⁹ǃNubai gu ge ǃgaidī-aoga Faraob ǃoa ge mî: Nēb ge Elob di ǀkhunuba. Xaweb ge Faraoba ǂgaob âba ge karokaro, ǁîkhab ǁnâu tidega, ǃKhūb ge mî khami.

²⁰ǃAruǀîb ge ǃKhūba Moseb ǃoa ge mî: ǁAri ǃnauǁgoaga khâi îts Faraob di ais aiǃâ sī mâisen; mû, ǁîb ge ǁgammi ǃoa nî ǂoa; ots ge ǁîb ǃoa nî mî: Nētib ra ǃKhūba mî: Ti ǁaesa doe kai, îs tita ǃoaba!

²¹Ti ǁaesats ga doe kai tama io, mû, o ta ge tita habagusa ǀanina nîra sî sa ai tsî sa ǃgāgu ai tsî sa ǁaes ai, tsî sa omgu ǃnâ, o gu ge Egipteǁîn di omga nē habagus ǀkha nîra ǀoa, tsî ǁnā ǃhūb ǁîb ain hâb ona.

²²Tsî ta ge tita ǁnātsē Gosenǃhūb, ti ǁaes ǁanǃnâ hâba nîra khai, on ge habagusa ǀanina ǁnāpa hâ tide, ǂants nîga, tita ǃKhūta nē ǃhūb ǁaegub ǃnâ hâ ǃkhaisa.

²³Tsî ta ge tita ore-e nîra ǂnûi ti ǁaes tsî sa ǁaes ǁaegu, ǁgoaǁaeb ais ge nē saosa nîra ǃnae.

²⁴Ob ge ǃKhūba ǁnāti ge dī; os ge ǃgom habagus ǀanin disa ge hā Faraob di ommi ǃnâ; tsî ǁîb ǃgāgu di omgu ǃnâ, tsî Egipteǃhūb hoaragab ǂama; ob ge ǃhūba nē habagus xa ge hîkākāhe.

²⁵ǃNubaib ge Faraoba Moseb tsî Aronni tsîkha ǂgai tsî ge mî: ǃGû, îts sadu Eloba nē ǃhūb ǃnâ ǁguiba!

²⁶Ob ge Moseba ge mî: ǁÎs ge anu tama hâ ǁnāti i nî dīhe ǃkhaisa. ǀNîsi da ga Egipteǁîn di ǁgaidība ǃKhūb sida Eloba ǁguiba xui-ao; mû, Egipteǁîn di ǁgaidība da ga ǁîn di mûdi aiǃâ ǁguibao, ǀuiǁhomn kha tide sida?

²⁷Îts ǃnona tsēdi daob kōse ǃgaroǃhūb ǃnâ ǂgâ kai da, î da ǃKhūb sida Eloba ǁguiba, ǁîb nî mîmā da khami.

²⁸Ob ge Faraoba ge mî: Doe kai du ta nî, ǃKhūb sadu di Eloba du nî ǃgaroǃhūb ǃnâ ǁguibaga; nēs ǀguisa dī: Tā î du does ǃnâ ǁnātikōse ǃnū! ǀAexase ǀgoreba te re!

²⁹Ob ge Moseba ge mî: Mû, tita ge satsa xu ra ǃgû; o ta ge ǃKhūba ǀaexase nîra ǀgore, îs nē habagus ǀanin disa ǁari ǂgō Faraotsa xu, ǃgāgu âtsa xu tsî ǁaes âtsa xu. Nēs ǀguis, îts Faraotsa tā ǁkhawa gāxaǃnâsise sîsen, nē ǁaesa doe kai tama is ǀkha, ǃKhūban nî ǁguibase.

³⁰ǃNubaib ge Moseba Faraoba xu ǂoa tsî ǀaexase ǃKhūb ǃoa ge ǀgore.

³¹Ob ge ǃKhūba Moseb di mîs ǃoa ge dī tsî habagus ǀanin dis ge ge ǂgō Faraoba xu, tsî ǃgāgu âba xu tsî ǁaes âba xu; ǀgui-i xare-i ge ǃgau tama ge i.

³²Xaweb ge Faraoba ǂgaob âba ǁkhāti nē ǃnās ai ge karokaro, ob ge ǁaesa doe kai tama ge i.