Read Khoekhoegowab Eksodus 9 Bible Online

Eksodus 9 - Khoekhoegowab bible

Eksodus 9

¹ǁNās khaoǃgâb ge ǃKhūba Moseb ǃoa ge mî: ǂGâ Faraob tawa îts mîba bi: Nētib ra ǃKhūb Hebreǁîn di Eloba mî: Ti ǁaesa doe kai îs tita ǃoaba!

²ǁAesa doe kaisats ga ǂkhā tsîts ga ǁîna ǀgaib ǀkha ǃkhōdawao,

³mû, ob ge ǃKhūb di ǃomma nîra hâ sa ǀgoan, ǃaub ai hân ǂama, sa hān ǂama, eseln ǂama, ǃnain ǂama, goman ǂama, tsî ǀgoan ǂkharin ǂama kaise ǃgom ǂhīǁō-i ǀkha.

⁴Tsî ǃKhūb ge ǀgorasa nîra dī Israelǁîn di ǀgoan tsî Egipteǁîn di ǀgoan ǁaegu, o i ge xū-i xare-e ǁō tide Israeli ôan din hoan xa.

⁵Tsî ǃKhūb ge ǂanǂansa ǁaeba ge mîmâi, mî raǃâ: ǁArib ge ǃKhūba ǁî ǃkhaisa nē ǃhūb ǃnâ nîra dī.

⁶Ob ge ǃKhūba nē ǃkhaisa sao ra tsē ge dī, on ge Egipteǁîn di ǀgoan hoana ge ǁō, xawe Israeli ôan ǀgoan xa i ge ǀgui-i xawe-e ǁō tama ge i.

⁷Ob ge Faraoba ge sîsī, tsî kō, Israeli di ǀgoan xa i ge ǀgui-i xawe-e ǁō tama ge hâ i. Xawe ǂgaob Faraob dib ge ge karo, ob ge ǁaesa doe kai tama ge i.

⁸ǃNubaib ge ǃKhūba Moseb tsî Aronni tsîkha ǃoa ge mî: ǃOmra âkho ǁganoms di tsaob ǀkha ǀoaǀoa, îb Moseba ǁîba ǀhommiǀî sariǃapa Faraob di mûra aiǃâ,

⁹îb ǂkhari tsara kai Egipteǃhūb hoaragab ǂama: Ob ge khoen tawa tsî ǀgoan tawa nîra tsui kai, ǀhapin ase ra ǁhaise, Egipteǃhūb hoaragab ǃnâ.

¹⁰O kha ge tsao-e ge ū ǁganomsa xu, Faraob di ais aiǃâ mâse, tsî Moseb ge ǁî-e ǀhommiǀî ge sariǃapa; on ge tsuina ge ǀkhī, ǀgaris ase ra ǁhaise, khoen tawa tsî ǀgoan tawa,

¹¹ǃgaidī-aogu Moseb aiǃâ mâ ǁkhā tama ge is kōse, tsuin ǃaroma; ǃgaidī-aogu tawan ge tsuina hâ i xui-ao, tsî Egipteǁîn hoan tsîn tawa.

¹²Xaweb ge ǃKhūba Faraob di ǂgaoba ge karokaro, ǁîkhab ǁnâu tidese, ǃKhūb ge Moseb ǃoa ǃhoa khami.

¹³ǃNubaib ge ǃKhūba Moseb ǃoa ge mî: Khâi ǁarikamǁgoaga îts Faraob di ais aiǃâ mâisen, îts ǁîb ǁga mî: Nētib ra mî ǃKhūb Hebreǁîn di Eloba: Ti ǁaesa doe kai îs tita ǃoaba!

¹⁴Nē ǃnās ai ta tita ti ǁnora-aigu hoaga sa ǂgaob ǃnâ nîra sî xuige, tsî sa ǃgāgu ǂama tsî sa ǁaes ǂama ǂants nîga, ǀnîb, tita khami īb ǃhūbaib hoaragab ai hâ tama ǃkhaisa.

¹⁵Nēsi ta tita ti ǃomma go ǀhōǂui xuige, sats tsî sa ǁaesa ta nî ǂhīǁō-i ǀkha ǂnause, tsî ǃhūbaiba xu du nî hîkākāhese.

¹⁶Tsî amase, ǁîs ǃaroma ta ge tita go ǂkhaiǂkhai tsi, ti ǀgaiba ta nî sa tawa ǁgauga, ti ǀons nî ǃhūbaib hoab ai ǂhôahega.

¹⁷Ganupets ga ǁî-aitsama ǀgapiǀgapiseno, ti ǁaes ǃoagu, ǁînats doe kai tidese,

¹⁸o ta ge tita ǁari nē ǁaeb ǁkhāb ai ama ǃgom ǃnareba nîra ǀapi kai, ǁîb khami īb Egipteb ǃnâ tātsē hâ tama ge hâ iba, ǁnā tsēs, ǁîs aib ge ǃgaoǃgaohesa xu nētsēs kōse.

¹⁹Sîsī ǁnâi nēsi îts sa ǀgoan tsî ǃaub aits ūhân hoana ǀhaoǀhao; mâ khoe-i hoa-i tsî mâ ǀgoa-i hoa-i, ǃaub ai ga hōhe-i tsî ommi ǃnâ ǀhaoǀhaohe tama nî i-i, nē ǃnareb ǁîn ai nîra ǁnāǃnubai, ǁî-i ge nîra ǁō.

²⁰Faraob di ǃgāgu ǃnâ ǁnâi ǃKhūb mîsa ra ǃaoǃgâb hoab ge ǁîb di ǃgāgu tsî ǁîb di ǀgoana omgu ǃnâ ge ǁhaiǁhâ kai.

²¹Xawe ǂgaob âba ǃKhūb mîs ai ǂnûi tamab hoab ge ǃgāgu âba tsî ǀgoan âba ǃgarob ai ge hâ kai.

²²ǃNubaib ge ǃKhūba Moseb ǃoa ge mî: Sa ǃomma ǀhōǂui ǀhommiǀî, ob ge ǃnareba nîra hâ Egipteǃhūb hoaragab ǃnâ, khoen ǂama tsî ǀgoan ǂama, tsî ǁhaon ǃaub din ǂama Egipteǃhūb ǃnâ.

²³Ob ge Moseba ǀkharus âba ǃhommiǀî ge ǀhōǃapa; ob ge ǃKhūba ǃgurub tsî ǃnareb tsîkha ge hā kai, tsî ǀaes ge ǃhūbǀî ge ǀkhâu; tsî ǃKhūb ge ǃnareba ge ǀapi kai Egipteǃhūb ǂama.

²⁴Tsîb ge ǃnareba ge hā, tsî ǀae-i ge ǃnareb ǃnâ ge hâ i; ǁîb ge kaise ge ǃgom i, ǁîb khami īb ge Egipteǃhūb hoaragab ǃnâ tātsē hā tama ge hâ i, ǁae kais ge ǁaeba xu.

²⁵Tsî ǃnareb ge Egipteǃhūb ǃnâ ǃaub ai hân hoana ge ǂnau, khoena xu ǀgoan kōse; ǁkhātib ge ǃnareba ǃaub ai hâ ǁhaon hoana ge ǂnau tsî ǃgarob di hain hoana ge khôaǂkhū.

²⁶Gosenǃhūb, Israeli ôan ǁanǃnâ hâb ǀguib ǃnâ i ge ǃnare-i xare-e hâ tama ge hâ i.

²⁷ǃNubaib ge Faraoba sîsī tsî Moseb tsî Aronni tsîkha ǂgai kai tsî ge mîǀî kha: Nē ǃnās ai ta ge go ǁore; ǃKhūb ge a ǂhanu-ai, xawe tita tsî ti ǁaes tsîda ge a eloxoresa.

²⁸ǀAexase ǀgore kho re ǃKhūba ǃoa, ǂâu go xuige, î kha ǃaruǀî ǀkhai Elob di ǃgurub tsî ǃnareb tsîkha; o ta ge sado nî doe kai tsî du ge aiǃâb ǃoa hâ tide.

²⁹Ob ge Moseba ǁîb ǃoa ge mî: ǃĀsa xu ta ga ǂoao, o ta ge ti ǃomkha ǃKhūb aiǃâ nî ǀhōǂui; ob ge ǃguruba nîra ǀû; ob ge ǃnareba nîra ǀkhai, ǂants nîse ǃhūbaib a ǃKhūb di ǃkhaisa.

³⁰Xawe sats tsî sa ǃgāgu tsîgo xasa ta a ǂan, ǃKhūb Elob di ais aiǃâ go gorose ǃao tide ǃkhaisa.

³¹ǀÂb tsî gerstǃhorob tsîra ge ge ǂnauhe: Gerstǃhorob ge ǃnurub ǃnâ hâ tsî ǀâb ge ǁôab ai ge hâ i.

³²Xawe ǃhorob tsî spelǃhorob tsîkha ge ǂnauhe tama ge hâ i, ǃgū-aihe kha ge hâ i amaga.

³³Nētib ge Moseba Faraoba xu ǃāsa xu ǂoa tsî ǃomkha âba ge khoraǂui ǃKhūbǀî, o kha ge ǃgurub tsî ǃnareb tsîkha ge ǀû, ob ge ǀapiba ǃaruǀî ǀapi tama ge i ǃhūb ai.

³⁴Tsî Faraob ge mûo, ǀapib tsî ǃnareb tsî ǃgurub tsîgu go ǀû ǃkhaisa, ob ge ǃaruǀî ǁore tsî ge karokaro ǂgaob âba, ǁîb tsî ǁîb di ǃgāgu tsîga.

³⁵Nētib ge Faraob di ǂgaoba ge karo, ob ge Israeli ôana doe kai tama ge i, ǃKhūb ge Moseba xu ǃhoa khami.