Read Khoekhoegowab Job 1 Bible Online

Job 1 - Khoekhoegowab bible

Job 1

¹Job ti ǀon hâ aob ge Usǃhūb ǃnâ ge hâ i. Tsî ǁnā aob ge ǂhanu-ai tsî ǂhauǃnâ tsî eloǃaoǃgâxa ge i, tsîb ge ǂkhababa gere ǂgōsen.

²ǁÎb ge hû ǀgôagu tsî ǃnona ǀgôadi tsîna ge ǁorabahe.

³Tsî ûitsama xūn âb ge hûǀoadisi gūn tsî ǃnonaǀoadisi ǃnain tsî korokaidisi ǃnaogu goman tsî korokaidisi eseln tsîna ge i, tsî ǃoabasaben âb ge kaise ǂgui ge i, nē aob ge khoen aiǂoas din hoan ǃgâ-ai kai is kōse.

⁴ǀGôagu âb ge ǁnaetib ase ǂûǁarede gere dī, mâb hoaba ǁîb di oms ǃnâ ǃnaetsēs âb ai, tsî gu ge sî tsî ǁîgu di ǃgâsade gere ǁkhau ǁîgu ǀkha di nî ǂû tsî āse.

⁵Tsî ǂûǁaes di tsēdi gere toao, o i ge gere ī, Job gere ǁîna sî tsî khai ǃkhaisa. ǃNauǁgoaga khâi tsîb ge khauǁguibade gere ǁguiba ǁîn hoan di ǃgôab ǃoa. Job gere: ǀNîsin ge ti ôana ǁore tsî ǂgaob ân ǃnâ Eloba go ǀâxare, ti mî xui-ao. Nētib ge Joba hoaǁae gere dī.

⁶Tsî i ge tsē-e ge hā, Elob ôagu ge ǁî-i ai hā-e ǃKhūb aiǃâ gu nî mâisense, tsî Satanni ge ǁîgu ǁaegu ge hā.

⁷ǃNubaib ge ǃKhūba Satanni ǃoa: Mapa xuts ra satsa hā? ti ge mî. Ob ge Satanna ǃKhūba ǃeream tsî ge mî: ǃHūbaib ai ǃgûmas tsî ǁîba ǃgûǃnâǃganusa xu.

⁸Ob ge ǃKhūba Satanni ǃoa ge mî: ǃGaoǃgâts gere xare ti ǃgāb Joba? ǀNî khoeb ǁîb khami īb xareb ǃhūbaib ai hâ tama hâ, aob hîa ǂhanu-ai tsî ǂhauǃnâ tsî eloǃaoǃgâxa tsî ǂkhababa ra ǂgōsenna xui-ao.

⁹ǃNubaib ge Satanna ǃKhūba ǃeream tsî ge mî: Joba kha ǁnâi ǁause Eloba ra ǃoaba?

¹⁰Sats ge ǃhara-e ge dī ǁîb ǂnamipe tsî ǁîb oms ǂnamipe tsî mâ ǀkhāb hoab ai ūb hâ xūn hoan ǂnamipe. Sîsenni ǁîb ǃomkha dibats ge satsa ge ǀkhae, tsî ûitsama xūn âba ǃhūb ǃnâ kaise ge ǂguiǂgui.

¹¹Xawe ǃommi âtsa nēsi ǀhōǂui, îts ūb hân hoana tsâǀkhā, ob ge ais âts ǃnâ nîra ǀâxare tsi.

¹²Ob ge ǃKhūba Satanni ǃoa ge mî: Mû, ūb hân hoana an sa ǃomǁae hâ, xawe ǁîb ǀguibǀî sa ǃomma tā ǀhōǂui. ǃNubaib ge Satanna ǃKhūb di ais aiǃâba xu ge ǂoa.

¹³Tsî i ge ǀguitsē ge ī, ǀgôagu âb tsî ǀgôadi âb ǁîn di ǃgâsab kaib, ǂguroǃnaesabeb di oms ǃnâ ǂû tsî ǂauxûiba ra ā

¹⁴hîab ge sîsabeba Job tawa hā tsî ge mî: Gomagu ra ǃhūǃgao tsî eseln ǁîgu xōǀkhā ra ǃû

¹⁵hîa gu ge Sabeǁîga ǁgūǂgâxa tsî ǁîna ū tsî ǃgāga gôab di ǀāb ǀkha go ǃgam, tsî ta ge tita ǀgui ta go ûiǂoa; ǁî ǃkhaisa ta nî mîba tsise!

¹⁶ǁÎb ra ganupe ǃhoa hîab ge ǀnîba hā tsî ge mî: ǀAes Elob dis ge ǀhomma xu ǁnā tsî gūn tsî ǃgāgu ǃnâ go ǂhubi tsî ǁîna go hapu. Tsî ta ge tita ǀgui ta go ûiǂoa, ǁî ǃkhaisa ta nî mîba tsise.

¹⁷ǁÎb ra ganupe ǃhoa hîab ge ǀnîba hā tsî ge mî: Xaldeaǁîgu ge ǃnona ǂnubide ge dī, tsî gu ge ǃnaina hāǂam tsî ǁîna go ū, tsî gu ge ǃgāga gôab di ǀāb ǀkha go ǃgam. Tsî ta ge tita ǀgui ta go ûiǂoa, ǁî ǃkhaisa ta nî mîba tsise!

¹⁸ǁÎb ra ganupe ǃhoa hîab ge ǀnîba hā tsî ge mî: Sa ôagu tsî sa ôadi tsîn ra ǂû tsî ǂauxûiba ā ǁîn di ǂguroǃnaesabe ǃgâsab di oms ǃnâ

¹⁹hîa i ge kai ǂoa-e ǃgaroǃhūba xu ǀkhī tsî haka ǁhôadi oms didi tawa ge ǃgom, tsîs ge ǀgôan ai go ǁnā, tsîn ge go ǁō. Tsî ta ge tita ǀgui ta go ûiǂoa, ǁî ǃkhaisa ta nî mîba tsise!

²⁰ǃNubaib ge Joba khâi tsî ǂamsarab âba ǀkhau tsî danas âba ǂkhom tsî ǃhūb ai ǁnā tsî ǀgoreǀî

²¹tsî ge mî: ǀŌkhāse ta ge ti îs di ǃnāba xu ge ǀkhī, tsî ǀōǀkhāse ta ge ǁnāǀî ǁkhawa nî oa. ǃKhūb ge ǁîna ge mā, ǃKhūb ge ǁîna go ū; as ǃKhūb di ǀonsa ǃkhōǀkhāhe re.

²²Nēn hoan ǃnâb ge Joba ǁore tama, tsî Eloba ǀhapimā tama ge i.