Read Khoekhoegowab Job 10 Bible Online

Job 10 - Khoekhoegowab bible

Job 10

¹Ti ûiba ta ge ra uixa; o ta ge ti ǃgaesa ǃnorasase nî ǃhoa. Tita ge ausib ti ǀoms dib ǃnâ nî ǃhoa.

²Tita ge Elob ǃoa nî mî: Tā ǀâxarexū te, îts ǂanǂan te mâ xū-i ǃaromats ra ǃkhamū te ǃkhaisa.

³ǃGâiba tsi i a, ǁgâiǀāts ra ǃkhaisa, sîsenni sa ǃomkha dibats ra aoxū ǃkhaisa, ǀapemās eloxoresan disats ra ǃnâǃnâ hîa?

⁴Mûdi ǁgans didets ǁnâi satsa ūhâ? Khoe-i ra mû khamits ra mû?

⁵Sa tsēde khoe-i di tsēdi khami di ī? Sa kuriga aob kurigu khami gu ī,

⁶ots ra ôaǃnâ ti ǂhanuoǃnâsiba, ots ra dîǃgâ ti ǁoreba?

⁷Sa ǂans ge nēsa, ǀhapio ta a ǃkhaisa, tsî khoe-i hîa sa ǃomǁaeba xu nî ore-i ge a ǀkhai.

⁸Sa ǃomkha ge ǂnubi tsî ge kuru te, xawe kha ge hâǂnamipe te hâ tsî ra hîkākā te.

⁹ǂÂi re, ǂgoa-i ǀkhats ge kuru te ǃkhaisa, tsî tsarab ǃoats nî ǁkhawa oa kai te?

¹⁰Dai-i khamits tita ǂnâ tama hâ, tsî ǁhamǁgamhe hâ dai-i khamits âu-âu te tama hâ?

¹¹Khōb tsî ǁgans tsîra ǀkhats ge tita ge ana, tsî ǂkhōgu tsî ǁapan tsîn ǀkhats ge tita ge ǂgāǃnâgu.

¹²Ûib xōǀkhāts ge tita ǀkhomxaǂgaosiba ge dī-ū, tsî sa kōǃgâs ge ti gagasa ge sâu.

¹³Xawe nē xūnats ge satsa ǂgaob âts ǃnâ ge gaugau, ǂan ta a nē ǃkhaisats ge ǂâibasen hâ i ǃkhaisa.

¹⁴ǁOre ta kao, ots ge satsa nî ǃûi te, tsî ti dīsās ǃaromats ge satsa tita ǀhapiose ūhâ tide.

¹⁵Eloxoresa ta kao, tsūba te ǁnâi! Tsî ǂhanu-ai ta ka xawe ta ge danas âtasa ūkhâi tide, taob xa ta ge ǀoa hâ, tsî ti ǀkhomǀkhomsasiba ra kōlî.

¹⁶Tsî khâi ta ka ots ra xammi ǁkhāb xase sauru te. Sats ra ǁkhawa buruburuxase ǁgausen ti ǃoagu.

¹⁷Sats ge sa ǀhûǀguitimî-aoga ti ǃoa-ai ǀasa kai, tsî ǁaib âtsa ra tiǀî ǂguiǂgui; toroǂnubi-i ge ti ǃoagu hâ.

¹⁸Tarexats kha ǁnâi ǁgûs ǃnāba xu ge ūǀkhī te? Ae, ǀkhai ta ga koma i, mû-i xare-i xa ta ganupe mûhe tama hîa.

¹⁹O ta ge tātsē hâ tama xūse ka i hâ, o ta ga ǁgûs sorosa xu ǀhobas tawa ūsīhe hâ!

²⁰Ti tsēde ǀoro tama di hâ? ǀÛ te îts ǁnāxū te re, î ta ǂkharirose khoakhoasen.

²¹ǃGûsī tsî ta ǁkhawa hā tides aiǃâ, ǃhū-i ǃkhaenab di-i tsî ǁōb di sommi di-i ǁga,

²²durutsuxub khami a ǃkhae ǃhū-i ǁōb sommi di-i, ǃkhaenas tsî ǀūa-ais di-i, ǃnâb ǃkhaeb khami ī-i ǁga.