Read Khoekhoegowab Job 11 Bible Online

Job 11 - Khoekhoegowab bible

Job 11

¹ǃNubaib ge Sofari Naamaǁîba ǃeream tsî ge mî:

²ǂGuisib mîdi diba ǃereamheb tide, tsî ǃhoaxūxa khoeba kha ǀhapiob nî?

³Sa ǃhoaba khoena ǃnō kaib nî? ǃHōts nî satsa, tsî khoe-i xare-e taotao tsi tide?

⁴Sats ge: Ti ǁkhāǁkhās ge a ǃūmû tsî tita ge sa mûǁae a ǃanu, ti go mî.

⁵Xawe amase Elob ga ǃhoa, îb ga amǁgaukha âba khowa,

⁶îb ga ǂganǃgâsigu gā-aisib diga ǂanǂan tsi, ǃhonarisa gā-aisib â-igu a ǁî xui-ao. ǁNā-amaga ǂan, Elob sa ǂhanuoǃnâsiba ra ǀuruba tsi ǃkhaisa.

⁷Hōǂuits nî xare ôaǃnâs Elob disa? Xare dīǀoaǀoasib kōsets nî Hoaǀgaixaba hōǂui?

⁸ǀGapi ǃhomgu kōseb kom ra sīo, tare-ets ǁnâi satsa nî dī? ǀAmo ǀaeb ǃgâ-aib kom a ǃgamo, tare-ets ǁnâi satsa nî ǂan?

⁹Gaxub âb ge ǃhūbaib diba ǃnā hâ, tsî hurib ǃgâ-aib ge a ǂhaba.

¹⁰ǁÎb ga ǃgû-ī tsî ǃkhōsis ǃnâ ūo tsî ǀgoraǃgâsa ǂgaiǀhao-o, tari-e ǁîba nî ǁkhaedawa?

¹¹ǁÎb ge ǂkhaba khoena a ǂan xui-ao, tsîb ge ǂkhabasiba ra mû, tsî hōǃâb kha ǁnâi tide ǁîba?

¹²ǃNubaib ge ǁnâuǃāoǃnâ khoeba ǂansa nîra hō, ǃgorerob ǂkhammi khamits ra sats khoetsa ǃnaeo.

¹³ǂGaob âtsats ga ǁāǁāo, ots ge ǃomkha âtsa ǁîbǀî ǁkhāti nî ǀhōǂui,

¹⁴ǂkhaba dī-i ga sa ǃomǁae hâo, ǁî-e dībē ǃnūse, îts ǂkhabasiba sa tentoms ǃnâ tā ǁan kai,

¹⁵ā, ǁnāǃnubaits ge ais âtsa sau tamase nîra ūkhâi; ots ge nîra, mâǁapo tsî ǃao tide.

¹⁶ǀHupubats ge nîra ǀuru xui-ao, ǁgamgu hîa ra dâu-īgu ra ǀuruhese.

¹⁷Ā, ûib âts ge tsēǃgâǁaeb ǃgâ-ai ǃgāsase nîra ǀkhī, ǃkhaenab âts ge ǁgoaǁaeb khami nîra ī.

¹⁸Tsîts ge nîra ǂgomaiǂnûi, ǃâubasen-i nîra hâ xui-ao, ots ge tsauga nîra khao, ots ge ǂkhîse nîra ǁom.

¹⁹Ots ge nîra ǁgoe tsî khoe-i xare-i ge satsa ǃhuriǃhuri tide, on ge ǂguina ais âtsa nîra ǀkhoma.

²⁰Xawe mûdi eloxoresan didi ge nîra ǂgī, tsî ǁhaiǁhâ-i ge ǁîna nîra ǀkhaiba, tsî ǃâubasens ân ge ǀuniǀoms khami nîra ī.