Read Khoekhoegowab Job 12 Bible Online

Job 12 - Khoekhoegowab bible

Job 12

¹Ob ge Joba ǃeream tsî ge mî:

²Amase, sago ge a khoe amagab ge gā-aisiba sago ǀkha nîra ǁō!

³Tita on ge ǂgaoba ūhâ, sago khami; tita ge sago ǂgōba tide. Tsî tari-i tawan ǁnāti ī xūna hâ tama hâ?

⁴Tita ge ǁî ta horesab âtaba ǃhōse ība ta, tsî Elob ǃoa ǂgai tsî ra ǁnâu-amhe ta; tita ǂhanu-ai tsî ǂhauǃnâ ta ge a ǃhōxū!

⁵Tsūǃgâb ge xū tama hâ ǁnāb ǂkhîse hâb di ǂâis ǃoa, ǁîb ge ǂhomisase mâ ǃnôa nîn ǃaroma.

⁶Tentomdi hîǀhuru-aogu didi ge sâuba ūhâ, tsî Eloba ra ǁaiǁaigu ge ǂgomaiǂnûide ūhâ, ǁnāgu elo-e ǃomǁae ra ūhāga.

⁷Tsî amase ǀgoana dî re, tsî mâ-i hoa-i ân ge ǁîsa nî ǁkhāǁkhā tsi, tsî anin ǀhommi din ge nîra ǂanǂan tsi;

⁸îts ǃhūbaiba ǃhoaǀî, ob ge ǁîba nî ǁkhāǁkhā tsi, ǁaun hurib din on ge nî ǃhoaba tsi.

⁹Tari-e nēn hoana xu ǂan tama hâ, ǃommi ǃKhūb dib ra nēsa dī ǃkhaisa?

¹⁰ǁNāb ǁîb ǃomǁaes ûitsaman hoan di ǀomsa hâb, tsî gagas khoen di ǁgans hoas disa.

¹¹ǂGaesa xare ǃâitsâs tide mîde, namǃhanab ra ǂûna tsâtsâs ǁkhās xase?

¹²Kairan ǃnâb ge gā-aisiba hâ, tsî ǂomxa tsēdi ǃnâb ge ǁnâuǃāba hâ.

¹³ǁÎb tawa kha ge gā-aisib tsî ǀgaib tsîkha hâ; ǁîb ge ǀapes tsî ǁnâuǃāb tsîra ūhâ.

¹⁴Mû ǁîb ra khôaǁnâ, tsî i ge ǁkhawa ǂnubikhâihe tide; ǁîb ra khoe-e ǂganam, tsî i ge ǁkhowa-amhe tide.

¹⁵Mû, ǁîb ra ǁgamga ǃkhōdawa, o gu ge ra ǂnâ; tsîb ra ǁîga ǂoa kai, o gu ge ǃhūba ra dâuǃkhū.

¹⁶ǁÎb tawa kha ge ǀgaib tsî gā-aisib tsîkha hâ; ǁîb di kha ge ǁîb hîa ra ǂgaeǂhapuheb, tsî ǁîb hîa ra ǂgaeǂhapub tsîkha.

¹⁷ǁÎb ra ǁaes di ǀapemā-aoga ǁkhâuǁnâxūse ǂgaeǂguibē, tsî ǂhanuǂhanu-aogab ra ǁîba ǃkhau kai.

¹⁸ǁÎb ra gao-aogu di ǃhâuba xore, tsî ǁîb ra ǃgaesenna ǃgae kamanab âgu ai.

¹⁹ǁÎb ra pristerga ǁkhâuǁnâxūse ǂgaeǂguibē tsîb ra ǀgaisaga aoǁnâ.

²⁰ǁÎb ra îǂhôana gowaba ūxu, tsîb ra kaigu di ǂansa ūbē.

²¹ǁÎb ra ǃharaxūsa ǁhōǂui gaosabegu ǂama, tsîb ra ǃhâub ǃgari-aogu diba ǃopoǃopo.

²²ǁÎb ra ǂhaiǂhai ǃgam ǃkhaide ǃkhaenaba xu, tsî sommi ǁōb dibab ra ǃnâb ǃnâ ūǀkhī.

²³ǁÎb ra ǁaede kaikai, tsîb ra ǁîde hîǀhuru; ǁîb ra ǁaede khoraǂui, tsîb ra ǁîde ǂgaeǂguibē.

²⁴ǁÎb ra ǁaes di danagu ǃhūbaib digu di ǁnâuǃāba ūbē; tsîb ra ǁîga ǁhapu kai ǃgaroǃkhais, dao-i xare-i hâǃnâ tamas ǃnâ.

²⁵ǁÎgu ge ǃkhaenab ǃnâ ra ǀnāǀnāma; ǃnâ-i xare-i hâǃnâ tamab ǃnâ; tsî ǁîb ra ǁîga ǁhapu kai, ǀhoro hâ khoe-i ase.