Read Khoekhoegowab Job 13 Bible Online

Job 13 - Khoekhoegowab bible

Job 13

¹Mû, nēn hoanas ge ti mûsa ge mû, ti ǂgaes ge ǁnâu tsî ge ǁnâuǃā.

²Sago a ǂans kōse ta ge tita ona a ǂan; sago ta ge ǂgōba tide.

³Xawe ta ge Hoaǀgaixab ǃoa nî ǃhoa, tsî Elob aiǃâ ǃereambasensa ta ge ǁkhore hâ.

⁴Tsî sago ge amase ǂhumiǂgapusen-aogo, sago hoago ge a ǂgabi soǀôadī-ao.

⁵Î go ga ǃnōǃari, ǁîs ga sago gā-aisise ība.

⁶ǁNâu re ti ǃereambasensa; î go ǃgaoǃgâ ǂnoagu-aidi ti amǁgaukha didi ai.

⁷Elob aiǃâ go kha ǂkhabase nî ǃhoa tsî ǁîb aiǃâ go kha gāxaǃnâsi-e nî ǃhoa?

⁸ǁÎb di aisa go nî ǃkhōǃoa tamas ka io go Elob ǀkha nî ǂnoagu?

⁹ǃGâibahe go nî xare, ǁîb ga sago ôaǃnâo? ǁÎbats nî gāxaǃnâ sats khoets ra khoeba gāxaǃnâ khami?

¹⁰Ob ge ǁîba amase sago nîra ǁkhara, ǂganǃgâsib ǃnâ go ga aisa ǃkhōǃoao.

¹¹ǀGapisib âb xa ǃhuriǃhurihe go tide tsî hāǂamhe go tide ǃaob xa?

¹²Sago di ǂâiǂâisendi ge tsaob ase ī; sago ǀgapisigu ge ǂgoab ǀkha dīhe hâ ǀgapisigu khami ī.

¹³ǃNōba te go re î ta ǃhoa; a ta mâ xū-i hoa-i xa hāǂamhe.

¹⁴Tarexa ta kha ǁnâi ti ǁgansa ti ǁgûn ǁaegu nî ū, tsî ǀomsa ti ǃommi ǃnâ nî ǁgui?

¹⁵Mû, ǁîb ga ǃgam te xawe ǃâubasen ta tide; tsî ti ī xawe ta ge ti daoga ais âb aiǃâ nî ǃereamba.

¹⁶ǁKhātis ge ǁî ǃkhaisa ǃgâiǃōse nî ība te, xawe hînaxaǃnâ-i ge ais âb aiǃâ hā tide!

¹⁷ǃGâise ǃgâ ti ǃhoasa; tsî ti ǁgausa ǂgaedi âgo ǀkha.

¹⁸Î go nēsi mû, tita ge ti ǂhanuba ge aiǂhomi, tita ge a ǂan, ǂhanu-ai kaihe ta nî ǃkhaisa.

¹⁹Tari-e tita ǂnoagu-ū ǂgao hâ-e? Tita ga nēsi ǃnō-o, o ta ge ga ǁō.

²⁰ǀGam ǃkhaira ǀguira tā dī-ū te, o ta ge tita ais âtsa xu gaugausen tide.

²¹Sa ǃomma ti ǂamǃnâsa xu ūbē, îs sa ǃhuriǃhurisa tā ǃaoǃao te.

²²ǂGai ǁnâi satsa, o ta ge tita nî ǃeream, tamas ka io, î ta tita ǂgai îts satsa oe-am te.

²³Matikō dīsādi tsî ǁoren tsîna ta tita ūhâ? Ti ǃûǂams tsî ti ǁoreb tsîra ǂanǂan te re.

²⁴Tarexats ra ais âtsa gaugau, tsî tarexats ra sa khākhoese ū te?

²⁵Doeǁgamahe ra ǂnareb hais diba ǂkhūǂkhūts nî? Tsî ǃgôaǃgonts nî ǂnâsa ǃhoroǃgaoda-e?

²⁶Sats ra ti ǃoagu au xūna xoa xui-ao, tsî sats ra ǀumi kai te dīsādi ti ǂkhamsis dide.

²⁷Sats ra ǁkhāti ti ǂaira ǃnaob ǃnâ dīǂgā, tsîts ra ti daogu hoaga ǃûiǃgâ; sats ra ǂaiǃnākha ti ǂaira dikha xoaǂnamipe.

²⁸Khoe-i ge ra toa, ǁgao ra xū-i xase, sara-i ǁgurib xa ra hapuhe-i xase.