Read Khoekhoegowab Job 14 Bible Online

Job 14 - Khoekhoegowab bible

Job 14

¹Khoeb tarasa xu ge ǃnaeb ge ǃnubu ǁaeba ra ûi, tsîb ge sâoǃnâsib xa ǀoa hâ.

²ǃKhā-i khamib ra ǀkhī tsîb ra ǃgaoǁnâhe; sommi khamib ra ǁhâ tsîb ge hâ tama hâ.

³Ti ī xawets ra mûra âtsa ǁîb ǂama khowa? Tsî sats ra tita ǀkha ǀgoraǃgâs ǃnâ ǂgâ.

⁴Tari-e ǃanu xū-e nî mā ǃanuoǃnâsiba xu? ǀGui-i xare-i a ǀkhai.

⁵Tsēdi âb ge mîmâihe hâ; ǁkhâgu âb ge sa tawa hâ, tsî sats ge ǀkharib âb hîa īǂamhe ǁoaba ǁgui amaga.

⁶ǁÎba ǂnanxu, îb sâ, îb ǃgaesab khami tsēs âb xa ǃgâiaǂgao.

⁷Hais ge ganupe ǃâubasen-e hâba xuige; ǁhāǁnâhes kao, os ra ǁkhawa ǁhao, tsî ǂgonab âs ge hâbē tide.

⁸ǃNomab âs ga ǃhūb ǃnâ ǀoro, tsî ǃgaos âs ga tsarab ǃnâ ǁō-o,

⁹os ge ǁamab ǁgamgu diba xu ǁkhawa nî ǀkhī tsî nî ǂgona kai, ǂkham ǁhare-i khami.

¹⁰Xawe aob ra ǁō tsîb ge ra ǁguihe; tsî khoeb ra ǀomǀuni, tsî mapab ǁnâi hâ?

¹¹ǁGamgu ǀaus digu ge ra dâukā, tsî ǃāb ra ǀari tsî ra ǂnâ,

¹²nētib ra khoeba ǁgoe tsîb ge ǁkhawa khâi tama; ǀhomgu a ǀkhais kōsen ge ǃnoaǂkhai tide tsî tātsē ǁîn di ǂomsa xu ǂkhaiǂkhaikhâihe tide.

¹³Îts ga satsa sâu te ǀhobas ǃnâ, îts ga gaugau te, ǁaib âts nî ǁkhaedawasens kōse! Îts ga ǁaeba mâiba te tsîts ga ǁnāǃnubai tita xa ǂâi?

¹⁴Khoeb ga ǁō-o, ûib nî ǁkhawa? Tita ge ti ǃkhammi di tsēdi hoadi kōse ga ǃâu, ti oreǁnâs nî hās kōse.

¹⁵Ots ga satsa ǂgai, tsî tita ga ǃeream tsi, ots ga sîsenni sa ǃomkha diba ǁkhore.

¹⁶Xawets ra satsa ti dāǃharode ǃgôa, sats ge tita sâu tama hâ ti ǁoren ǃaroma.

¹⁷Ti ǃûǂams ge ǃgaeǀkhāro-i ǃnâ ǃgae-amhe hâ; tsî sats ra ti ǂhanuoǃnâsiba ǂganam.

¹⁸Tsî amase ǁnā ǃhommi hîa ra ǁnāb ra kā, tsî ǃhaob ra ǃkhais âba xu ǂnûiǃkhunihe,

¹⁹ǁgamgu ge ǀuide ra toa kai, tsî ǁgamgu ge tsarab ǃhūb dib ǃnâ ra dâubē, nētits ra satsa ǃâubasens khoeb disa ǁauǁau.

²⁰Sats ra ǁîba ǀamos kōse ǀgaidā, ob ra ǃgû; ais âba ra ǀkharaǀkharaǃâts ra ǁîba sîbē.

²¹ǁÎb ôan ra ǃgôasib ǃnâ sī xaweb ge ǁîba a ǀū, ǁîn ra sorahe xaweb ge hōǃâ tama hâ.

²²Tsî ǁîb di ǁgans ganupes ǁîb ai hâ hîa ra tsû, tsî ǁîb di ǀoms ǁîb ǃnâs hâ hîa ra ǃhausen.