Read Khoekhoegowab Job 15 Bible Online

Job 15 - Khoekhoegowab bible

Job 15

¹ǁGoasib ge Elifab Temanǁîba ǃeream tsî ge mî;

²Gā-ai aoba kha ǂoaxaǃnâ ǂans ǀkha nî ǃeream, tsî ǃnāb âba ǀoaǀoab nî aiǂoas di ǂoab xa?

³Mîdi hîa hui tamadi ǀkha ra ǂgōǀauǃâ, tsî mîdi harebe-i xare-e dī tamadi ǀkha?

⁴Ā, eloǃaoǃgâxasib onats ra ǁauǁau. Tsîts ra Elob di ais aiǃâba xu ǀgoresa ūbē.

⁵Sa ams ra ǂhanuoǃnâsib âtsa ǁgau; tsîts ge gāxaǃnân di namma ūǂuibasen hâ.

⁶Sa ams ra ǀgoraǃgâ tsi, tsî ti tama ta; tsî amǁgaukha âts ra sa ǃoagu ǀhûǀguitimî.

⁷ǂGurotsa satsa khoese ǃnae hâtsa? ǃHomgu aiǃâts ge ūǀkhīhe?

⁸ǂGanǃgâsa ǀapes Elob disa ǁnâuts ge, tsî gā-aisiba sa ǃoa ǂgaits ge?

⁹Tare xū-ets kha satsa a ǂan, sige a ǀū-e? Tare xū-ets kha satsa ra ǁnâuǃā sige tawa hâ tama-e?

¹⁰Sige ǁaegub ge ǁkhāti ǀhaiadana hâ aoba hâ; ā, ama kaira aob, sa îb xa kaira hâba.

¹¹ǁKhaeǂgaodi Elob dide, ǂkhariba tsi di a, tsî mîs tsaurasets ra ǃhoa-ūhesa?

¹²Tarexab ra ǂgaob âtsa ǂgaebē tsi, tsî tarexa ra kha mûra âtsa ra ǂkhai?

¹³Ots ra gagas âtsa Elob ǃoagu unu, ots ra nēti ī mîde ams âtsa xu ǂoa kai?

¹⁴Tarexūba khoeba ob nî ǃanu, tsî ǁnāb tarasa xu ǃnae hâba, ob nî ǂhanu-ai?

¹⁵Mû, ǃanun âb aib ge ǂgomaiǂnûi tama hâ, tsî ǀhomgu ge ǁîb mûǁae ǃanu tama hâ,

¹⁶matikōse ǁnās ǃgâ-ai ǁnā khoeb hîa ǁgaisi tsî ǀō hâb; ǂhanuoǃnâsiba ǁgam-i khami ra āba?

¹⁷Tita ge nî ǁgau tsi, ǁnâu te re; tsî mû ta ge-i ǁî-e ta ge nî ǃhoaba tsi,

¹⁸gā-aigu ge ǂhôa-e, tsî ǁîgu di îgu aiǃâ ge gaugauhe tama hâ i-e.

¹⁹ǁÎgu ǀguri ge ǃhūba māhe hâ igu tsî ǃhaokhoe-i ǁîgu ǁaeguba-ū ǃgûǃganu tama ge hâ iga.

²⁰Mâ tsēs hoas aib ra eloxoresaba ǁî-aitsama tsûba dībasen, tsî ǀoro ǀgaus â-i kurigab ge ǁgâiǀā-aoba ǁguibēbahe hâ.

²¹ǀŌb ǃhuriǃhuridi dib ge ǁîb ǂgaera ǃnâ hâ; ǂkhîb ǃnâb ra hîǀhuru-aoba ǁîb ǂama hā.

²²ǁÎb ge ǂgom tama hâ, ǃkhaenaba xub ǁkhawa nî hā ǃkhaisa; tsî gôabab mûǂuibahe hâ ǃkhaisa.

²³ǁÎb ra ǀnarema pere-i ǃaroma, mapab ga hâ xawe; ǁîb ge a ǂan, ǁîb di ǃommi ǀgūses ǃkhaenab di tsēsa ǂhomihe hâ ǃkhaisa.

²⁴ǂŌǂōsib tsî ǀhūb tsîkha ge ǁîba ra ǃhuriǃhuri; ǁîkha ge ǁîba ra dā, gao-aob ǃkhamma ǁāǁābasen hâb khami,

²⁵ǁîb ra ǃommi âba Elobǀî ǀhōǂui xui-ao tsî Hoaǀgaixabǀîb ra ǃgari-aose dīsen.

²⁶ǁÎb ge ǁîba ra ǃgûǃoa ǂnîǃaoxase ǁîb di ǁau, ǀgapise ǃkhōkhâihe hâ khōsikhōgu ǀkha.

²⁷ǁÎb di aisab kaub âb ǀkha ge ǃgū-ai amaga, tsî kamanab âb kaub xa a ǃhonaxa amaga,

²⁸tsî hîǀhuruhe hâ ǃādeb ge ge ǁanǃnâ, omgu, ǁanǃnâhe ǁoaga, ǂkhū gu nîse gu ǂhomihe hâ amaga.

²⁹ǁNā-amagab ge ǃkhū tide, tsî xūxasib âb ge hâhâ tide, tsî ǀoasib ân ge ǃhūb ai khoraǂuisen tide.

³⁰ǁÎb ge ǃkhaenaba ûixū tide; ǁhapub ge ǂgonab âba nîra ǂnâǂnâ, ǁîb ge nîra kā ams âb di ǃgoms ai.

³¹Îb tā ǁausib ai ǂgomaiǂnûi, ǁîba xub ra ǂgaeǂhapuheba, ǁausib ge ǁîb di amǃnâse nî ī xui-ao?

³²ǁÎb di tsē tamas aib ge nî ǀoaǀoahe ǂgonab âb ǃam tide xui-ao.

³³ǁAn tama hâ ǂauxûiǂûhais ǂûn âb ge ǂauxûiǂûhaisa xus khami nîra ǀgabiǁnâhe, tsî ǃkhās âb ge ǀkherahaisa xus khami nîra aoǁnâhe.

³⁴ǀHûs hînaxaǃnân dis ge a ǃū-aisa, tsî ǀaes ge tentomdi ǀkhaexūn dide nîra hapu.

³⁵ǁÎn ra ǀhupuba ǃkhōǃoa, tsîn ra ǁausiba ǁora; tsî ǃnāb ân ra gāxaǃnâsiba ǀkhī-ū.