Read Khoekhoegowab Job 16 Bible Online

Job 16 - Khoekhoegowab bible

Job 16

¹Ob ge Joba ǃeream tsî ge mî:

²Tita ge ǂgui xūn nēti īna ge ǁnâu; sago hoago ge a ǂkhabusa ǁkhaeǂgao-ao!

³Toa di hâ ǂoaxaǃnâ mîde? Tamas ka io, tare xū-e ra ǂnī kai tsi ots ra ǁnāti ǃeream?

⁴Tita on ga sago khami ǃhoa hâ, sago ǀoms ga ti ǀoms di amǃnâs ai hâ hâo; o ta ge ga mîde sago ǃoagu ǀhaoǀhao hâ tsî ta ga sago ǂama ǃnabindana hâ.

⁵O ta ge ga ti ams ǀkha ǀgaiǀgai go hâ, tsîs ga gons ti amǁgaukha disa sago ǁkhaeǂgao hâ.

⁶ǃHoa ta ka xaweb ge ti tsûba ǀû tama hâ; tsî ǀû ta ka xawe tare xū-e ra bē tita xu?

⁷Amaseb ge ǁîba nēsi ǀhupuǀhupu te hâ; sats ge ti ǀhûs hoasa ge hîkākā.

⁸ǁAiro kai tets ge satsa, ǁîs ge a ǀhûǀguitimî-ao; tsî ǃgarasasib ge ti ǃoagu ra khâi, ǁîb ra ti ais ǃnâ ǀhûǀguitimî.

⁹ǁÎb di ǁaib ra ǀkhauǃā te, tsî ǁîb ra ǁkhan te, ǁîb ra ǁaninǁgûǂam te; ti mâǃoasabeb aseb ra mûra âba ǀāǀā ti ǃoagu.

¹⁰ǁÎn ra ams âna tiǀî khowa; ǁîn ra tita ǃharaxūb ǀkha ǃnanib ai ǁapu, ǀhûpen ra ti ǃoagu ǀgaiǀgaisen.

¹¹Elob ge tita ǂkhabana ge māǁnâ, tsîb ge tita eloxoresan ǃomǁae ge sī kai.

¹²Sâba ta ūhâ hîab ge ǁîba ge khôa te; tsî ǃaob ai ǃkhō tsî ge ǂkhūǂkhū te, tsîb ge tita ǁkhâuǀîxūse ge ǂnûibasen;

¹³ǁÎb di ǁkhâu-aogu ge ge xāǂgā te. ǁÎb ge ti ǃnaira ge ǃkhaiǃā tsîb ge sâu te tama hâ. ǁÎb ge ti tsababa ǃhūb ai ge ǁhōxū.

¹⁴ǁÎb ge ǂkhôaǃkhai-e xu ǂkhôaǃkhai-i kōse ge khôaǂkhū te; ǁîb ge tita ǃgari-aose ge ǃkhoeǂnôa.

¹⁵Tita ge ǁhō-e ge ǂom ti khōb ai, ti ǁnâba ta ge tsarab ǃnâ ge ǃkhāǂgā.

¹⁶Ti ais ge ǀhai hâ āb xa, tsî ti mûǃgâdi aib ge ǁōb di somma ǁgoe;

¹⁷tsūdī-i xare-i ti ǃomǁae hâ tama tsî ti ǀgores a ǂhauǃnâ xawe.

¹⁸ǃHūbaitse, tā ǃgū-ai ti ǀaoba; tsî ti ǂgaisa as tā sâǃkhai-e hōǃâ

¹⁹Tsî ǁkhāti mû, ǀhommi ǃnâb ge ti ǀhûǀguitimî-aoba hâ, ti ǃkhō-amaoba ǀgapigu ǃnâ.

²⁰Ti horesagu ge a ti ǃhō-ao, xawe ti mûra ge Eloba ra ǁgamroǂnâba;

²¹îb ga ǀguiba ti khoeta ǂhanudība Elob tawa, khoen ôa-i khoexakhoeb â-e ra dībase.

²²ǀOro ǀgaus â-i kurigu ga hāo, o ta ǁnā daob ai nîra ǃgû, ǁîba-ū ta ǁkhawa oa tideba xui-ao.